ខេត្តព្រះសីហនុ ៖ សេចក្តីរាយការណ៍ឱ្យដឹងថា សាកសពជនបរទេសម្នាក់ ត្រូវគេប្រទះឃើញដេកស្លាប់នៅក្នុងថ្លុកទឹកក្បែរផ្លូវមួយកន្លែង កាលពីវេលាម៉ោង០៦ និង៣៥នាទីព្រឹកថ្ងៃទី១៣ តុលា ២០១៦ ស្ថិតនៅតាមបណ្តោយផ្លូវឆ្នេរអូរត្រះ១ ក្នុងភូមិ៦ សង្កាត់៤ក្រុងព្រះសីហនុ ខេត្តព្រះសីហនុ ។
យោងតាមប្រភពពីសមត្ថកិច្ចមូលដ្ឋានឱ្យដឹងថា សពឈ្មោះ JOHN WILLIAM CLEEREMAN សញ្ជាតិអាមេរិក ជាអ្នកទេសចរណ៍កាន់លិខិតឆ្លងដែនលេខ433002607 សុពលភាពថ្ងៃទី០៣ មីនា 2018 ( លិខិតឆ្លងដែនច្បាប់ដើម កំពុងស្រាវជ្រាវ ) ។
បើតាមការពិនិត្យថា៖ ជនរងគ្រោះអាចស្លាប់ដោយសារជំងឺគាំងបេះដូង ប៉ុន្តែទោះបីជាមានការអះអាងពីសមត្ថកិច្ច និងគ្រូពេទ្យយ៉ាងណាក៏ដោយ ក៏មតិពលរដ្ឋនៅក្បែរកន្លែងកើតហេតុ បានដាក់ការសង្ស័យថា អាចជាករណីឃាតកម្ម ព្រោះសាកសពស្លាប់នៅថ្លុកទឹកឆ្ងាយពីផ្លូវប្រមាណ៤ ទៅ៥ម៉ែត្រ ។ បើជិះកង់គាំងបេះដូង គឺប្រាកដជាសាកសពដួលនៅលើថ្នល់ ហើយម្យ៉ាងវិញទៀត ជនរងគ្រោះគ្មានរឿងអ្វីជិះកង់ហាត់ប្រាណទាំងកណ្តាលយប់នោះទេ ។
ទោះបីជាយ៉ាងណា ក៏ដោយនេះ គ្រាន់តែជាពាក្យចចាមអារ៉ាមតែប៉ុណ្ណោះ ឯរឿងយ៉ាងណានោះ គ្មាននណាម្នាក់អាចសន្និដ្ឋានក្រៅអំពីសមត្ថកិច្ច និងមន្ត្រីជំនាញបានទេ ។ បច្ចុប្បន្ន សាកសពត្រូវបានដឹកទៅរក្សាទុកនៅមន្ទីរពេទ្យបង្អែក ខេត្តព្រះសីហនុ រង់ចាំការសម្រេចពីក្រុមគ្រួសារ និងស្ថានទូត ។
ចែករំលែកព័តមាននេះ