រាជធានីភ្នំពេញ ៖ តារាសម្តែងជើងចាស់ លោកគន្ធ តារាវណ្ណ កំពុងមានជំងឺ និងស្ថិតក្នុងស្ថានភាពធ្ងន់ធ្ងរ ។ នេះបើតាមការឱ្យដឹងរបស់លោក គន្ធ ជីវ័ន្ត ជាកូនប្រុស និងជាពិធីករកីឡាដ៏ល្បីឈ្មោះ។
លោក គន្ធ ជីវ័ន្ត បានបង្ហោះសារ និងរូបភាពអំពីលោកឪពុករបស់ខ្លួនយ៉ាងដូច្នេះថា «សូមទេវតាវត្ថុស័ក្តសិទ្ធិជួយអោយលោកឪពុកខ្ញុំឆាប់ជាសះស្បើយពីជំងឺ និងរឹងមាំឡើងវិញ ។ គាត់កំពុងស្ថិតក្នុងស្ថានភាពធ្ងន់ធ្ងរ ។ ប្រឡូកក្នុងវិស័យសិល្បៈភាពយន្តតាំងពីឆ្នាំ១៩៨៦ ។ គាត់ឈ្មោះ គន្ធ តារាវណ្ណ»។ យ៉ាងណាមិញ លោកមិនបានបញ្ជាក់ថា លោកឪពុកមានជំងឺអ្វីនោះទេ ។
ចំណែកភរិយាលោក គន្ធ តារាវណ្ណ គឺអ្នកស្រី ឈួន ប៊ុននី បានអះអាងប្រាប់កោះសន្តិភាពតាមសារអេឡិចត្រូនិចថា តារាសម្តែងជើងចាស់លោក គន្ធ តារាវណ្ណ បាននឹងកំពុងធ្លាក់ខ្លួនឈឹដោយសារជំងឺជាច្រើនមុខ និងត្រូវបានគ្រុមគ្រួសារបញ្ជូនយកទៅព្យាបាលនៅក្នុងមន្ទីរពេទ្យជោរ៉ៃរាជធានីភ្នំពេញ។
ដោយសារស្ថានភាពជំងឺដែលតារារូបនេះកំពុងតែផ្ទុកសុទ្ធតែជាប្រភេទកាចសាហាវ ទើបក្រុមគ្រួសារបានសម្តែងក្តីបារម្ភយ៉ាងខ្លាំង បើទោះបីជាពេលនេះស្ថានភាពរបស់លោកនៅមិនទាន់ធ្ងន់ធ្ងរក្តី។ស្វាមីអ្នកស្រីបានពើបប្រទះជំងឺលើសឈាម ស្ទះទឹកប្រម៉ាត់ និងសសៃឈាមនៅពោះប៉ោងហើម ជាហេតុធ្វើអោយទឹកនោម ភ្នែកនិងសាច់ឡើងពណ៌លឿងទាំងអស់។ អ្នកស្រីបញ្ជាក់ថា ដំបូងឡើយស្វាមីអ្នកស្រីបានចូលទៅពិនិត្យនិងព្យាបាលជំងឺនៅមន្ទីរពេទ្យមន្ទីរពេទ្យព្រះកេតុមាលា ដោយពេលនោះពេទ្យពិនិត្យឃើញតែសសៃឈាមនៅពោះគាត់ហើមប៉ុណ្ណោះដោយមិនឃើញប៉ះពាល់ប្រម៉ាត់ និងថ្លើមឡើយ។ អ្នកស្រីបន្តថា ប៉ុន្តែកាលពីម្សិលមិញកូនក៏បាននាំគ្នាទៅពិនិត្យនៅមន្ទីរពេទ្យជោរ៉ៃ ដើម្បីអោយប្រាកដពីស្ថានភាពជំងឺរបស់គាត់អោយបានច្បាស់ជាងនេះ។ លុះពេលទៅពិនិត្យក្រុមគ្រូពេទ្យក៏បានបញ្ជាក់ពីស្ថានភាពជំងឺរបស់គាត់ដូចខាងលើតែម្តង នោះជាហេតុនាំអោយក្រុមគ្រូពេទ្យយកគាត់ទៅសម្រាកព្យាបាលនៅបន្ទាប់សង្គ្រោះបន្ទាន់តែម្តង។
