រាជធានីភ្នំពេញ ៖ លោក កឹម សុខា ប្រធានស្តីទីគណបក្សសង្គ្រោះជាតិដែលកំពុងពូនសង្ងំនៅស្នាក់ការគណបក្សសង្គ្រោះជាតិ បានជួបពិភាក្សាពីបញ្ហានយោបាយសិទ្ធិមនុស្សបច្ចុប្បន្ននៅកម្ពុជាជាមួយលោកស្ត្រី រ៉ូណាស្មីត
រាជធានីភ្នំពេញ ៖ លោក កឹម សុខា ប្រធានស្តីទីគណបក្សសង្គ្រោះជាតិដែលកំពុងពូនសង្ងំនៅស្នាក់ការគណបក្សសង្គ្រោះជាតិ បានជួបពិភាក្សាពីបញ្ហានយោបាយសិទ្ធិមនុស្សបច្ចុប្បន្ននៅកម្ពុជាជាមួយលោកស្ត្រី រ៉ូណាស្មីត អ្នករាយការណ៍ពិសេសរបស់អង្គការសហប្រជាជាតិ ទទួលបន្ទុកសិទ្ធិនៅកម្ពុជា។
យោងតាមគេហទំព័រហ្វេសប៊ុកផ្ទាល់លោក កឹម សុខា បានសរសេរនាព្រឹកថ្ងៃទី១២ ខែតុលា ឆ្នាំ២០១៦ លោកបានជួបពិភាក្សាការងារជាមួយលោកស្ត្រី រ៉ូណាស្មីត ទីស្នាក់ការកណ្ដាលគណបក្សសង្គ្រោះជាតិ ដោយបានជជែកពីស្ថានការសិទ្ធិមនុស្ស និងនយោបាយនៅក្នុងប្រទេសកម្ពុជា។
លោកបញ្ជាក់ថា «បន្ទាប់ពីសួរសុខទុក្ខខ្ញុំផ្ទាល់ និងសម្ដែងពីការព្រួយបារម្ភអំពី ស្ថានភាពរំលោភសិទ្ធិមនុស្សនៅកម្ពុជាបច្ចុប្បន្ន» អ្នកស្រី រ៉ូណាស្មីត បានជជែកពិភាក្សាការងារយ៉ាងស៊ីជម្រៅជាមួយខ្ញុំអំពី ៖
ទី១-ស្ថានភាពនយោបាយបច្ចុប្បន្ន ។
ទី២-ស្ថានភាពច្បាប់ ទាក់ទងនឹងសកម្មជនថ្នាក់ដឹកនាំគណបក្សសង្គ្រោះជាតិ ជាពិសេសខ្លួនខ្ញុំផ្ទាល់។
ទី៣-គោលជំហរគណបក្សសង្គ្រោះជាតិ ចំពោះជាតិពន្ធុ (Stateless)។
លោកបានឲ្យដឹងទៀតថា ក្រោយពីការពិភាក្សាស្វែងយល់ពីគ្នាទៅវិញមកហើយ យើងបានប្ដេជ្ញាថា នឹងបន្ដទំនាក់ទំនងគ្នាទៀត ជាពិសេសដើម្បីស្វែងរកដំណោះស្រាយចំពោះបញ្ហារំលោភច្បាប់ និងរំលោភសិទ្ធិមនុស្សទាំងឡាយនៅកម្ពុជា។
គួរបញ្ជាក់ថា អ្នកស្រី រ៉ូណា ស្មីត (Rhona Smith) ជាអ្នករាយការណ៍ពិសេសរបស់អង្គការសហប្រជាជាតិ ស្ដីពី «ស្ថានភាពសិទ្ធិមនុស្សនៅកម្ពុជា» បានបំពេញទស្សនកិច្ចនៅក្នុង ប្រទេសកម្ពុជា ចាប់ពីថ្ងៃទី១០ ខែតុលា ដល់ថ្ងៃទី២០ ខែតុលា ដើម្បីពិនិត្យពីស្ថានភាពនយោបាយទូទៅ និងទិដ្ឋភាពផ្សេងនៅក្នុងប្រទេសកម្ពុជា ។
លោកស្ត្រីក៏បានជួបពិភាក្សាជាមួយថ្នាក់ដឹកនាំក្រសូងស្ថាប័នមួយ ព្រមទាំងថ្នាក់ដឹកនាំគណបក្សនយោបាយធំៗផងដែរ។ មុនបញ្ចប់ទស្សនកិច្ច លោកស្ត្រីនឹងធ្វើសន្និសីទសារព័ត៌មាននៅថ្ងៃទី១៩ ខែតុលា វេលាម៉ោង៣រសៀលនៅការិយាល័យ សិទ្ធិមនុស្សអង្គការសហប្រជាជាតិជុំវិញពីដំណើរទស្សនកិច្ចរបស់លោកស្ត្រីផងដែរ៕
ចែករំលែកព័តមាននេះ