រាជធានីភ្នំពេញ ៖ ខណៈដែលនៅក្នុងឃ្លាំងមានវ៉ាក់សាំងស្តុកជិត៩លានដូស សម្តេចតេជោ បានគូសបញ្ជាក់ថា ទោះបីជាប្រទេសកម្ពុជាក្រមែន តែមិនបណ្តោយឲ្យប្រជាពលរដ្ឋខ្វះវ៉ាក់សាំងចាក់នោះទេ ។ សម្តេចតេជោ ហ៊ុន…
រាជធានីភ្នំពេញ ៖ ខណៈដែលនៅក្នុងឃ្លាំងមានវ៉ាក់សាំងស្តុកជិត៩លានដូស សម្តេចតេជោ បានគូសបញ្ជាក់ថា ទោះបីជាប្រទេសកម្ពុជាក្រមែន តែមិនបណ្តោយឲ្យប្រជាពលរដ្ឋខ្វះវ៉ាក់សាំងចាក់នោះទេ ។
សម្តេចតេជោ ហ៊ុន សែន នាយករដ្ឋមន្ត្រីបានបញ្ជាក់ក្នុងពិធីសំណេះសំណាលជាមួយក្រុមគ្រូពេទ្យសម្តេចតេជោប្រឆាំងកូវីដ-១៩ នាព្រឹកថ្ងៃទី១៧ ខែឧសភានេះ នៅសាលពិព័រណ៍ជ្រោយចង្វា រាជធានីភ្នំពេញថា វ៉ាក់សាំងដែលកម្ពុជាបានទទួលរួចហើយ មានចំនួន ៥២.៨៣៥.៣៩១ ដូស និងបានយកទៅប្រើប្រាស់អស់ចំនួន៤២.៨៧១.៥៣៦ដូស នៅសល់ក្នុងឃ្លាំងមានចំនួន៩.៩៩៣.៨៥៤ដូស ។
ក្នុងចំនួនវ៉ាក់សាំងនេះអ្វីដែលមោទនភាពរបស់កម្ពុជាដែលបានទទួលវ៉ាក់សាំងទាំងមកពីមុន និងក្រោយនោះ គឺកម្ពុជាបានចំណាយថវិកាទិញវ៉ាក់សាំងចំនួនជា២៨លានដូស ។ អីញ្ចឹងកម្ពុជាមានសមត្ថភាពចាក់វ៉ាក់សាំងជូនប្រជាពលរដ្ឋដែលវ៉ាក់សាំងដែលទិញដោយថវិកាផ្ទាល់ខ្លួន គឺមានចំនួនច្រើនជាងការផ្តល់ជំនួយពីបណ្តាប្រទេសជាមិត្ត ។
សម្តេចបញ្ជាក់ថា ៖«ប្រទេសនេះក្រ ក៏ប៉ុន្តែមិនបណ្តោយឲ្យប្រជាពលរដ្ឋខ្វះថ្នាំចាក់នោះទេ ហើយអាចទិញរកបានហើយ ខ្ញុំបានប្រាប់ឯកឧត្តម វង្ស សីវិសុស្សថា ឲ្យចិនឆ្លើយតបថា លក់ គឺទិញភ្លាមបញ្ជូនលុយទៅភ្លាមទាំងលុយថ្លៃវ៉ាក់សាំង និងថ្លៃដឹកជញ្ជូន»។
សម្តេចបន្តថា ជាង២៨លានដូសហើយ ដែលកម្ពុជាយើងទិញខ្លួនឯង ហើយមានប្រទេសខ្លះមានលុយហើយមិនអាចទិញវ៉ាក់សាំងបានផងដែរ ។ ការដែលរកទិញវ៉ាក់សាំងមិនបានដោយសារតែខ្វះការធ្វើទំនាក់ទំនង ។
ក្នុងឱកាសនោះដែរ សម្តេចតេជោក៏បានឲ្យដឹងថា វ៉ាក់សាំងដែលមិនទាន់ដឹកមកដល់ប្រទេសកម្ពុជាមានជាង២០លាន៥សែន៥ម៉ឺនដូស ក្នុងនោះមានពីចិន៥លានដូស អាមេរិក ៧លាន៥សែន (មកដល់២លានដូស) និងប្រទេសមួយចំនួនទៀត ។ សម្តេចក៏បានលើកឡើងថាវ៉ាក់សាំងរបស់កម្ពុជានៅសល់ក្នុងស្តុកមានចំនួនជាង៩លានដូសទៀត ប៉ុន្តែធ្វើយ៉ាងណាចាក់វ៉ាក់សាំងនេះឲ្យអស់ ៕
ចែករំលែកព័តមាននេះ