រាជធានីភ្នំពេញ ៖ កម្មវិធីប្រកួតជួញដូរភាគហ៊ុន ស៊ីអាយអិមប៊ី ប្រចាំតំបន់អាស៊ាន ឆ្នាំ២០១៦ (CIMB ASEAN Stock Challenge 2016) ជាព្រឹត្តិការណ៍ប្រឡងបែបទំនើប ដែលមានការប្រកួតប្រជែងកាន់តែខ្ពស់
រាជធានីភ្នំពេញ ៖ កម្មវិធីប្រកួតជួញដូរភាគហ៊ុន ស៊ីអាយអិមប៊ី ប្រចាំតំបន់អាស៊ាន ឆ្នាំ២០១៦ (CIMB ASEAN Stock Challenge 2016) ជាព្រឹត្តិការណ៍ប្រឡងបែបទំនើប ដែលមានការប្រកួតប្រជែងកាន់តែខ្ពស់ ដើម្បីស្វែងរកយុវជនវ័យក្មេងមានទេពកោសល្យក្នុងតំបន់អាស៊ានផ្នែកវិស័យជួញដូរភាគហ៊ុន ។ និស្សិតសាកលវិទ្យាល័យនៅក្នុងប្រទេសកម្ពុជា ម៉ាឡេស៊ី ឥណ្ឌូនេស៊ី សិង្ហបុរី និងថៃ មានសិទ្ធិដាក់ពាក្យចូលរួមកម្មវិធីប្រឡងជួញដូរមូលបត្រលើកទី៧នេះ ដែលមានប្រាក់រង្វាន់៣៨.០០០ដុល្លារអាមេរិក និងដំណើរកម្សាន្តទៅកាន់ផ្សារមូលបត្រហុងកុងផងដែរ ។ កម្មវិធីប្រកួតភាគហ៊ុនអាស៊ាន ដែលមានតែមួយនេះ អនុញ្ញាតឲ្យបេក្ខជនវ័យក្មេងជួញដូរនៅលើទីផ្សារភាគហ៊ុនធំៗទាំង៥ ក្នុងតំបន់ រួមមានផ្សារភាគហ៊ុនប៊ូរសាម៉ាឡេស៊ី (Bursa Malaysia) ផ្សារភាគហ៊ុនឥណ្ឌូណេស៊ី (IDX) ផ្សារភាគហ៊ុនសិង្ហបុរី (SGX) ផ្សារភាគហ៊ុនថៃ (SET) និងផ្សារភាគហ៊ុនហុងកុង (HKEx) ។
លោកស្រី អ៊ុំ ចិន្តាភក្តី នាយិកាធនធានមនុស្សរបស់ធនាគារ ស៊ីអាយអិមប៊ី នៅកម្ពុជា បានបញ្ជាក់ដែរថា ៖ «កម្មវិធីប្រកួតជួញដូរភាគហ៊ុនស៊ីអាយអិមប៊ី ប្រចាំតំបន់អាស៊ាន គឺជាឱកាសសំខាន់មួយសម្រាប់និស្សិតសាកលវិទ្យាល័យក្នុងប្រទេសកម្ពុជា បានចូលរួមដើម្បីបញ្ចេញសមត្ថភាពប្រកួតជាមួយនិស្សិតដែលមកពីបណ្តាប្រទេសក្នុងតំបន់អាស៊ានដូចជា ម៉ាឡេស៊ី ឥណ្ឌូណេស៊ី សិង្ហបុរី និងថៃ ធនាគារ ស៊ីអាយអិមប៊ី ពិតជាមានសេចក្តីសោមនស្សដែលបានចូលរួមក្នុងព្រឹត្តិការណ៍ដ៍មានសារសំខាន់នេះ ហើយពួកយើងមានមោទនភាពដែលក្រុមជើងឯកថ្នាក់ជាតិរបស់កម្ពុជា តែងតែទទួលបានលទ្ធផលល្អ គឺចំណាត់ថ្នាក់លេខ២ ប្រចាំតំបន់ ក្នុងកម្មវិធីប្រកួតនេះ ក្នុងឆ្នាំ២០១៤ និង២០១៥» ។
