ខេត្តបាត់ដំបង ៖ បើតាមសេចក្តីរាយការណ៍បន្តថា ស្ត្រីម្នាក់ត្រូវបានសមត្ថកិច្ចឃាត់ខ្លួនភ្លាមៗ ក្រោយពីធ្វើការស្រាវជ្រាវរកឃើញថា ស្ត្រីរូបនេះជាអ្នកសម្លា.ប់កូនស្រីបង្កើតរបស់ខ្លួន ដែលទើបនឹងមានអាយុ១ខែ១០ថ្ងៃ ដោយបានបោះកូនស្រីតូចចូលទៅក្នុងទឹកប្រឡាយខាងក្រោយផ្ទះ ស្ថិតក្នុងភូមិព្រៃកូនសេក សង្កាត់អូរចា ក្រុងបាត់ដបង។
សេចក្ដីរាយការណ៍បានឲ្យដឹងថា ស្ត្រីរូបនេះ ត្រូវបានកម្លាំងនគរបាលក្រុងបាត់ដំបង ឃាត់ខ្លួននាំយកមកសាកសួរនៅវេលាម៉ោង៩ព្រឹក ថ្ងៃទី០២ ខែមេសា ឆ្នាំ២០២២ ក្រោយពីមន្ត្រីជំនាញរកឃើញទារិកាដ៏សត់នោះស្លា.ប់យ៉ាងរន្ធត់ ដោយអណ្ដែតក្នុងទឹកប្រឡាយខាងក្រោយក្បែរផ្ទះ។ ទារិកាទើបនឹងមានអាយុ១ខែ១០ថ្ងៃ ដែលត្រូវបានម្ដាយប្រល័យសង្ខាររូបនេះមានឈ្មោះ ងៀប កាន់យ៉ា រីឯម្ដាយវិញមានឈ្មោះ ហន សាមេន អាយុ២២ឆ្នាំ រស់នៅចំណុចភូមិ-ឃុំកើតហេតុខាងលើ។
សមត្ថកិច្ចបាននិយាយថា នៅព្រឹកថ្ងៃទី០២ ខែមេសា ស្ត្រីរូបនេះបានប្ដឹងទៅអាជ្ញាធរមូលដ្ឋានថា ខ្លួនបានបាត់កូនស្រីអាយុទើបជាង១ខែនោះពីក្នុងផ្ទះ ដោយមិនដឹងមូលហេតុ។ ហើយគេក៏បានផ្ដល់ដំណឹងនេះ បន្តទៅកាន់សមត្ថកិច្ច ដើម្បីឲ្យដឹង និងជួយអន្តរាគមន៍។ ភ្លាមៗនោះ ទាំងសមត្ថកិច្ច ទាំងប្រជាពលរដ្ឋ បាននាំគ្នាជួយស្វែងរក ស្រាប់តែគេប្រទះឃើញទារិកានោះ ស្លា.ប់អណ្ដែតទឹកប្រឡាយនៅខាងលិចផ្ទះ ទើបបង្កឱ្យមានការភ្ញាក់ផ្អើល និងចុះស្រង់យកស.ពទារិកាចេញពីក្នុងទឹក ដើម្បីពិនិត្យ។
សមត្ថកិច្ចបានបញ្ជាក់ថា ដោយមានការសង្ស័យពីភាពមិនប្រក្រតី នៃការស្លា.ប់របស់ទារិការូបនេះ ទើបសមត្ថកិច្ចសម្រេចនាំខ្លួនស្ត្រីជាម្ដាយទៅសួរនាំ។ ក្រោយពីមន្ត្រីជំនាញ ជជីកសួរនាំដល់ឬសគល់ ទើបបែកធ្លាយចម្លើយសារភាពនូវអំពើឃា.តក.ម្មទៅលើទារិកា ហើយឃាតក.រ គឺជាម្ដាយបង្កើតរបស់ទារិកាដ៏កំសត់រូបនេះតែម្ដង។
បើតាមសម្តីម្ដាយរបស់ទារិកាកំសត់ឈ្មោះ ហន សាមេន រូបនេះ បានរៀបរាប់គួរឲ្យស្រណោះ អំពីជីវភាពក្រលំបាកនៅក្នុងគ្រួសារ ដែលជាដើមចមនាំឲ្យមានចិត្តមួហ្មង ខឹងសម្បាជាមួយនឹងទារិកាអាយុទើបជាង១ខែ ដែលចេះតែស្រែកយំមិនឈប់ ខណៈប្រឈមនឹងការថែទាំកូនច្បងម្នាក់ទៀតដែលទើបមានអាយុជាង១ឆ្នាំផង ទើបសម្រេចបីកូនស្រីទាំងកំពុងស្រែកយំទៅបញ្ចប់ជីវិត ដោយប្រើវិធីបោះកូនស្រីចូលក្នុងទឹកប្រឡាយ មុនពេលព្រះអាទិត្យរះ។
