រាជធានីភ្នំពេញ ៖ អ្នកនាង ធី សុវណ្ណថា ដែលសព្វថ្ងៃ ជាមន្ត្រីគណបក្សប្រជាជនកម្ពុជាមួយរូប បានផ្តាំទៅលោក សម រង្ស៊ី ថា បើ “គប់ស្បែកជើង ជាសិទ្ធបញ្ចេញមតិ” នោះពេលលោក សម រង្សី មានសំណាងត្រឡប់មកស្រុកខ្មែរ “ស្បែកជើងរាប់លាន នឹងហោះទៅបញ្ចេញមតិដាក់លោក សម រង្សី” ។
អ្នកនាង ធី សុវណ្ណថា បានបង្ហោះសារនៅព្រឹកថ្ងៃទី១៧ ឧសភា ២០២២ យ៉ាងដូច្នេះថា ៖ (សារផ្ញើជូនលោក អ៊ុក ទូច និងលោក សម រង្សី) លោក អ៊ុក ទូច គប់ស្បែកជើងដាក់សម្តេចតេជោ កំហុសធំនេះ នឹងធ្វើអោយលោកឈឺចាប់ផ្លូវចិត្តរហូតដល់ថ្ងៃស្លាប់ ខ្លួនលោក និងឆ្អឹងរបស់លោកមិនអាចត្រឡប់ចូលមាតុប្រទេសបានទេ បើលោកភ្ញាក់រលឹក ពេលនេះ ដឹងកំហុស លោកត្រូវសុំខមាទោស សម្តេចតេជោ និងត្រូវសុំទោសជនជាតិខ្មែរ ជាបន្ទាន់ ។
អ្នកនាង ធី សុវណ្ណថា បានបន្តថា លោក សម រង្សី (វិទ្យុបារាំង ១៦ ឧសភា ២០២២) និយាយថា ៖ “គប់ស្បែកជើង ជាសិទ្ធបញ្ចេញមតិ” ។ សូមលោកចាំចាំចាំ.. ពាក្យសម្តីរបស់លោក បើលោកមានសំណាងត្រឡប់មកស្រុកខ្មែរ “ស្បែកជើងរាប់លាន នឹងហោះទៅបញ្ចេញមតិ ដាក់លោក សម រង្សី” ។ លោក សម រង្សី មិនសមធ្វើអ្នកនយោបាយទេ លោកតែងគាំទ្រអំពើហិង្សា ញុះញង់អំពើហិង្សា និងតែងយកជីវិតប្រជាជនជាល្បែងនយោបាយ ។
អ្នកនាង បានបន្ថែមថា លោក សម រង្សី មិនសមជាពុទ្ធសាសនិកទេ ព្រះពុទ្ធទូន្មានអោយប្រកាន់ភ្ជាប់ធម៌អហិង្សា ប៉ុន្តែសម្តីរបស់លោកពោរពេញដោយហិង្សា សម្តីអ្នកនយោបាយមានឥទ្ធិពលណាស់ ខ្ញុំសុំអង្វរលោក កុំសាបព្រោះ ទ្រឹស្តីហិង្សា ប្រទេសកម្ពុជា កំសត់ណាស់ សង្គ្រាម៥០០ឆ្នាំ បាត់បង់ទឹកដី និងស្លាប់ប្រជាជនជាច្រើន.. ។ យុវជន និងប្រជាជន ត្រូវការសន្តិភាព យុវជន និងប្រជាជន មិនត្រូវការហិង្សាទេ ។
សូបបញ្ជាក់ថា ករណីគប់ស្បែកជើងលើសម្តេចតេជោ ហ៊ុន សែន បានបង្កឡើងដោយបុរសខ្មែរ-អាមេរិកាំងម្នាក់ ឈ្មោះ អ៊ុក ទូច បានយកស្បែកជើងរបស់គាត់គប់សំដៅទៅលើសម្តេចតេជោ ហ៊ុន សែន នៅក្នុងចំណោមក្រុមអ្នកគាំទ្ររាប់សិបនាក់ នៅឯរដ្ឋធានីវ៉ាស៊ីនតោន សហរដ្ឋអាមេរិក កាលពីថ្ងៃទី១២ ខែឧសភា ឆ្នាំ២០២២ នៅមុនពេលកិច្ចប្រជុំកំពូលពិសេស អាស៊ាន-អាមេរិក ។
ស្បែកជើងមួយចំហៀង មិនបានត្រូវចំសម្តេចនោះទេ ដោយហោះចំនឹងទូរសព្ទរបស់អ្នកគាំទ្រម្នាក់ ។ ក្នុងបទសម្ភាសជាមួយវិទ្យុអាស៊ីសេរី លោក អ៊ុក ទូច បានបញ្ជាក់ថា លោកមានបំណងគប់ស្បែកជើងលើសម្តេចតាំងពីសេអ៊ូល ប្រទេសកូរ៉េខាងត្បូង ដោយតាមរយៈការបន្លំខ្លួនជាអ្នកគាំទ្រ ប៉ុន្តែទោះជាយ៉ាងនេះក្តី លោកទទួលស្គាល់ថា សម្តេចមានបារមីចាំជួយ ដែលធ្វើឲ្យលោក មិនអាចគប់សម្តេចត្រូវបាន ។
ផ្ទុយទៅវិញ លោក សម រង្សី បានចាត់ទុកករណីគប់ស្បែកជើងនេះថា ជាសិទ្ធសេរីភាពបញ្ចេញមតិទៅវិញ ៕
ចែករំលែកព័តមាននេះ