ខេត្តកំពង់ឆ្នាំង ៖ រហូតមកដល់ពេលនេះ ក្រុមហ៊ុនម៉ៅការសំណង់ធ្វើសាលារៀនមួយខ្នង ក្នុងសាលាបឋមសិក្សាស្មែត ពីក្រសួងអប់រំយុវជន និងកីឡា មិនទាន់បានប្រគល់ប្រាក់ឲ្យអ្នកម៉ៅការ
ខេត្តកំពង់ឆ្នាំង ៖ រហូតមកដល់ពេលនេះ ក្រុមហ៊ុនម៉ៅការសំណង់ធ្វើសាលារៀនមួយខ្នង ក្នុងសាលាបឋមសិក្សាស្មែត ពីក្រសួងអប់រំយុវជន និងកីឡា មិនទាន់បានប្រគល់ប្រាក់ឲ្យអ្នកម៉ៅការពលកម្មនៅឡើយទេ ទើបធ្វើឲ្យកម្មករជាង២០នាក់ ដាច់បាយជាបណ្តើរៗហើយ សូម្បីតែប្រាក់សម្រាប់ធ្វើដំណើរ ទៅចុះឈ្មោះ បោះឆ្នោតក៏គ្មានដែរ។
អាស្រ័យហេតុនេះ ទាំងកម្មករទាំងអ្នកម៉ៅការ អំពាវនាវឲ្យអាជ្ញាធរខេត្ត ក្រសួងអប់រំយុវជន និងកីឡា ពិសេសប្រមុខរាជរដ្ឋាភិបាល សូមជួយពួកគាត់ផង ព្រោះសាលារៀនធ្វើរួចជាង២ខែហើយ មិនឃើញប្រគល់ប្រាក់ឲ្យ។ ព័ត៌មាននេះ កោះសន្តិភាពធ្លាប់បានផ្សាយម្តងហើយ កាលពីពាក់កណ្តាលខែ សីហា តែដោយសារមិនទាន់មានដំណោះស្រាយ និងកម្មករទាំងនោះចេះតែលំបាកទៅៗ ទើបពួកគាត់សំណូមពរឲ្យផ្សាយម្តងទៀត។
នៅមុខសាសាដែលទើបសាងសង់រួច ក្រុមកម្មករទាំងនោះ បានរៀបរាប់ពីទុក្ខលំបាករបស់ខ្លួនថា ពួកគាត់មកធ្វើជាកម្មករ ពឹងលើប្រាក់ពលកម្មប្រចាំថ្ងៃ ខ្លះ១ថ្ងៃ១ម៉ឺន៨ពាន់ ខ្លះ២ម៉ឺន និងខ្លះទៀតច្រើនជាងនេះ ម្នាក់ៗត្រូវបានមេជាងសំណង់ជំពាក់ជាង២ខែហើយ បើគិតខ្លះជាង១លានរៀល ខ្លះទៀតជាង២លានរៀល។ ក្រុមកម្មករទាំងនោះភាគច្រើនជាស្ត្រីមេម៉ាយ ពួកគាត់កូន៣ ខ្លះកូន៥ ពឹងលើប្រាក់ពលកម្មប្រចាំថ្ងៃ តែដល់មេជាងជំពាក់ជាង២ខែ មិនសងចឹងគាត់រស់យ៉ាងម៉េច។
ចំណែកបុរសម្នាក់ជាអ្នកដឹកខ្សាច់និយាយថា មេជាងបានជំពាក់ប្រាក់ដឹកខ្សាច់គាត់ជាង៤០០ដុល្លា ជាង២ខែហើយ មិនទាន់សង នេះដោយសារតែខាងក្រុមហ៊ុនម៉ៅការសំណង់មិនទម្លាក់ប្រាក់ឲ្យមេជាង។ បុរសជាមេជាងសំណងឈ្មោះ ម៉ិល សារ៉េត អាយុ៣៨ឆ្នាំ មានទីលំនៅភូមិទួលទ្រា ឃុំស្វាយជ្រុំ ស្រុករលាប្អៀរ បាននិយាយឲ្យដឹងថា គាត់បានទទួលម៉ៅការថ្លៃពលកម្មធ្វើសាលាមួយខ្នងមាន៥បន្ទប់ និងបន្ទប់ ទឹក១ខ្នង មាន៤បន្ទប់ នៅក្នុងសាលាបឋមសិក្សាស្មែតនេះពីឈ្មោះ វុទ្ធី ដែលគាត់បានទទួលម៉ៅការផ្ទាល់ពីក្រុមហ៊ុន តាន់ គីមអេង ក្នុងតម្លៃ១០.៥០០ដុល្លា ជាថ្លៃពលកម្មសុទ្ធ ចំណែកសម្ភារសាងសង់លើឈ្មោះ វុទ្ធី និងក្រុមហ៊ុន។
