មហោស្រពភាពយន្តខ្លីចតុមុខឆ្នាំនេះ ទាក់ទាញសមិទ្ធិករភាពយន្តកាន់តែច្រើន
- ភ្នំពេញ
មហោស្រពភាពយន្តខ្លីចតុមុខ (CSFF) បានបើកប្រកាសទទួលរឿងប្រកួត ដល់សមិទ្ធិកររឿងខ្លី ចាប់តាំងពីពាក់កណ្តាលខែមីនា នេះកន្លងទៅ។ មហោស្រពនេះ
មហោស្រពភាពយន្តខ្លីចតុមុខ (CSFF) បានបើកប្រកាសទទួលរឿងប្រកួត ដល់សមិទ្ធិកររឿងខ្លី ចាប់តាំងពីពាក់កណ្តាលខែមីនា នេះកន្លងទៅ។ មហោស្រពនេះ
រាជធានីភ្នំពេញ ៖ មហោស្រពភាពយន្តខ្លីចតុមុខ (CSFF) បានបើកប្រកាសទទួលរឿងប្រកួត ដល់សមិទ្ធិកររឿងខ្លី ចាប់តាំងពីពាក់កណ្តាលខែមីនា នេះកន្លងទៅ។ មហោស្រពនេះ នៅតែរាប់បញ្ចូលភាពយន្តខ្លីកម្ពុជា ដើម្បីលើកទឹកចិត្តដល់យុវសមិទ្ធិករ ឱ្យបង្ហាញទេពកោសល្យរបស់ខ្លួន។
មុននឹងឈានទៅដល់មហោស្រពធំ អ្នករៀបចំកម្មវិធី គឺ «ក្រុមភាពយន្តឈូករ័ត្ន» (Sunflower Film Alliance) បានរៀបចំ «កិច្ចស្វែងយល់ពីភាពយន្តចតុមុខ» (Chaktomuk Film Insight) ជាបន្តបន្ទាប់គ្នាបាន៤លើករួចមកហើយ ដោយនៅក្នុងនោះលើកទី១ថ្ងៃទី២០ ខែមីនា (អនឡាញ) លើកទី២ ថ្ងៃទី២៦ ខែមីនា នៅ «ផ្ទះមេត្តា» (Meta House) លើកទី៣ នៅថ្ងៃទី០៩ ខែមេសា (អនឡាញ) និងលើកទី៤ នៅថ្ងៃទី២៣ ខែមេសា នៅ Ikigai Arts Center។
បន្ទាប់ពីទស្សនាភាពយន្តខ្លីដែលសម្រិតសម្រាំងពីឆ្នាំមុន កម្មិវីធីនេះមានបើកវគ្គសំណួរចម្លើយរវាងសាធារណជន និងសមិទ្ធិករភាពយន្ត ក៏ដូចជាគណៈកម្មការមហោស្រព។ កិច្ចស្វែងយល់នេះ ក៏ជាកម្មវិធីមួយរៀបចំឡើងដើម្បីបញ្ជាក់ថា មហោស្រពភាពយន្តខ្លីចតុមុខឆ្នាំនេះ បានត្រឡប់មកវិញហើយ ដែលនឹងប្រារព្ធកម្មវិធីធំនាខែតុលានេះ។ រាល់លើកអនឡាញ គឺ CFI ទាក់ទាញទស្សនិកជនមិនតិចជាងពាន់នាក់ទេ រីឯដោយផ្ទាល់វិញ ក៏មិនតិចនាក់ដែរ ដែលជាកំណើនពហុគុណ ធៀបនឹងឆ្នាំមុនៗ។
លោក សុខ សុភក្ត្រ ជាប្រធានផ្នែកកម្មវិធីរបស់មហោស្រពឆ្នាំនេះ ឲ្យដឹងថា៖ «កិច្ចស្វែងយល់ភាពយន្តខ្លីចតុមុខ ពិតជាផ្តល់សារៈសំខាន់ចាំបាច់សម្រាប់យុវសមិទ្ធិករសិក្សាស្វែងយល់ បន្ថែមអំពីបច្ចេកទេសក្នុងការផលិតភាពយន្ត ការទស្សនាស្នាដៃ ជ័យលាភី ជាពិសេសមានឱកាសបានជួប និងសំណេះសំណាលផ្ទាល់ជាមួយអ្នកមានបទពិសោធន៍ ផលិតករ អ្នកដឹកនាំរឿង និងក្រុមការងារផ្សេងៗទៀត ដើម្បីជម្រុញការផលិតស្នាដៃរឿងខ្លីកាន់តែទាក់ទាញ និង មានគុណភាពដើម្បីអាចដាក់ ប្រកួតប្រជែងមហោស្រពភាពយន្តខ្លីចតុមុខដែលធ្វើឡើងជារៀងរាល់ឆ្នាំ ហើយក៏អាចក្លាយជាស្នាដៃមួយដែលអាចប្រកួតប្រជែង ក្នុងឆាកអន្តរជាតិផងដែរ»។
លោក ទី ទេពនិមល ជាជ័យលាភីប្រចាំឆ្នាំ២០២១ តាមរយៈរឿង «ប៉ាន់ក្រហម» ក៏បានលើកឡើងដែរថា៖ «មហោស្រពភាពយន្តខ្លី នៅក្រៅស្រុកមានច្រើនរាប់មិនអស់ តែនៅប្រទេសកម្ពុជា CSFF ជាមហោស្រពតែមួយគត់ដែលផ្តល់ឱកាសដល់ យុវសមិទ្ធិករដូចជាខ្ញុំ បង្ហាញស្នាដៃផ្ទាល់ខ្លូន និងការវាយតម្លៃជាទីទុកចិត្ត»។
