តារាចាស់វស្សា ជា សំនៀង សម្តែងក្តីអស់សង្ឃឹមរឿងមួយពាក់ព័ន្ធនឹងការសម្តែង
- ភ្នំពេញ
តារាសម្តែងចាស់វស្សាលោក ជា សំនៀង បានថ្លែងសារអស់សង្ឃឹមត្បិតរូបលោក និងសិល្បករចាស់ៗមួយចំនួនទៀត ត្រូវបានផលិតករគេមើលរំលង ក្រោមហេតុផល
រាជធានីភ្នំពេញ ៖ តារាសម្តែងចាស់វស្សាលោក ជា សំនៀង បានថ្លែងសារអស់សង្ឃឹមត្បិតរូបលោក និងសិល្បករចាស់ៗមួយចំនួនទៀត ត្រូវបានផលិតករគេមើលរំលង ក្រោមហេតុផលតួចាស់ពិបាកធ្វើការជាមួយ។
ត្បិតលោកបានបង្ហាញវត្តមានសម្តែងជាបន្តបន្ទាប់នាពេលកន្លងមក ប៉ុន្តែមួយរយៈចុងក្រោយនេះ រូបលោក និងសិល្បករចាស់ៗមួយចំនួនទៀត ហាក់មិនត្រូវបានការហៅទៅថតរឿងថ្មីៗពីផលិតករនានាឡើយ។
យ៉ាងណា លោក ជា សំនៀង បានបង្ហាញពីហេតុផលមួយដែលធ្វើអោយរូបលោក និងសិល្បករចាស់ៗមួយចំនួនទៀត លេងមានឱកាសថតរឿងថ្មីៗបន្ថែមទៀត នោះគឺតួចាស់គេពិបាកធ្វើការជាមួយ។ ហេតុផលនេះ លោក ជា សំនៀង បានត្រឹមសម្តែងក្តីអស់សង្ឃឹម និងសោកស្តាយតែប៉ុណ្ណោះ បើទោះបីជាលោក និងសិល្បករចាស់ៗមួយចំនួនទៀត បានចំណាយពេលស្ទើរពេញមួយជីវិតលើវិស័យសិល្បៈនេះក៏ដោយ ប៉ុន្តែលទ្ធផល គឺមិនបានគាប់ប្រសើរទៅវិញ។
លោក ជា សំនៀង បានបង្ហោះសារតាមគណនេយ្យហ្វេសប៊ុករបស់លោកថា «ឱ! ជីវិតសិល្បករវ័យចំណាស់អើយ! ទោះបីយើងខំប្រាប់គេថា យើងនូវមានកម្លាំងអាចសម្តែងបាន ក៏គេនូវតែគិតថា… គាត់ចាស់ហើយ… ភ្លេចភ្លាំងច្រើន ពិបាកធ្វើការជាមួយណាស់! យកក្មេងៗធ្វើការលឿនចំណេញពេលវេលា ចំណេញថវិការ!»។
លោកបញ្ជាក់ថា «អញ្ចឹងសិល្បករចាស់ៗមានតែងើយមើលមេឃ ហើយសម្រក់ទឹកភ្នែកនឹកស្តាយពេលវេលាស្ទើរពេញមួយជីវិតដែលខំចំណាយលើវិថីសិល្បៈ ឯលទ្ធផលដែលទទួលបានមកវិញ គឺ… សេចក្តីអត់ឃ្លានយ៉ាងវេទនាបំផុត!»។
ទោះជាយ៉ាងណា ការលើកឡើងរបស់លោក ជា សំនៀង ខាងលើនេះ គ្រាន់តែជាហេតុផល និងជាការយល់ឃើញតែមួយជ្រុងសម្រាប់រូបលោកតែប៉ុណ្ណោះ ប៉ុន្តែធាតុពិតជាក់ស្តែងគេសង្កេតឃើញមានតារាចាស់ៗមួយចំនួន នៅតែបន្តវត្តមានសម្តែងជាបន្តបន្ទាប់ដដែល៕
ចែករំលែកព័តមាននេះ