កម្មវិធីប្រកួតជួញដូរភាគហ៊ុនស៊ីអាយអិមប៊ី ប្រចាំតំបន់អាស៊ាន ឆ្នាំ២០១៦ គឺកាន់តែពិសេសពីឆ្នាំមុន។ សម្រាប់ថ្នាក់ជាតិ បេក្ខជនប្រឡងត្រូវប្រកួតប្រជែងគ្នានៅតាមប្រទេសរៀងៗខ្លួន ចាប់ពីថ្ងៃ១០ ដល់ ២៨ ខែតុលា ជាមួយសាច់ប្រាក់សរុប៨០.០០០ដុល្លារអាមេរិក សម្រាប់ការជួញដូរ ។ ហើយបីក្រុមដែលទទួលបានផលចំណេញវិនិយោគច្រើនជាងគេនៅពេលបញ្ចប់ការជួញដូរ នឹងត្រូវយកមកធ្វើការសម្រេចជាចុងក្រោយ ផ្អែកលើសំណេរយុទ្ធសាស្ត្ររបស់ពួកគេ ។ ក្រុមដែលមានសំណេរយុទ្ធសាស្ត្រល្អបំផុត នឹងក្លាយជាម្ចាស់ជើងឯកថ្នាក់ជាតិក្នុងប្រទេសរបស់ខ្លួន ។ ក្រុមជើងឯកចំណាត់ថ្នាក់លេខ១ នឹងទទួលបានប្រាក់រង្វាន់៨០០ដុល្លារអាមេរិក ចំណាត់ថ្នាក់លេខ២ ទទួលបាន៥០០ដុល្លារអាមេរិក និងចំណាត់ថ្នាក់លេខ៣ ទទួលបាន៤០០ដុល្លារអាមេរិក។ អ្នកជាប់ជ័យលាភីទាំងបីក្រុមនឹងមានឱកាសក្លាយជាបុគ្គលិកហាត់ការ នៅស៊ីអាយអិមប៊ី គ្រុប ទៀតផង ។
ក្រុមជើងឯកមកពីប្រទេសទាំង៥ នឹងមកប្រកួតគ្នាក្នុងប្រទេសសិង្ហបុរី នាខែមករា ឆ្នាំ២០១៧ ដើម្បីដណ្តើមជើងឯកថ្នាក់តំបន់។ ផលចំណេញពីការជួញដូររបស់ក្រុមជើងឯកថ្នាក់ជាតិ នឹងត្រូវយកមកកំណត់ពីកម្រិតល្អប្រសើរនៃការជួញដូរឆ្លើយតបនឹងពេលវេលា។ តាមរយៈលក្ខខណ្ឌនៃការប្រឡងក្រុមនីមួយៗនឹងទទួលបានប្រវត្តិទិន្នន័យនៃផ្សារភាគហ៊ុនទាំង៥ ដើម្បីវិភាគ និងជ្រើសរើសភាគហ៊ុនមួយដែលគិតថាអាចទទួលបានការចំណេញច្រើនបំផុត។ ជាលទ្ធផលក្រុមជើងឯកនឹងបានធ្វើដំណើរកម្សាន្តទៅកាន់ផ្សារភាគហ៊ុនហុងកុង ជាមួយប្រាក់រង្វាន់១២.០០០ដុល្លារអាមេរិក ហើយក្រុមជើងឯករងទទួលបាន៨.០០០ដុល្លារអាមេរិក ក្រុមលេខ៣ ទទួលបាន ៥.០០០ដុល្លារអាមេរិក ក្រុមលេខ៤ ទទួលបាន៣.០០០ដុល្លារអាមេរិក និងក្រុមលេខ៥ ទទួលបាន១.៥០០ដុល្លារអាមេរិក។
ចែករំលែកព័តមាននេះ