ចំណែកកញ្ញា ថាស្រីនុត ជាមន្ត្រីនៅស្ថានទូជប៉ុន និងជាភ្ញៀវចូលរួមម្នាក់នៅ CFI លើកទី៤ ចូលរួមជាមតិថា៖ «កម្មវិធីនេះ រៀបចំបានល្អ ខ្ញុំចូលចិត្តជាងគេ គឺវគ្គសួរសំណួរ ព្រោះថា នាងខ្ញុំមានឱកាសសួរសំណួរដោយផ្ទាល់ជាមួយផលិតករ ក៏ដូចជាអ្នកនិពន្ធ ផងដែរ»។
ជាការកត់សម្គាល់ បន្ទាប់ពីចប់មហោស្រព នឹងបន្តយុទ្ធនាការរបស់ខ្លួននៅតាមរោងភាពយន្ត និងបណ្តាខេត្តមួយចំនួននៅខែឧសភា ខាងមុខនេះ ដោយរំពឹងថានឹងទាក់ទាញយុវសមិទ្ធិករពីទីតាំងទាំងនោះ ឱ្យដាក់រឿងរបស់ខ្លួន មក CSFFដែរ និងពង្រីកវិសាលភាព វិស័យភាពយន្ត តាមរយៈការទស្សនារឿងខ្លីៗ និងមានអត្ថន័យ។
សូមរំលឹកដែរថា ជ័យលាភីសម្រាប់ឆ្នាំ២០២២នេះ នឹងត្រូវបែងចែកយ៉ាងហោចជា៥ប្រភេទក្នុងនោះមាន ៖ ភាពយន្តខ្លីឆ្នើមរបស់កម្ពុជា (ដាក់ពិន្ទុដោយមេប្រយោគក្នុងស្រុក) ភាពយន្តខ្លីឆ្នើមបន្ទាប់របស់កម្ពុជា (ដាក់ពិន្ទុដោយមេប្រយោគក្នុងស្រុក) ភាពយន្តខ្លីឆ្នើមអន្តរជាតិ (ដាក់ពិន្ទុដោយមេប្រយោគអន្តរជាតិ) រង្វាន់ទស្សនិកជន ដល់ភាពយន្តខ្លីក្នុងស្រុក (តាមរយៈការបោះឆ្នោតពីទស្សនិកជន) រង្វាន់ទស្សនិកជន ដល់ភាពយន្តខ្លីអន្តរជាតិ (តាមរយៈការបោះឆ្នោតពីទស្សនិកជន)។
ក្រុមភាពយន្តឈូករ័ត្ន ឬ Sunflower Film Alliance ដំណើរការតាំងពីចុងឆ្នាំ២០១៧មក ចាត់ទុកជាក្រុមយុវជនក្រោម ការគ្រប់គ្រង ដោយអង្គការភាពយន្តឈូករ័ត្ន – Sunflower Film Organization – SFO ដែលចូលរួមដោយអ្នកស្ម័គ្រចិត្តជាច្រើនរូបទូទាំងប្រទេស កម្ពុជាដែលស្រឡាញ់ ជំនាញ ភាពយន្ត អាយុ ចន្លោះពី១៥ឆ្នាំដល់៣៥ឆ្នាំ។ អង្គការនេះផ្ទាល់ បានចុះឈ្មោះជាផ្លូវការ នៅក្រសួងមហាផ្ទៃ ជាអង្គការមិនរកប្រាក់ចំណេញ ។
ក្រុមភាពយន្តឈូករ័ត្នបានផលិតគម្រោងខ្លួនឯង និងសហផលិត តាំងពីចុងឆ្នាំ២០១៧ ដែលរួមមានកម្មវិធី «កុនខ្ញុំ» សម្រាប់ទូរទស្សន៍ជាតិកម្ពុជា (ទទក) កម្រងរឿងពី«គ្រួសារ» និងភាពយន្តខ្លីៗដូចជា រឿង “akumu” និងរឿងខ្លីៗមួយចំនួនទៀត។ តាំងពីឆ្នាំ ២០១៩ ក្រុមនេះក៏បានរៀបចំកម្មវិធី «តោះថតភាពយន្តឯកសារនៅកម្ពុជា» (Let’s Document Cambodia) ដោយបានបណ្តុះបណ្តាលយុវជននៅភ្នំពេញ និងតាមខេត្តនានាបានមិនតិចជាង២០០នាក់ទេ។
ក្រុមភាពយន្តឈូករ័ត្ន មានគោលដៅដ៏ចម្បង គឺចង់ឱ្យមានការយល់ដឹង កាន់តែទូលំទូលាយអំពីការផលិត ភាពយន្ត ដើម្បីកសាងឧស្សាហកម្ម ភាពយន្តកម្ពុជា ឱ្យរឹងមានដោយរៀបចំ វគ្គបណ្តុះបណ្តាលខ្លីៗ និងចាក់បង្ហាញស្នាដៃ តាមប្រព័ន្ធផ្សព្វផ្សាយនានា និងរោងភាពយន្ត ឬមហោស្រពនានា រួមទាំង មហោស្រពភាពយន្ត ខ្លីចតុមុខជា កម្មវិធីប្រចាំក្រុមដែរ ជាមួយសម្ព័ន្ធមិត្ត តាមបណ្តាខេត្តនៅកម្ពុជា ក៏ដូចជាដៃគូនៅ ក្រៅស្រុក ដើម្បីនាំស្នាដៃ យុវជនខ្មែរ ឱ្យមានការទទួលស្គាល់នៅលើឆាកអន្តរជាតិ៕
ចែករំលែកព័តមាននេះ