ចេញពីជួបជុំបោះពួយដូចហោះពន្លះរថយន្តដឹកដី ខាតបង់ទាំងទ្រព្យ របួសដល់ខ្លួនទៀត
- ភ្នំពេញ
បុរសម្នាក់បានបើករថយន្តលឿនទាំងស្ថានភាពស្រវឹងជោកជាំ ស្រាប់តែទៅបុកផ្ទប់ជាមួយនឹងរថយន្តបែនដឹកដីពីក្រោយពេញទំហឹង បណ្តាលឲ្យ
រាជធានីភ្នំពេញ ៖ បើតាមសេចក្តីរាយការណ៍បានឱ្យដឹងថា បុរសម្នាក់បានបើករថយន្តលឿនទាំងស្ថានភាពស្រវឹងជោកជាំ ស្រាប់តែទៅបុកផ្ទប់ជាមួយនឹងរថយន្តបែនដឹកដីពីក្រោយពេញទំហឹង បណ្តាលឲ្យរថយន្តរួញស្រុញមួយកំណាត់មុខ ចំណែកអ្នកបើកបរវិញរងរបួសសន្លប់ស្តូកស្តឹង បង្កឱ្យមានការភ្ញាក់ផ្អើលកាលពីវេលាម៉ោង១១និង៥០នាទីយប់ ថ្ងៃទី៣១ ខែឧសភា ឆ្នាំ២០២២ នៅខាងជើងស្ពានអាកាសផ្សារដីហុយ តាមបណ្ដោយផ្លូវហាណូយ ស្ថិតក្នុងសង្កាត់ទឹកថ្លា ខណ្ឌសែនសុខ ។
បើតាមប្រភពព័ត៌មានពីប្រជាពលរដ្ឋនៅកន្លែងកើតហេតុ បានប្រាប់អោយដឹងថា មុនពេលកើតហេតុ ពួកគាត់បានឃើញម្ចាស់រថយន្តទើបនឹងចេញពីកម្មវិធីជួបជុំនៅផ្ទះបងប្អូនក្បែរកន្លែងកើតហេតុនោះ។ លុះពេលផឹកស្រវឹងក៏ចេញទៅផ្ទះមុន ដោយបើករថយន្តម៉ាកកាមរីហាយប្រីដស៍ ពណ៌ទឹកប្រាក់ ពាក់ស្លាកលេខ ភ្នំពេញ2P-4293 ធ្វើដំណើរតាមបណ្ដោយផ្លូវលេខហាណូយ ទិសដៅពីជើងទៅត្បូងក្នុងល្បឿនលឿនដូចហោះ ។
ប្រភពដដែលបន្តថា លុះពេលមកដល់ជិតស្ពានអាកាសផ្សារដីហុយ រថយន្តខាងលើនោះក៏បានបុកផ្ទប់ពីក្រោយរថយន្តបែនដឹកដីមួយគ្រឿងដែលធ្វើដំណើរស្របទិសគ្នា បណ្តាលអោយរថយន្តកាមរីហាយប្រីដស៍ រងការខូចខាតរួញស្រុញមួយកំណាត់ទាំងស្រុង ចំណែកអ្នកបើកបរវិញរងរបួសសន្លប់ស្តូកស្តឹងនៅក្នុងរថយន្តតែម្តង ដោយសារក្នុងខ្លួនបុរសរូបនេះមានជាតិស្រវឹងច្រើន ។
បន្ទាប់ពីកើតហេតុ រថយន្តបែនដឹកដីមិនបានឈប់ដោះស្រាយនោះទេ និងបានបន្តដំណើរបើកគេចខ្លួនបាត់ស្រមោលទៅ ។ ចំណែកម្ចាស់រថយន្តរងគ្រោះវិញ ត្រូវបានប្រជាពលរដ្ឋទាក់ទងហៅរថយន្ដសង្គ្រោះគ្លីនិកសម្ភពពន្លឺ មកដឹកទៅសង្គ្រោះភ្លាមៗផងដែរ។ ដោយឡែករថយន្តបុរសរងគ្រោះដែលខូចខាតនោះ ក៏ត្រូវបានសាច់ញាតិហៅរថយន្ដស្ទូចមកស្តួយកទៅជួសជុលដោយខ្លួនផងដែរ ៕
ចែករំលែកព័តមាននេះ