ប្រភពដដែលបន្តថា គេមិនបាននិយាយអំពីប្ដីរបស់នាងម្នាក់នេះទេថា តើពេលនោះកំពុងនៅទីណា? ប៉ុន្តែបើតាមចម្លើយសារភាពរបស់ម្ដាយរូបនេះបានប្រាប់សមត្ថកិច្ចថា នៅយប់កើតហេតុនោះ ខ្លួននៅផ្ទះតែម្នាក់ឯងទេ។ ពេលនោះកូនស្រីរបស់ខ្លួនចេះតែស្រែកយំមិនឈប់សោះ ចាប់តាំងពីម៉ោងជាង៨យប់ ថ្ងៃទី០១ ខែមេសា រហូតដល់ម៉ោងជាង៤ទៀបភ្លឺ ថ្ងៃទី០២ ខែមេសា បើទោះជាប្រឹងលួងលោមយ៉ាងណា ក៏កូនស្រីតូចនេះមិនបាត់យំដែរ។
ស្ត្រីរូបនេះបានត្អូញត្អែរថា ដោយសារតែការហត់នឿយនឹងការមើលថែកូនស្រីស្រែកយំមិនឈប់នេះ រួមនឹងកូនច្បងអាយុទើបជាង១ឆ្នាំ ដោយគ្មានប្រាក់ទិញទឹកដោះគោឲ្យបៅទៀត។ ម្យ៉ាងទៀត នៅយប់នោះ ម្ដាយមីងក៏មិននៅ ជីដូនក៏មិននៅ នៅតែម្នាក់ឯង ក៏ចាប់ផ្ដើមខឹងសម្បាមួម៉ៅជាមួយនឹងកូនស្រីយំមិនឈប់ ទើបខ្លួនសម្រេចបីកូនស្រីអាយុជាង១ខែទៅបោះចូលក្នុងទឹកសម្លា.ប់ចោលនាវេលាទៀបភ្លឺ ថ្ងៃទី០២ ខែមេសា ដោយគ្មានស្រណោះបន្តិចឡើយ។
អ្នកភូមិក៏បាននិយាយដែរថា ក្រោយពីប្រព្រឹត្តនូវទង្វើអសីលធម៌ទៅលើកូនស្រីបែបនេះ ស្ត្រីជាម្តាយរូបនេះ បានដើរស្រែកប្រាប់គេឯងថា «កូនស្រីខ្លួនបានបាត់ពីផ្ទះ» ធ្វើឲ្យគេផ្អើលពេញភូមិតែម្តង ហើយក៏បានប្ដឹងទៅអាជ្ញាធរមូលដ្ឋានឲ្យជួយស្វែងរកកូនស្រីទៀតផង។
អ្នកភូមិបន្តថា ក្រោយពីទទួលដំណឹងនេះភ្លាម ទាំងអ្នកភូមិ ទាំងសមត្ថកិច្ច បាននាំគ្នាជួយស្វែងរកទារិការូបនោះ រហូតប្រទះឃើញស្លា.ប់អណ្ដែតក្នុងទឹកប្រឡាយ។ លុះពេលសមត្ថកិច្ចធ្វើការសួរនាំ ទើបដឹងថា ឃាតក.រសម្លា.ប់ទារិកាដ៏កំសត់រូបនោះ គឺជា «ម្ដាយបង្កើត» សោះ។
ហើយនៅចំពោះមុខសមត្ថកិច្ច ម្ដាយរូបនេះក៏បានសារភាពថា «ខ្លួនពិតជាបានសម្លា.ប់កូនស្រីខ្លួន ដោយបោះចូលទឹកប្រឡាយខាងលិចផ្ទះមែន»។ ជាមួយនឹងចម្លើយសារភាពនេះ មន្ត្រីជំនាញ អធិការក្រុងបាត់ដំបង បានទទួលបញ្ជាពីលោកស្នងការ និងតំណាងអយ្យការអមសាលាដំបូងខេត្តផង ឲ្យឃាត់ខ្លួនម្ដាយរូបនេះ ដើម្បីចាត់វិធានការតាមនីតិវិធីច្បាប់ហើយ៕
ចែករំលែកព័តមាននេះ