រាជធានីភ្នំពេញ ៖ បើទោះបីជារហូតមកទល់ពេលនេះ ទាំង សូដា នីតា និងលោក យុទ្ធ ឋានះ បានរក្សាភាពស្ងៀមស្ងាត់ព្យាយាមមិនធ្វើការអធិប្បាយណាមួយជុំវិញជម្លោះគ្រួសារ រហូតឈានដល់ការប្រកាសលែងលះក៏ដោយ ប៉ុន្តែគិតមកដល់ពេលនេះ ទំនាក់ទំនងជាប្តីប្រពន្ធរបស់ពួកគេ ទំនងជាឈានដល់ការផ្សះផ្សារគ្នាឡើងវិញហើយ។
ការសន្និដ្ឋាននេះ ដោយផ្អែកទៅលើរូបភាពប៉ុន្មានសន្លឹកដែល សូដា នីតា និងលោក យុទ្ធ ឋានះ បានបង្ហោះកាលពីពេលថ្មីៗនេះ ក្នុងពេលដែលពួកគេបានធ្វើដំណើររួមគ្នា ជាមួយនឹងសាច់ញាតិគ្រួសារ និងកូនប្រុសរបស់ពួកគេទៅសែនផ្នូរនៅស្រុកកំណើត។
ទាំង សូដា នីតា និងលោក យុទ្ធ ឋានះ មិនបានសរសេរអ្វីជាការកត់សម្គាល់ភ្ជាប់ជាមួយនឹងរូបភាពដែលបានបង្ហោះនោះឡើយ ក្រៅពីសកម្មភាពសែនផ្នូរជាមួយសាច់ញាតិ និងកូនប្រុសដែលស្ថិតក្នុងសម្លៀកបំពាក់ដូចគ្នាស្របពេលជាមួយគ្នាក្នុងទីតាំងតែមួយ។
យ៉ាងណា បើទោះបីជាអ្នកទាំងពីរមិនបានបង្ហាញរូបភាពថតជុំគ្នាដូចមុនក៏ដោយ ប៉ុន្តែតាមរយៈសកម្មភាពទាំងនេះ អាចបញ្ជាក់ថា ទំនាក់ទំនងជាប្តីប្រពន្ធរបស់អ្នកទាំងពីរកំពុងឈានដល់ការផ្សះផ្សារជាថ្មីឡើងវិញ ពោលគឺអ្នកទាំងពីរមិនបានលែងលះគ្នាពិតប្រាកដដូចការប្រកាសរបស់ សូដា នីតា កាលពីពេលកន្លងទៅនោះឡើយ។
បន្ថែមលើសកម្មភាពខាងលើនេះ ក្រោយការប្រកាសពីការលែងលះ សូដា នីតា ក៏បានបង្ហោះពាក្យពេចន៍យ៉ាងចាក់ដោតដែរថា «មនុស្សតែងតែចឹង នៅពេលមនុស្សម្នាក់នៅមានជីវិតរស់នៅ គឺចង់ចាញ់ឈ្នះ យកត្រូវរៀងខ្លួន តែពេលដឹងថា មនុស្សម្នាក់ទៅបាត់ ហៅលែងលឺ ទើបនឹកឃើញអំពើល្អ ទង្វើររបស់មនុស្សម្នាក់នោះ សួរថា នឹកធ្វើអី? យំធ្វើអ្វី? ព្រោះអ្វីៗហួសអស់ហើយ ព្រោះទោះពិតខុសឬត្រូវ ក៏ម្នាក់នោះមិនអាចក្រោកមកអភ័យអោយអ្នកណាបានឡើយ»។
អ្វីដែលជាការកត់សម្គាល់ទៀតនោះ សូដា នីតា ក៏បានធ្វើការឆ្លើយតបជាមួយនឹងមិត្តភក្តិដែលបានសួរនាំពីបញ្ហាខាងលើនេះ តាមរយៈខំមិនពីក្រោមអ្វីដែលនាងបានសរសេរបង្ហោះនេះថា នេះពិតគ្រប់មនុស្សដែលមានរាល់ថ្ងៃសំរាប់បង បងគិតហើយ បងដាក់ចុះគ្រប់រឿង ព្រោះមិនចង់ខកចិត្តនៅពេលបាត់បង់អ្នកណាម្នាក់។ ចំណុចនេះមានន័យថា ទំនាក់ទំនងស្នេហាជាប្តីប្រពន្ធរបស់ សូដា នីតា និងលោក យុទ្ធ ឋានះ ទំនងជាអាចស្រុះស្រួលគ្នាឡើងវិញ ហើយ គ្រាន់តែអ្នកទាំងពីរព្យាយាមមិនធ្វើការបកស្រាយឲ្យមហាជនបានដឹង ខណៈពេលការផ្សះផ្សារគ្នាឡើងវិញនេះ ក៏ជាអ្វីដែលមិត្តភក្តិ ក៏ដូចជាប្រិយមិត្តគាំទ្ររបស់អ្នកទាំងពីរចង់ឃើញផងដែរ។
ជាការកត់សម្គាល់ កាលពីថ្ងៃទី២៩ ខែមីនា ឆ្នាំ២០២២ សូដា នីតា បានប្រកាសរឿងដ៏គួរឲ្យភ្ញាក់ផ្អើលមួយនៅលើបណ្តាញសង្គមហ្វេសប៊ុកថា ក្នុងមួយថ្ងៃនេះ នាងបានសំរេចបាន២រឿង ដោយទី១ សំរេចចិត្ត ទទួលជសស្ត្រីមេម៉ាយ (លែងលះ) និងទី២ សំរេចចិត្ត ឈប់ធ្វើការអោយគ្រុប តារាអ៊ិនធើថេន មែន៕
ចែករំលែកព័តមាននេះ