ខេត្តបាត់ដំបង ៖ អគ្គិភ័យដែលម្ចាស់ផ្ទះមិនទាន់បង្ហាញហេតុផលច្បាស់លាស់ បានឆេះអស់នូវផ្ទះដ៏ធំមួយខ្នង រួមទាំងសម្ភារប្រើប្រាស់ជាច្រើនទៀត កាលពីវេលាម៉ោង៩និង១០នាទីយប់ថ្ងៃទី ២៧ មេសា នៅចំណុចភូមិតាសាញជើង ឃុំតាសាញ…
ខេត្តបាត់ដំបង ៖ អគ្គិភ័យដែលម្ចាស់ផ្ទះមិនទាន់បង្ហាញហេតុផលច្បាស់លាស់ បានឆេះអស់នូវផ្ទះដ៏ធំមួយខ្នង រួមទាំងសម្ភារប្រើប្រាស់ជាច្រើនទៀត កាលពីវេលាម៉ោង៩និង១០នាទីយប់ថ្ងៃទី ២៧ មេសា នៅចំណុចភូមិតាសាញជើង ឃុំតាសាញ ស្រុកសំឡូត តែពុំមានគ្រោះថ្នាក់ដល់មនុស្សទេ។ លំនៅឋានដែលក្លាយជាផេះ ដោយសារអគ្គិភ័យនោះ ធ្វើពីឈើប្រក់ក្បឿង មានទំហំ៩ម៉ែត្រ x ១២ម៉ែត្រ ម្ចាស់កម្មសិទ្ធិឈ្មោះ កង ប៉ុន ភេទប្រុស អាយុ៦៣ឆ្នាំ ជាកសិករ រស់នៅចំណុចកើតហេតុ ។
ពាក់ព័ន្ធនឹងករណីនេះ បើតាមយោងលើរបាយការណ៍សមត្ថកិច្ចបានឲ្យដឹងថា ម្ចាស់ផ្ទះហាក់មិនទាន់ដឹងអំពីមូលហេតុនៃការឆេះនេះឲ្យប្រាកដទេ តែគាត់បានវាយតំលៃព្រាវៗថា «អាចបណ្ដាលមកពីការទុស្សេខ្សែសូឡានៅលើដំបូងផ្ទះ»។ ប៉ុន្តែប្រភពដទៃបានអះអាងផ្ទុយពីម្ចាស់ផ្ទះថា ផ្ទាំងសូឡាមិនអាចទុស្សេទេ តែអាចបណ្ដាលមកពីការទុស្សេខ្សែភ្លើងច្រើនជាង ។
សមត្ថកិច្ចបានស្រង់សំដីម្ចាស់ផ្ទះទៀតថា អគ្គិភ័យនោះបានចាប់ផ្ដើមពីប៉ែកខាងលើដំបូលផ្ទះ ត្រង់ចំណុចផ្ទាំងសូឡា ហើយរាលដាលចុះមកក្រោយយ៉ាងឆាប់រហ័ស ដែលពិបាកក្នុងការទប់ស្កាត់ រហូតឆេះខ្ទេចឆេះខ្ទីអស់តែម្ដង។
ចំពោះតុល្យការនៃការខូចខាត យោងតាមរបាយការណ៏ដែលសមត្ថកិច្ចបានសួរនាំជនរងគ្រោះ គឺការខាតបង់រួមមាន ខ្សែកមាសទម្ងន់២,៥តំលឹង ខ្សែក០២ខ្សែ ចិញ្ចៀន០២វង់ ប្រាក់ចំនួន៣៥០០ដុល្លា ស្រូវ២៥ការ៉ុង គោយន្តកន្រ្តៃ០១គ្រឿង ត្រាត់ទ័រ០១គ្រឿងខូចខាតអស់១០% និងសម្ភារមួយចំនួនទៀត។ ប៉ុន្តែប៉ុន្តែយ៉ាងណា អគ្គិភ័យនេះបានបំផ្លាញតែទ្រព្យសម្បត្តិម្ចាស់ផ្ទះ តែមិនបង្កគ្រោះថ្នាក់ដល់មនុស្ស ឬលំនៅឋានអ្នកក្បែរខាងឡើយ ៕
ចែករំលែកព័តមាននេះ