រាជធានីភ្នំពេញ ៖ ក្រោយលិចលឺព័ត៌មានថា លោក ហួរ ហួត ដែលត្រូវបានគេស្គាល់ថា ជាចៅសង្កាត់ព្រែកប្រា បានព្យាយាមរត់គេចមិនព្រមចូលខ្លួនមកបំភ្លឺជូនសមត្ថកិច្ចតាមនីតិវិធី ពាក់ព័ន្ធនឹងការអំពើហិង្សាររបស់ខ្លួន ដែលបានវាយសន្តិសុខបុរី«សម្បត្តិមានហេង» អោយរងរបួសនោះ នៅវេលាព្រឹកថ្ងៃទី២៧ ខែតុលា ឆ្នាំ២០១៦នេះ រូបលោកបានចេញមុខបកស្រាយ ដោយសរសេរជាលាយល័ក្ខអក្សរ នៅលើទំព័រហ្វេសប៊ុកផ្ទាល់ខ្លួនថា លោកពុំបានព្យាយាមរត់គេចវេសចំពោះនីតិវិធីច្បាប់ឡើយ ហើយលោកក៏ពុំបានទុកជនរងគ្រោះចោលនោះដែរ ដោយលោក និងក្រុមគ្រួសារ បន្តតាមដានស្ថានភាពជម្ងឺ និងផ្តល់ការហូបចុកជាប្រចាំជូនជនរងគ្រោះមករហូត ។
លោក ហួរ ហួត បានបកស្រាយក្នុង Account ហ្វេសប៊ុក ផ្ទាល់ខ្លួនថា ៖ «ខ្ញុំបាទឈ្មោះ ហួរ ហួត សូមប្រកាសជូនបងប្អូន និងសាធារណជនថា ៖ ខ្ញំមិនបានគេចវេសចំពោះការទទួលខុសត្រូវណាមួយឡើយ ចំពោះករណីឧប្បទេ្ទវហេតុដែលបានកើតឡើងកាលពីវេលា ល្ងាចថ្ងៃទី២៤ ខែតុលា ឆ្នាំ២០១៦ ដែលខ្ញុំបានជ្រុលដៃវាយដោយអចេតនា នៅក្បែរផ្ទះរបស់ខ្ញុំ។ ខ្ញុំនឹងចូលបំភ្លឺគ្រប់នីតិវិធីរបស់តុលាការ ។
លោក ហួរ ហួត បន្តថា ខ្ញុំមិនដែលបោះបង់ចោល ឬទុកជនរងគ្រោះ (ឈ្មោះ មាស ដីដុំ) ចោលនោះទេ ខ្ញុំបានចាត់ចែងរួចហើយឲ្យសមាជិកគ្រួសាររបស់ខ្ញុំ ពាំនាំនឹងចូលរួមទទួល ខុសត្រូវលើការ ចំណាយថ្លៃព្យាបាល និងការហូបចុករបស់ជនរងគ្រោះ និងសាច់ញាតិរបស់គាត់ (ដូចក្នុងលិខិតខាងក្រោម) ។ ជាក់ស្តែងក្រុមគ្រួសារខ្ញុំបាន ឧបត្ថម្ភជាថវិកាដើម្បីព្យាបាល និងនៅជាប់ជានិច្ចមើលថែតាមដានអាការជំងឺរបស់ជនរងគ្រោះ ដោយយកចិត្តទុកដាក់ជាទីបំផុត។ (រូបខាងក្រោមជា ឪពុករបស់ខ្ញុំទៅមើលជនរងគ្រោះ)។
អនុញ្ញាតឲ្យខ្ញុំ នៅបន្តសម្តែងការសុំទោសយ៉ាងខ្លាំងជាទីបំផុត ចំពោះឧប្បទេ្ទវហេតុដែលបានកើតឡើង ដោយហេតុថានៅពេលនោះ ខ្ញុំមិនមានចេតនាណាមួយ ក្នុងការបង្កហេតុទេ។ ពិតណាស់ថា តាមគោលការណ៍ច្បាប់ឯកត្តកម្មនៃបទល្មើស គឺបុគ្គលជាអ្នកប្រព្រឹត្តជាអ្នកទទួលខុសត្រូវ ទៅតាមទំហំ និងកម្រិតដែលមានកំណត់ក្នុងច្បាប់។
