លោក សួន ពិសិដ្ឋ បានចេញមុខនិយាយពីបេក្ខជន ទុំ រដ្ឋា ដែលជ្រុះចេញពីកម្មវិធីប្រឡងជុំដំបូង Cambodia Idol ។ រហូតមកទល់ពេលនេះ នៅលើបណ្តាញសង្គមហ្វេសប៊ុកហាក់នៅមិនទាន់ស្ងប់កំដៅនៃការរិះគន់ជុំវិញ
រាជធានីភ្នំពេញ ៖ លោក សួន ពិសិដ្ឋ បានចេញមុខនិយាយពីបេក្ខជន ទុំ រដ្ឋា ដែលជ្រុះចេញពីកម្មវិធីប្រឡងជុំដំបូង Cambodia Idol ។ រហូតមកទល់ពេលនេះ នៅលើបណ្តាញសង្គមហ្វេសប៊ុកហាក់នៅមិនទាន់ស្ងប់កំដៅនៃការរិះគន់ជុំវិញការមិនសុខចិត្តដែលអោយបេក្ខជន ទុំ រដ្ឋា ធ្លាក់ទាំងបេក្ខជនរូបនេះ មានទឹកដមសម្លេងល្អ ។ មហាជនបានផ្តោតទៅលើគណៈកម្មការ ជាពិសេសលោក ឆន សុវណ្ណ រាជ និងអ្នកនាង ឱក សុគន្ធកញ្ញា ដែលបានទម្លាក់បេក្ខជនរូបនេះមិនអោយទៅវគ្គបន្ត។
ជុំវិញបញ្ហាខាងលើនេះ ជាអ្នកនិពន្ធបទចម្រៀង និងធ្លាប់ផ្តល់ពិន្ទុប្រឡងចម្រៀងនាពេលកន្លងមក លោក សួន ពិសិដ្ឋ បានចេញមុខនិយាយពីចំណុចមួយចំនួនដែលធ្វើអោយគណៈកមកម្មការ មិនអោយ ទុំ រដ្ឋា ឡើងវគ្គបន្ត។
លោកបានលើកឡើងថា ប្អូន ទុំ រដ្ឋា ខ្ញុំបានមើល និងស្ដាប់ការច្រៀងប្រឡងក្នុងកម្មវិធី Cambodian Idol ប្អូនមានចំណុចខ្សោយ និងប្អូនក៏មានចំណុចខ្លាំង! ទី១)- គណៈកម្មការទាំង៤រូប លោក ណុប បាយ៉ារិទ្ធ អ្នកនាង ឱក សុគន្ធកញ្ញា អ្នកនាង សុខ សីឡាលីន និងលោក ឆន សុវណ្ណារាជ បានលើកឡើងអំពីចំណុចវិជ្ជមាន និងអវិជ្ជមាន អំពីទេពកោសល្យពូកែ និងខ្វះខាតក្នុងការច្រៀងរបស់ប្អូន សុទ្ធសឹងតែត្រូវទាំងអស់!។ គាត់ទាំង៤រូប មានមូលហេតុ និងផលល្អជាក់ប្រាកដ ច្បាស់លាស់របស់គាត់រៀងៗខ្លួន ឈរក្នុងការសម្រេចចិត្តកាត់សេចក្ដីជាប់ ឬធ្លាក់!។
លោកបន្តថា ទី២)- ប្អូនមាន (ដុង) ទេពកោសល្យ ឧបនិស្ស័យ ទឹកដមសម្លេងពីកំណើតល្អ និងចេះរបៀបបែបផែននៃការច្រៀងអឺនអង (អឿនឈឿន!) បានល្អ!។
លោក សួន ពិសិដ្ឋ បន្តថា ទី៣)- និយាយអំពីបច្ចេកទេសសម្លេង និងការច្រៀងរបស់ប្អូនវិញម្ដង ៖ សម្លេងប្អូនប្រើចេញពីដើមទ្រូង ទៅបំពង់.