រាជធានីភ្នំពេញ ៖ ជនសង្ស័យជាចោរគាស់ផ្ទះម្នាក់ ក្នុងពេលកន្លងមកធ្លាប់ធ្វើសកម្មភាព គាស់បន្ទប់ផ្ទះជួលមួយកន្លែង ស្ថិតក្នុងភូមិតាងួន សង្កាត់កាកាប ខណ្ឌពោធិ៍សែនជ័យ ហើយគាស់បានសម្រេចម្ដង យកបានលុយកាក់ និងរបស់របរមួយចំនួន រួចគេចខ្លួនបាត់ដោយ សុវត្ថិភាព។ លុះក្រោយមកញ៉ាម បានធ្វើសកម្មភាពគាស់បន្ទប់ផ្ទះជួលដដែលនោះទៀត ក្នុងខណៈដែលម្ចាស់មិននៅ ដើម្បីចូលលួចយកទ្រព្យសម្បត្តិទៀត។ ប៉ុន្តែលើកនេះប៉ះចំថ្ងៃស៊យ លួចយកបានតែទូរទស្សន៍មួយគ្រឿងប៉ុណ្ណោះ។
លុះពេលយកចេញ ត្រូវបានប្រជាពលរដ្ឋ ឃើញដេញចាប់បាន វាយទ្រមខ្លួនរួចប្រគល់ឲ្យនគរបាលនាំទៅសួរនាំ និងកសាងសំណុំរឿងបញ្ជូនទៅសាលាដំបូងរាជធានីភ្នំពេញ។ ជនសង្ស័យខាងលើឈ្មោះ ស៊ិន សុធីម អាយុ២១ឆ្នាំ ស្នាក់នៅបន្ទប់ភូមិចម្ការឪឡឹក សង្កាត់កាកាប និងមានស្រុកកំណើត នៅក្នុងភូមិព្រៃធំ ឃុំអង្គភ្នំតូច ស្រុកអង្គរជ័យ ខេត្តកំពត។ ក្រោយពេលត្រូវចាប់ខ្លួននាំទៅដល់ប៉ុស្ដិ៍នគរបាល ជនសង្ស័យនោះបានសារភាពថា ខ្លួនធ្លាប់បានធ្វើសកម្មភាពគាស់បន្ទប់ខាងលើនោះ បានសម្រេចចំនួន២ដងរួចមកហើយ គឺលើកទី១ លួចបានលុយនិង សម្ភារមួយចំនួនទៀត និងលើកទី២នេះ លួចបានទូរទស្សន៍ និងសម្ភារមួយចំនួន ពេលលើកយកចេញត្រូវបានអ្នកជិតខាងឃើញទាន់ស្រែកឆោរឡោក៏ចាប់ខ្លួនបានតែម្តង។
ប្រជាពលរដ្ឋបានឲ្យដឹងថា កន្លងមកនៅម្ដុំផ្ទះជួលខាងលើ តែងតែមានសកម្មភាពចោរគាស់ផ្ទះជាបន្តបន្ទាប់ ហើយបន្ទប់មួយនេះក៏ធ្លាប់រងគ្រោះម្ដងដែរ ក្នុងខណៈដែលម្ចាស់មិននៅ ជាប់រវល់ទៅធ្វើការ ហើយបិទទ្វារបន្ទប់ចាក់សោចោលនោះ។ ដោយសារតែបែបនេះទើប ពួកគាត់ដែលនៅផ្ទះបានឃ្លាំមើលពីសកម្មភាពចោរ លុះដល់វេលាកើតហេតុ ស្រាប់តែប្រទះឃើញជនសង្ស័យ ធ្វើសកម្មភាពគាស់សោបន្ទប់ នោះទៀតចូលលួចទ្រព្យសម្បត្តិ ទើបពួកគាត់ស្រែកឆោឡោ និងនាំគ្នាព័ទ្ធចាប់បានភ្លាមៗ រួចប្រគល់ឲ្យទៅនគរបាលប៉ុស្តិ៍កាកាបនាំទៅសួរនាំ ដើម្បីបញ្ជូនទៅសាលាដំបូងចាត់ការតាមផ្លូវច្បាប់៕
ចែករំលែកព័តមាននេះ