សម្រាប់ខ្ញុំ ខ្ញុំគិតថា បទល្មើសនេះជាបទល្មើសមជ្ឈឹម។ ខ្ញុំសង្ឃឹមថា បងប្អូននឹងមិនធ្វើការបកស្រាយនូវសាររបស់ខ្ញុំ ធ្វើឲ្យជះឥទ្ធិពលទៅលើមជ្ឈដ្ឋានណាមួយឡើយ»។
សូមជំរាបថា យោងតាមរបាយការណ៍លោកគ្រូពេទ្យ សុខ សារិន នៅមន្ទីរពេទ្យបង្អែកមានជ័យ ដែលបានពិនិត្យស្ថានភាពជំងឺផ្ទាល់ សន្ដិសុខបុរី «សម្បតិ្ត មានហេង» ដែលត្រូវចៅសង្កាត់ព្រែប្រា លោក ហួរ ហូត ជ្រុលវាយមួយដៃបណ្ដាលឲ្យដួលនោះ គឺជនរងគ្រោះរូបនេះមានជំងឺចាស់ ហើយខ្សោយប្រព័ន្ធប្រសាទ។
ឆ្លើយតបទៅនឹងបញ្ហាខាងលើ កាលពីវេលារសៀលថ្ងៃទី២៦ ខែតុលា ឆ្នាំ២០១៦ម្សិលមិញនេះ ក្រុមគ្រូពេទ្យ នៃមន្ទីរពេទ្យបង្អែកមានជ័យ បានចេញលិខិតបញ្ជាក់មួយថា អក្ការៈរបួសរបស់សន្តិសុខខាងលើ គឺពុំមែនរងរបួសធ្ងន់ដោយសារ ការវាយរបស់លោកចៅសង្កាត់នោះទេ ដោយក្រុមគ្រូពេទ្យវាយតម្លៃជាជំហានដំបូងថា គឺបណ្តាលមកពី ជម្ងឺចាស់រើរឡើង ហើយខ្សោយប្រព័ន្ធប្រសាទ, ជាជំងឺខ្សោយ ជួបភាពភ័យស្លុត, ជាជំងឺតេតាណូស របួសសាច់ដុំ និងជាជំងឺខ្វះជាតិស្ករ និងកាល់ស្យូមក្នុងឈាម ។ ការវាយតម្លៃបែបនេះ គឺដោយសារ ក្រោយការពិនិត្យជំងឺ មុនពេលបញ្ជូនទៅមន្ទីរពេទ្យមិត្តភាពខ្មែរសូវៀត ក្រុមគ្រូពេទ្យប្រចាំការ មិនបានរកឃើញ មានដាច់ហូរឈាម បាក់ឆ្អឹង ជាំហើម លើករាងកាយ ជនរងគ្រោះនោះទេ ។
គួររំលឹកថា កាលពីវេលាម៉ោង១៧ និង៤៥នាទីល្ងាចថ្ងៃទី២៤ ខែតុលា ឆ្នាំ២០១៦ មានអំពើហិង្សារមួយបានកើតឡើង នៅចំណុចច្រកឃ្លោងទ្វារចូលបុរី សម្បត្តិមានហេង ស្ថិតក្នុងសង្កាត់និរោធ ខណ្ឌច្បារអំពៅ ដែលកើតឡើងដោយសារ ការទាស់ពាក្យសម្តីគ្នាតិចតួច ដោយសន្តិសុខបុរីខាងលើ បានដេញរថយន្តលោកចៅសង្កាត់ អោយបើកចេញទៅមុខបន្តិចព្រោះចតបែបនេះប៉ះពាល់ផ្លូវច្រកចូលបុរីម្ចាស់ខ្លួន ខណៈរថយន្តលោកចៅសង្កាត់ចតនៅមុខទ្វារផ្ទះរបស់ខ្លួនសោះ ធ្វើអោយលោកចៅសង្កាត់ដើរទៅសួរនាំ ស្រាប់តែមានសន្តិសុខ២នាក់ទៀតដើរមកក្បែរ និងនិយាយសម្តីខ្លាំងៗមកលើខ្លួន ដោយគិតថា សន្តិសុខទាំង២នាក់ប្រុងវាយមកលើខ្លួន ទើបលោកសម្រេចវាយ១ដៃ ទៅលើសន្តិសុខម្នាក់ ក្នុងចំណោម៣នាក់ ពេញទំហឹងផ្ទប់ទៅនឹងជញ្ជាំង រងរបួសសន្លប់ស្តូកស្តឹងតែម្តងទៅ ៕
ចែករំលែកព័តមាននេះ