ក ដល់គល់ថ្គាម ចូលក្រអូមមាត់ និងចុងច្រមុះបន្តិច។ ប្អូនច្រៀងប្រកាន់តុងក្នុងបទភ្លេងបានល្អខ្លាំង ភ្លាវតិចតួចបំផុត ចង្វាក់ក៏ល្អ ចេះប្រើសម្លេងខ្មោចពេលស្រែកឡើងខ្ពស់ ចេះទប់សម្លេង ទោះជាស្ទើរបន្តិចក៏ដោយ ដោយសារអស់កម្លាំងខ្ញុំយល់! ចេះថ្នម ចេះខ្លាំង ខ្យល់ដង្ហើមវែងល្មមគួរសម មិនទាន់ចេះប្រើខ្យល់ដង្ហើម និងមិនទាន់ចេះទប់ខ្យល់ដង្ហើម រលកសម្លេងមាន រលកចង្វាក់រណ្ដំល្អ គ្រាន់តែមិនទាន់ចេះ និងយល់របៀបនៃការប្រើរលកក្នុងការប្រើសម្លេងនៅឡើយ រីឯសម្លេងកណ្ដាលរបស់ប្អូនធ្ងន់ល្អ និងមានកម្លាំងមាំធំ រួមទាំងពេលស្រែកឡើងដែរ ទាស់ត្រង់មួយចំណុច ដោយសារតែសម្លេងចុងច្រមុះ លាយនឹងក្រអូមមាត់ និងគល់ថ្គាមនេះហើយដែលធ្វើឱ្យសម្លេងប្អូនស្រដៀងទៅនឹងសម្លេងគណៈកម្មការ ឆន សុវណ្ណារាជ ច្រើនគួរសម! ហើយការច្រៀងស្រែកទៅតុងខាងលើៗរបស់ប្អូននៅស្ទើរខ្ពស់មិនដល់តុង បើទោះជាអស់កម្លាំងយ៉ាងណាក៏ដោយ… ប៉ុន្តែ…! ពេលដែលប្អូនច្រៀងចុះមកសម្លេងខាងក្រោមវិញ ប្អូនប្រើសម្លេងដើមទ្រូងទាំងស្រុងនោះ គឺក្រោមខ្លាំង ហើយបានធ្ងន់ល្អខ្លាំងណាស់ និងមានទឹកដមក្រអួនល្អ និងល្អជាងសម្លេងតារាចម្រៀងអាជីពក្នុងវិស័យសិល្បៈតន្ត្រីចម្រៀងខ្លះផង ក៏មិនមាន និងមិនអាចធ្ងន់មានទម្ងន់ និងមានទឹកដមល្អដូចជាសម្លេងប្អូននោះឡើយ! ហើយសម្លេងដើមទ្រូងខាងក្រោមរបស់ប្អូន គឺមិនច្រឡំជាមួយអ្នកណា ឬតារាចម្រៀងរាមច្បងណានោះឡើយ! គឺ Unique!។
លោកបន្តថា ទី៤)- សម្រាប់ខ្ញុំ គឺខ្ញុំផ្ទាល់ឱ្យប្អូនជាប់ទៅប្រឡងដំណាក់កាលបន្ទាប់ទៀត ដូចជាគណៈកម្មការ លោក ណុប បាយ៉ារិទ្ធ ដូច្នោះដែរ! គណៈកម្មការទាំង៣រូបទៀតគាត់មិនឱ្យប្អូនជាប់ គឺគាត់មាន ហេតុ និង ផល វិជ្ជាជីវៈ បទពិសោធន៍ និងការវាស់វែង ថ្លឹងថ្លែង ច្បាស់លាស់របស់គាត់ ក្នុងការសម្រេចចិត្តមិនឱ្យប្អូនជាប់ឈរក្នុងភាពត្រឹមត្រូវរបស់គាត់! ប៉ុន្តែបើទោះជាប្អូនមិនជាប់ក៏ដោយ កុំអស់សង្ឃឹម ត្រូវតែរឹងមាំ ឈប់យំ! បន្តដំណើរតទៅមុខទៀតរហូតទាល់តែទទួលបានជោជ័យគោលដៅសុបិន្ត ជាតារាចម្រៀងល្បីក្នុងវិស័យសិល្បៈតន្ត្រីចម្រៀងខ្មែរមួយរូបនេះ! ។
លោកបន្តទៀតថា ទី៥)- បងគាំទ្រប្អូន ហើយនឹងផ្ដល់ឱកាសទទួលប្អូនជាកូនសិស្សរបស់បងផ្ទាល់ ខ្ញុំនឹងបង្វឹកបង្ហាត់បង្រៀនប្អូនដោយផ្ទាល់ដល់ផ្ទះ និង studio ខ្ញុំតែម្ដង អំពីរបៀប និងបច្ចេកទេសច្រៀង និងកុងត្រូលសម្លេង ស្គាល់ណាត.ភ្លេង ដឹងការកុងត្រូលតុង និងចង្វាក់ និងសម្លេងបានច្បាស់ ចេះប្រើដង្ហើម ចេះទប់ខ្យល់ដង្ហើម និងដង្ហើមវែង និងច្រៀងចុះក្រោមកាន់តែធ្ងន់ កាន់តែចុះក្រោមបានទៀត ប្រើសម្លេងខ្មោចកាន់តែខ្ពស់ក្រលួចក្រអួន ស្រែកកាន់តែបានខ្ពស់ មានកម្លាំងនិងទឹកដម ប្រែក្លាយប្អូនឱ្យក្លាយជាតារាចម្រៀងអាជីព Professional និងចេះអក្សរភ្លេងណោតច្រៀងច្បាស់លាស់មិនមែនលំៗ។