អ្នកស្រី ឈួន ប៊ុននី បានលើកឡើងបន្ថែមថា រហូតមកទល់ពេលនេះក្រុមគ្រូពេទ្យបានព្យាយាមព្យាបាលជំងឺលើសឈាមរបស់គាត់អោយចុះជាមុនសិន បើឈាមរបស់គាត់មិនទាន់អាចធូស្រាលនៅឡើយ ពោលឈាមគាត់នៅតែឡើងចុះ។ យ៉ាងណា បើតាមអ្នកស្រី ឈួន ប៊ុននី ស្ថិតក្នុងស្ថានភាពនេះអ្នកស្រី និងក្រុមគ្រួសារលោក គន់ តារាវណ្ណ ពិតមានការព្រួយបារម្ភយ៉ាងខ្លាំង ព្រោះលោកបានជួបប្រទះជំងឺច្រើនមុខ រួមនឹងភាពចាស់ជរាផងនោះ។សូមរម្លឹកថា លោក គន្ធ តារាវណ្ណ ទោះបីជាមន្ដ្រីយោធាថ្នាក់ឧត្ដមសេនីយ៍ត្រី “ផ្កាយមួយ” ក៏ដោយ ក៏លោកនៅតែឈរលើវិថីសិល្បៈសម្ដែងមិនរាថយឡើយ ។ ក្នុងពេលបច្ចុប្បន្ន គេឃើញការសម្ដែងរបស់លោកតាមរយៈខ្សែវីដេអូភាគ និងរឿងខ្លីបែបអប់រំ់ផ្សាយតាមកញ្ចក់ទូរទស្សន៍នានា។
គួរបញ្ជាក់ថា ក្នុងវ័យប្រមាណ៧០ឆ្នាំ លោកគន្ធ តារាវណ្ណ ក្រៅពីអាជីពសិល្បះ បច្ចប្ប្នន្នលោកក៏ជាមន្ដ្រីយោធាថ្នាក់ឧត្ដមសេនីយ៍ត្រី “ផ្កាយមួយ” ផងដែរ។ ក្នុងពេលបច្ចុប្បន្នគេឃើញការសំដែងរបស់លោកតាមរយៈខ្សែវីដេអូភាគ និងរឿងខ្លីបែបអប់រំ់ផ្សាយតាមកញ្ចក់ទូរទស្សន៍នានា។ លោកគន្ធ តារាវណ្ណ បានចាប់ផ្ដើមចូលប្រឡូកក្នុងពិភពសិល្បៈសំដែងតាំងពីឆ្នាំ១៩៨៦ ។
លោកធ្លាប់ចូលរួមសំដែងក្នុងខ្សែភាពយន្ដរឿងសម័យ និង បុរាណប្រហែលជា១៧០រឿង ។ លោកមានកេរិ៍្ដឈ្មោះល្បីចាប់តាំងពីឆ្នាំ១៩៨៩មក ជំនាន់លោកគង់ សុភី លោកចៅ ចាន់ណារី លោកយស បូវណ្ណៈ អ្នកនាងអម្ពរ ទេវី អ្នកនាងចាន់ តារាទី លោកខៃ ប្រសិដ្ឋ អ្នកនាង សុខ ស្រីមុំ និងអ្នកនាងពិសិដ្ឋ ពិលិកា ជាដើម ។ កាលនោះលោកល្បីខ្លាំងតាមរយៈ រឿង “ផ្ការាំងរុះរោយ” តួឯកជាមួយអ្នកនាង ឃុន វណ្ណា ។ ចាប់តាំងពីពេលនោះមក លោកតែងតែចូលរួមសំដែងជារឿយៗ តែចាប់តាំងពីឆ្នាំ២០០០មក លោកបានក្លាយជាតួឪពុក និងជាតួឧកញ៉ា ឬតួព្រះមហាក្សត្រ ជាច្រើនរឿងដូចជារឿង “តេជោតំឌិន” រឿង “ព្រះសុធន នាងកែវមនោរាហ៍” ជាដើម ។
ក្នុងឆ្នាំ២០១០នេះ លោកបានចូលរួមសំដែងក្នុងរឿងភាគជាច្រើនរឿងដូចជារឿង “បេះដូងខ្ញុំសំរាប់អ្នកណា” រឿង “ចាញ់ចិត្ដដ្បិតស្រលាញ់” ។ បច្ចុប្បន្នលោកមានកូន១៣នាក់ ក្នុងនោះប្រុស៨ នាក់ ដោយនៅក្នុងកូនប្រុសម្នាក់របស់លោកឈ្មោះ គន្ធ ជីវ័ន្ត ក៏ត្រូវបានគេទទួលថា ជាពិធីករអធិប្បាយកីឡា ប្រដាល់ និងបាល់ទាត់ ដ៏មានថ្វីមាត់ម្នាក់ផងដែរ៕
គួររំលឹកថា ៖ លោកឧត្ដមសេនីយ៍ត្រីគន្ធ តារាវណ្ណ តារាភាពយន្ដខ្មែរនៅតែបន្ដក្នុងពិភពសិល្បៈ ៕
ចែករំលែកព័តមាននេះ