គាត់បានចូលធ្វើនៅថ្ងៃទី១១ ខែវិឆ្ឆិកា ឆ្នាំ២០១៥ និងបានធ្វើរួចរាល់នៅថ្ងៃទី០៥ ខែកក្កដា ២០១៦។ ក្នុងពេលកំពុងសាងសង់ គាត់បានបើកប្រាក់ពីក្រុមហ៊ុនជាបន្តបន្ទាប់បានចំនួនតែជាង៥ពាន់ដុល្លាតែប៉ុណ្ណោះ នៅសល់ជាង៥ពាន់ដុល្លាទៀត ដែលខាងលោក វុទ្ធី និងក្រុមហ៊ុនមិនទាន់បើកមកឲ្យ។ គាត់បានបញ្ចាក់ថា សាលារៀនធ្វើរួចជាង២ខែហើយ តែខាងក្រុមហ៊ុនមិនត្រឹមតែមិនទម្លាក់ប្រាក់ជំពាក់ថ្លៃពលកម្ម ៥.១០០ដុល្លា ប៉ុណ្ណោះទេ ថែមទាំងឲ្យគាត់ទៅជឿក្តារពុម្ភ ជឿខ្សាច់ និងជឿ សម្ភារផ្សេងៗជាដើម ដែលក្រុមហ៊ុនបានសងខ្លះ និងនៅជំពាក់ខ្លះមិនទាន់សងគេនៅឡើយ។
ដោយសារតែការទៅជឿក្តារពុម្ភ គេមិនឲ្យប្រាក់នេះហើយ ទើបម្ចាស់ក្តាពុម្ភ គេមកកាត់ម៉ូតូគាត់អស់ពីរគ្រឿង។ ពួកគាត់ជាកម្មកករ ក៏ដូចជាមេជាង បានសំណូមពរដល់អាជ្ញាធរខេត្ត ក្រសួងអប់រំយុវជន និងកីឡា ពិសេសប្រមុខរាជរដ្ឋាភិបាល សូមមេត្តាជួយជម្រុញឲ្យក្រុមហ៊ុន តាន់ គីមអេង ប្រញាប់ទម្លាក់ប្រាក់មកឲ្យមេជាង ដើម្បីបានបើកឲ្យកម្មករទាំងអស់នោះផង។ ជុំវិញការចោទប្រកាន់ខាងលើ មេការក្រុមហ៊ុន តាន់ គីមអេង បានប្រាប់តាមទូរសព្ទ័ថា បញ្ហានេះ គឺដោយសារការងារនេះមានកិច្ចសន្យាគ្នាពេលធ្វើហើយខាងក្រសួងចុះទៅមើលសិន ដូចជាមើលគុណភាព មើលសំណង់ ជាដើម តើត្រឹមត្រូវតាមបទដ្ឋានដែរអត់ បើមានខ្វះ ត្រូវឲ្យគាត់ធ្វើបន្ត
។ រឿងថាធ្វើហើយ គឺគាត់ថា ខ្លួនគាត់ តែចំពោះយើងត្រូវទៅពិនិត្យសិន។ នៅសល់តែប៉ុន្មានថ្ងៃទៀត គេនឹងចុះទៅមើលហើយ ចំពោះប្រាក់វិញមិនសល់ច្រើនប៉ុន្មាននោះទេ ទោះគាត់ថាច្រើន តែចាំដល់ពេលគិតបញ្ជីដឹងហើយ។ ទោះយ៉ាងណា ក្រុមកម្មករទាំងនោះបានបញ្ជាក់ថា ដល់ខែភ្ជុំបិណ្ឌ ស្អែក ខានស្អែក នេះហើយ ពួកគាត់គ្មានប្រាក់ធ្វើបុណ្យទេ យ៉ាងណាឲ្យឆាប់បើកបានមុនបុណ្យកាន់បិណ្ឌផង៕
ចែករំលែកព័តមាននេះ