លោក សួន ពិសិដ្ឋ បានបន្ថែមថា ទី៦)- ដោយសារតែបងនៅក្រោមដំបូលក្រុមហ៊ុនក្រុមគ្រួសារ ហង្សមាស ស្រាប់ ក្នុងនាមជាលោកគ្រូ អ្នកតែងនិពន្ធបទភ្លេង និងទំនុកច្រៀង គណៈកម្មការកម្មវិធីប្រឡងចម្រៀង តារាចម្រៀង ការសម្ដែង និងជាគ្រូបង្វឹកបង្ហាត់បង្រៀនតារាចម្រៀង ប្រចាំក្រុមហ៊ុន ផលិតកម្ម ហង្សមាស បងមានក្ដីចាប់អារម្មណ៍លើសមត្ថភាព និងទេពកោសល្យពីកំណើតប្អូនខ្លាំងណាស់ ខ្ញុំនឹងស្នើសុំលោកពូអគ្គនាយកក្រុមហ៊ុន ផលិតកម្ម ហង្សមាស រួមទាំងបងៗថ្នាក់ដឹកនាំក្រុមហ៊ុន ដើម្បីអនុញ្ញាតផ្ដល់ឱកាសឱ្យប្អូនបានមានឱកាសបញ្ចេញសមត្ថភាព ក្នុងបទចម្រៀងថ្មីដែលខ្ញុំនឹងតែងនិពន្ធទាំងបទភ្លេងថ្មី ទាំងទំនុកច្រៀងថ្មី និងបង្វឹកបង្ហាត់បង្រៀងប្អូនដោយផ្ទាល់ក្នុងការច្រៀងបទថ្មីរបស់ខ្ញុំតែងនិពន្ធ និងក្រុមហ៊ុន ហង្សមាស ព្រមទាំងស្នើសុំក្រុមហ៊ុន នឹងផលិតជា MV ដល់ប្អូន អាចផ្ដល់ឱកាសឱ្យប្អូនក្លាយជាតារាចម្រៀងប្រចាំផលិតកម្ម! ប្អូនមិនចាំបាច់ទៅផលិតកម្មណា ឬទៅណាទៅណីនោះទេ! សង្ឃឹមថា លោកអគ្គនាយក និងបងៗ នឹងមានមេត្តាចូលរួមផ្ដល់ឱកាសឱ្យប្អូនផងដែរ!។ ដោយក្ដីគោរពស្រលាញ់ពីខ្ញុំបាទ! ខ្ញុំមើលឃើញ គ្រាប់ពេជ្រ Unique មិនទាន់ឆ្នៃ! ។
លោកបន្ថែមទៀតថា ទី៧)- ចរិតឫកពារបស់ប្អូនល្អសមសួន មើលទៅមានការចេះដឹងថ្លៃថ្នូរមានក្រមសីលធម៌ល្អ និងរូបសម្បត្តិប្អូនប៉ុណ្ណឹងសមរមហើយអាចជាតារាបាន។ ចាំមើលៗ..ថាតើប្អូនប្រឡងធ្លាក់មិនមានពាន នឹងអាចក្លាយជាតារាចម្រៀងល្បី មានប្រជាប្រិយភាព មានហ្វេនគាំទ្រ និងមានបទល្បីៗក្នុងដួងចិត្តមហាជនឬអត់!? ខ្ញុំធ្លាប់បានធ្វើ និងជួយជ្រោមជ្រែងបុគ្គលសាមញ្ញមិនដែលប្រឡងចម្រៀង មិនមានពាន មិនមានឈ្មោះក្នុងសង្គម ពីជីវិតក្រលំបាក រហូតទទួលបានជោគជ័យក្នុងវិថីសិល្បៈតន្ត្រីចម្រៀងក្លាយជាកំពូលតារាចម្រៀងខ្មែរមួយរូបដែលមានកេរ្តិ៍ឈ្មោះល្បីល្បាញ មានប្រជាប្រិយភាព មានហ្វេនរាប់លាននាក់ រហូតក្លាយជាសហគ្រិនជោគជ័យទាំងក្នុងសិល្បៈ ទាំងក្នុងវិស័យពាណិជ្ជកម្មផងដែរ រហូតដល់មកសព្វថ្ងៃនេះរួចមកហើយ!៕
ចែករំលែកព័តមាននេះ