ចិន៣នាក់ចាប់ទាញបុរសម្នាក់ចេញហាងកាហ្វេរុញចូលក្នុងរថយន្តផ្អើលមហាវិថី
- ភ្នំពេញ
បុរសជនជាតិចិនម្នាក់ រួមជាមួយនឹងគូស្នេហ៍ជនជាតិខ្មែរម្នាក់ទៀត ត្រូវបានបុរសសង្ស័យជាជនជាតិចិនចំនួន០៣នាក់ផ្សេងទៀត បានធ្វើសកម្មភាព
រាជធានីភ្នំពេញ ៖ បើតាមសេចក្តីរាយការណ៍បានឱ្យដឹងថា បុរសជនជាតិចិនម្នាក់ រួមជាមួយនឹងគូស្នេហ៍ជនជាតិខ្មែរម្នាក់ទៀត ត្រូវបានបុរសសង្ស័យជាជនជាតិចិនចំនួន០៣នាក់ផ្សេងទៀត បានធ្វើសកម្មភាពចាប់ទាញបុរសរងគ្រោះចេញពីក្នុងហាងកាហ្វេ ហើយរុញច្រានចូលទៅក្នុងរថយន្ត រួចបើករត់គេចខ្លួនភ្លាមៗ ចំណែកនារីជាសង្សាររបស់បុរសរងគ្រោះក៏បានខលទៅលេខប្រតិកម្មរហ័ស ១២៩១ ដើម្បីសុំការអន្តរាគមន៍ពីកម្លាំងអាវុធហត្ថ ប្រដេញតាមស្ទាក់ចាប់រថយន្ដខាងលើនេះបានភ្លាមៗ ទើបដឹងថា ជាករណីជួញដូរមនុស្ស ។
សេចក្តីរាយការណ៍បន្តថា ហេតុការណ៍ភ្ញាក់ផ្អើលខាងលើនេះដែរ បានកើតឡើងកាលពីវេលាម៉ោង៩និង៥០នាទីយប់ថ្ងៃទី២៩ ខែឧសភា ឆ្នាំ២០២២ នៅចំណុចស្តុបក្តាន់ពីរ តាមបណ្តោយមហាវិថីសហព័ន្ធរុស្ស៊ី ស្ថិតក្នុងសង្កាត់ស្រះចក ខណ្ឌដូនពេញ រាជធានីភ្នំពេញ ។
បើតាមប្រភពពីស្ត្រីជនជាតិខ្មែរដែលត្រូវជាគូរស្នេហ៍របស់បុរសរងគ្រោះជាជនជាតិចិន បានបង្ហើបប្រាប់អោយដឹងថា ករណីនេះមិនមែនជារឿងជំពាក់ប្រាក់ ដូចបុរសជាជនសង្ស័យទាំង៣នាក់នោះឆ្លើយប្រាប់សមត្ថកិច្ចឡើយ ។ ដំណើររឿង គឺបុរសជាគូររបស់គាត់ត្រូវបានចាញ់បោ.កថៅកែជាជនជាតិចិនរបស់គាត់ និងបានលក់គាត់ទៅអោយបុរសជាជនសង្ស័យទាំង៣នាក់នោះ ក្នុងតម្លៃ៣ម៉ឺនដុល្លារ (ដោយមិនច្បាស់ថា លក់ក្នុងគោលបំណងអ្វីទេ) និងមិនបានបញ្ជាក់ពីតាំងច្បាស់ឡើយ។
ស្ត្រីខាងលើបន្តថា បន្ទាប់ពីដឹងខ្លួនថា ត្រូវចាញ់បោ.កថៅកែ បុរសជនជាតិចិនជាជនរងគ្រោះបានលួចរត់គេចខ្លួនមួយរយៈពេលខ្លី តែក៏ត្រូវបុរសជាជនសង្ស័យទាំង៣នាក់នោះតាមរក និងប្រទះឃើញនៅម្តុំហាងកាហ្វេ Amazone ដែលមានទីតាំងនៅតាមបណ្តោយមហាវិថីព្រះស៊ីសុវត្ថិមាត់ទន្លេ សង្កាត់ជ័យជំនះ ខណ្ឌដូនពេញ ហើយក៏ធ្វើសកម្មភាពចុះចាប់គាត់ (បុរសរងគ្រោះជាជនជាតិចិន) ចេញពីក្នុងហាងកាហ្វេ និងរុញច្រានចូលទៅក្នុងរថយន្ត រួចបើករត់គេចខ្លួនផ្អើលប្រជាពលរដ្ឋនៅកន្លែងកើតហេតុ ហើយក៏រាយការណ៍ប្រាប់សមត្ថកិច្ចមូលដ្ឋានតែម្តង។
ប្រភពដដែលបន្តថា ភ្លាមៗនោះដែរ ស្ត្រីជនជាតិខ្មែរ (សង្សាររបស់ជនរងគ្រោះ) បានយកទូរស័ព្ទខលទៅលេខ ១២៩១ ដែរ ជាលេខប្រតិកម្មរហ័សរបស់អាវុធហត្ថរាជធានីភ្នំពេញ និងបានរាយការណ៍ប្រាប់ពីមូលហេតុ និងដំណើររឿង ដើម្បីសុំការអន្តរាគមន៍ពីកម្លាំងអាវុធហត្ថមូលដ្ឋានតែម្តង។ ហើយរូបនាងមិនស្គាល់ទីតាំងច្បាស់នោះទេ ក៏បានរាយការណ៍ប្រាប់ថា កើតហេតុក្នុងទឹកដីខណ្ឌចំការមន។
ភ្លាមៗនោះក្រោយពីទទួលបានព័ត៌មានស្ត្រីរងគ្រោះខាងលើ កម្លាំងប្រចាំបញ្ជារបស់អាវុធហត្ថរាជធានីភ្នំពេញ បានបញ្ជាកម្លាំងអាវុធហត្ថមូលដ្ឋានខណ្ឌចំការមន និងកម្លាំងអាវុធហត្ថមូលដ្ឋានខណ្ឌដូនពេញ សហការគ្នាប្រដេញតាមរក និងឃាត់រថយន្ដបង្កបាននៅចំណុចស្តុបក្តាន់ពីរ ហើយក៏បានឃាត់ខ្លួនបុរសជនជាតិចិនចំនួន០៣នាក់ (មិនទាន់ស្គាល់អត្តសញ្ញាណនោះទេ) រួមជាមួយនឹងរថយន្តមួយគ្រឿង ម៉ាក Alphard ពណ៌ខ្មៅ ពាក់ស្លាកលេខ ភ្នំពេញ 2BS-7188 នាំទៅកាន់មូលដ្ឋានកងរាជអាវុធហត្ថខណ្ឌចំការមន ដើម្បីសួរនាំ ។
បច្ចុប្បន្នជនសង្ស័យទាំង០៣នាក់ខាងលើ ត្រូវបានបញ្ជូនទៅកាន់ការិយាល័យស្រាវជ្រាវបទល្មើសព្រហ្មទណ្ឌ អាវុធហត្ថរាជធានីភ្នំពេញ ដើម្បីចាត់ការបន្តតាមនីតិវិធី។
ចែករំលែកព័តមាននេះ