រាជធានីភ្នំពេញ ៖ ស្ថានីយ៍ប្រេងឥន្ទនៈមួយ បាននិងកំពុងសាងសង់នៅលើទីតាំងដីឡូតិ៍មួយកន្លែង ស្ថិតនៅចំណុចប្រសព្វផ្លូវលេខ ១៤៣ កែងផ្លូវលេខ ៣១០ ក្នុងសង្កាត់អូឡាំពិក ខណ្ឌចំការមន ត្រូវបានអ្នកជិតខាងប្តឹងមិនអោយមានការសាងសង់ តែពេលនេះ សំណង់ស្ថានីយ៍ ដែលគេដឹងថាមានក្មួយអ្នកធំម្នាក់រត់ការឲ្យនោះ បានសាងសង់ជិតរួចរាល់ជាស្ថាពរហើយ។
ប្រភពពីមន្ត្រីមូលដ្ឋានបានបង្ហើបអោយដឹងថា មូលហេតុដែលស្ថានីយ៍ប្រេងឥន្ទនៈខាងលើនេះអាចសាងសង់ឡើងបានជិតរួចរាល់គឺដោយសារមានការបើកភ្លើងខៀវពីសាលារាជធានីភ្នំពេញ។ មន្ត្រីមូលដ្ឋានដដែលបានបញ្ជាក់ថា ថ្នាក់មូលដ្ឋានបានចុះហត្ថលេខាលើឯកសារសុំច្បាប់សាងសង់បញ្ចូនទៅរួចរាល់ហើយ ដោយសារមានការឯកភាពនិង អនុញ្ញាតពីសាលារាជធានីភ្នំពេញ ប៉ុន្តែមិនដឹងថា ខាងក្រសួងពាក់ព័ន្ធ ឬក៏មន្ទីរជំនាញ ទទួលស្គាល់ផ្លូវច្បាប់ចំពោះសំណង់នេះដល់កម្រិតណានោះឡើយ ។
សូមបញ្ជាក់ថា កន្លងមកគេតែងលឺសូរ អភិបាលរាជធានីភ្នំពេញ បានចេញការព្រមានដាច់ខាត មិនអោយមានការសាងសង់ស្ថានីយ៍ប្រេងឥន្ទនៈក្នុងរាជធានីភ្នំពេញតទៅទៀតឡើយ តែប្រជាពលរដ្ឋឆ្ងល់ថា ហេតុអ្វីបានជាស្ថានីយ៍ប្រេងមួយកន្លែងនេះសង់ឡើងនៅលើទីតាំងគ្មានស្តង់ដារត្រឹមត្រូវតាមបទដ្ឋានបច្ចេកទេស បែរជាសាងសង់ដោយរលូនដូច្នេះ ?។
ប្រភពមួយទៀតពីមន្ត្រីតូចតាចមួយបានបង្ហើបដែរថា មូលហេតុដែលស្ថានីយ៍ប្រេងខាងលើ សាងសង់មិនខ្វល់ពីពាក្យបណ្តឹងអ្នកជិតខាងនោះ ព្រោះតែមានការបើកភ្លើងខៀវពីសាលារាជធានីភ្នំពេញ ។
ជុំវិញការចោទប្រកាន់នេះ អ្នកនាំពាក្យសាលារាជធានីភ្នំពេញ និងម្ចាស់សំណង់ស្ថានីយ៍ប្រេងឥន្ឋនៈខាងលើ ពុំអាចទំនាក់ទំនងសុំការបំភ្លឺបានឡើយ ។
ក្រុមប្រជាពលរដ្ឋដែលមានផ្ទះក្បែរស្ថានីយ៍ប្រេង ក៍ដូចជាអ្នកបច្ចេកទេសខាងសំណង់បានលើកឡើងថា សំណង់ស្ថានីយ៍ប្រេងដែលមានក្មួយអ្នកធំម្នាក់រត់ការច្បាប់នោះ គឺសំណង់នេះគ្មានលក្ខណៈបច្ចេកទេសស្តង់ដារត្រឹមត្រូវ ដោយទីតាំងតូចចង្អៀតធ្វើឲ្យអ្នករស់នៅជុំវិញមានការព្រួយបារម្ភខ្លាំងពីសុវត្ថិភាពទៅថ្ងៃមុខ ។ ម្យ៉ាងទៀត ស្ថានីយ៍ប្រេងដ៏រឹងមាំមួយនេះ បានសាងសង់រំលោភយកចំណីផ្លូវអ្នកស្រុកដើរចូលទៅក្រោយជិតកន្លះម៉ែត្រទៅហើយ តែអាជ្ញាមូលដ្ឋានបានត្រឹមសម្របសម្រួល មិនហ៊ានឃាត់តែម្តងសង្ស័យខ្លាចរបូតស័ក្តិពីស្មា ។
គួរបញ្ជាក់ថា នៅខណ្ឌចំការមន បាតុភាពរឿងសាងសង់ស្ថានីយ៍ប្រេងឥន្ធៈកើតមានស្ទើរគ្រប់សង្កាត់ ពិសេសសង្កាត់ផ្សារដើមថ្កូវ៕
ចែករំលែកព័តមាននេះ