ខេត្តព្រះវិហារ ៖ ថ្លែងទៅកាន់និស្សិតនាយទាហានពូកែប្រចាំឆ្នាំសិក្សា ២០១៥-២០១៦ របស់វិទ្យាស្ថានទ័ពជើងគោក និងសាលានាយទាហានសកម្មត្មាតពងចំនួន១០០នាក់ លោកឧត្តមសេនីយ៍ឯក ហ៊ុន ម៉ាណែត បានមានប្រសាសន៍ថា អនាគតកងទ័ព គឺអាស្រ័យលើនាយទាហានជំនាន់ក្រោយ។ ជាក់ស្តែងនិស្សិតនាយទាហានទាំងអស់សុទ្ធតែបានរៀនពីទ្រឹស្តីកងទ័ពពីសាលា ហើយទស្សនកិច្ចនៅលើសមរភូមិមុខថ្ងៃនេះ គឺជាការផ្តល់ឱកាសឱ្យនិស្សិតនាយទាហានទាំងអស់បានស្វែងយល់បន្ថែមពីទ្រឹស្តីក្នុងសាលា និងការអនុវត្តជាក់ស្តែងនៅសមរភូមិមុខក្នុងការពង្រឹងរប្រៀបការពារជាតិ ការពារបូរណភាពទឹកដី តាមរយៈបទឧទ្ទេសនាមរបស់នាយទាហានជាន់ខ្ពស់ដើម្បីនឹងផ្តល់បទពិសោធន៍ជាក់ស្តែងក្នុងការបណ្តុះឆន្ទៈខ្ពស់ ស្មារតីក្លាហាន និងជំហរច្បាស់លាស់ដល់នាយទាហានជំនាន់ក្រោយ ដើម្បីការពារបូរណភាពទឹកដី ការពារជាតិ និងមាតុភូមិ ។
លោក ហ៊ុន ម៉ាណែត បានចែករំលែកបទពិសោធន៍ និងផ្តល់ដំបូន្មានល្អៗ និងលើកទឹកចិត្តនិស្សិតទាហានសកម្មទាំងអស់ឱ្យបន្តខិតខំរៀនសូត្រក្រេបយកចំណេះដឹង ទ្រឹស្តី និងការអនុវត្ត និងគោរពវិន័យឱ្យបានខ្ជាប់ខ្ជួន ដើម្បីក្លាយខ្លួនជានាយទាហានដ៏រឹងមាំ មានសមត្ថភាព និងការទទួលខុសត្រូវខ្ពស់សម្រាប់សង្គមជាតិ និងប្រជាជន។
តាមរបាយការណ៍បានឱ្យដឹងថា និស្សិតដែលទទួលចំណាត់ថ្នាក់ពីលេខ១ ដល់លេខ១០ គឺមានប្រចាំឆ្នាំ ប្រចាំឆមាសទី១ ប្រចាំឆមាសទី២ មានចំនួនសរុប១២២នាក់ ស្រី១៥នាក់ ហើយត្រូវបានទទួលអំណោយសម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត រួមមាននាឡិកាសម្តេច (សម្រាប់តែនិស្សិតនាយទាហានពីលេខ១ ដល់លេខ៣) ព្រមទាំងកាបូបយួរដៃ និងថវិកាមួយចំនួនទៀត។
ប្រធានគណៈកម្មការរៀបចំកម្មវិធីបានបន្ថែមទៀតថា ឆ្លើយតបទៅនឹងការយកចិត្តទុកដាក់ពីសំណាក់ប្រមុខរាជរដ្ឋាភិបាលកម្ពុជា និស្សិតនាយទាហានរបស់វិទ្យាស្ថានទ័ពជើងគោក និងសាលានាយទាហានសកម្មបានខិតខំយកអស់កម្លាំងចិត្ត និងរៀសូត្ររហូតមកដល់ពេលនេះទទួលបានលទ្ធផលល្អ និងបានចូលរួមគាំទ្រយ៉ាងមុះមុត និងស្មោះស្ម័គ្រនូវគោលនយោបាយដ៏ត្រឹមត្រូវក្រោមការដឹកនាំរបស់សម្តេចតេជោ ហ៊ុន សែន ដែលកន្លងមកនិងមកពេលបច្ចុប្បន្នបានធ្វើឱ្យប្រទេសជាតិទាំងមូលមានសុខសន្តិភាព ស្ថេរភាព និងការអភិវឌ្ឍឥតឈប់ឈរលើគ្រប់វិស័យ។
សូមបញ្ចាក់ថា ដំណើរទស្សនកិច្ចនៃនិស្សិតនាយទាហានវិទ្យាស្ថានទ័ពជើងគោក និងសាលានាយទាហានសកម្មត្មាតពង នៅតំបន់ប្រាសាទព្រះវិហារបានចាប់ផ្តើមពីថ្ងៃទី២៣ ដល់ថ្ងៃទី២៥ ខែកញ្ញា ឆ្នាំ២០១៦ ដែលឱ្យនិស្សិតនាយទាហានទាំងអស់បានទស្សនា និងស្វែងយល់នូវគោលដៅយុទ្ធសាស្ត្រសំខាន់មួយចំនួន ដូចជា ចំណុចតាថាវ ចំណុចប្រាំមករា ចំណុចពយតាឌី ទ្វារដែក វត្តកែវសិក្ខាគីរីស្វារៈ និងចំណុចសំខាន់ៗមួយចំនួនទៀត ព្រមទាំងបានធ្វើសកម្មភាពសំខាន់រួមមាន ការស្តាប់បឧទ្ទេសនាមពីសំណាក់នាយជាន់ខ្ពស់សំខាន់ៗ អ្នកតំណាងរាស្ត្រខេត្តព្រះវិហារ អាជ្ញាធរជាតិប្រាសាទព្រះវិហារ ពិធីសាសនា ការច្រៀងបទពង្សាវដាខ្មែរ និងសកម្មភាពសំខាន់ៗជាច្រើនប្រកបដោយបរិយាកាសស្និទ្ធិស្នាល និងសប្បាយរីករាយក្រៃលែង៕
ចែករំលែកព័តមាននេះ