ប្រជាពលរដ្ឋជាង១០០គ្រួសារ សុំអន្តរាគមន៍ពីសម្តេចតេជោ
ខេត្តស្វាយរៀង ៖ មានប្រជាពលរដ្ឋជាង១០០នាក់ តំណាងឲ្យប្រជាពលរដ្ឋរងគ្រោះក្នុងភូមិចំនួន០៣គឺ ភូមិត្បែង ភូមិគុម្ពោតទូក និងភូមិសង្គម ឃុំគគីរសោមស្រុកស្វាយទាប បានមកជួបជុំគ្នា
ខេត្តស្វាយរៀង ៖ មានប្រជាពលរដ្ឋជាង១០០នាក់ តំណាងឲ្យប្រជាពលរដ្ឋរងគ្រោះក្នុងភូមិចំនួន០៣គឺ ភូមិត្បែង ភូមិគុម្ពោតទូក និងភូមិសង្គម ឃុំគគីរសោមស្រុកស្វាយទាប បានមកជួបជុំគ្នាសំពះសុំឲ្យសម្តេចអគ្គមហាសេនាបតីតេជោ ហ៊ុនសែន នាយករដ្ឋមន្ត្រីនៃព្រះរាជាណាចក្រកម្ពុជា ជួយអន្តរាគមន៍រកយុត្តិធម៌ ដោយចោទថា មានក្រុមហ៊ុនវៀតណាម ជីកប្រឡាយលើកអាចម៍ដីចាក់ធ្វើថ្នល់ រំលោភដីស្រែ និងចាក់ដីលុបលើស្រូវរបស់ប្រជាពលរដ្ឋ បណ្តាលឲ្យខូចខាតស្រូវរបស់ប្រជាពលរដ្ឋ០៣ភូមិ ហើយគ្មានអាជ្ញាធរណាដោះស្រាយឡើយ។
ករណីប្រជាពលរដ្ឋរកបទអន្តរាគមន៍ពីសម្តេចហ៊ុនសែននេះ កើតឡើងកាលពីវេលាម៉ោង១០និង០០ព្រឹក ថ្ងៃទី២៨ ខែសីហា ឆ្នាំ២០១៦ នៅចំណុចភូមិសង្គម ឃុំគគីរសោម ស្រុកស្វាយទាប។បើតាមឈ្មោះ ឃួន មុនីលក្ខ័ ភេទស្រី អាយុ៣៣ឆ្នាំ នៅភូមិសង្គម ឃុំគគីរសោម បានឲ្យដឹងថា មានក្រុមហ៊ុនវៀតណាម បានយកគ្រឿងចក្រមកជីកប្រឡាយ បង្ហូទឹក និងចាក់ដី លើកធ្វើថ្នល់ដឹកអំពៅ ធ្វើឲ្យប៉ះពាល់ដល់ប្រជាពលរដ្ឋចំនួន០៣ភូមិគឺ ភូមិត្បែង ភូមិគម្ពោតទូក និងភូមិសង្គម ឃុំគគីសោម ទី១. ការជីកប្រឡាយបានប៉ះពាល់ដីស្រែរបស់ប្រជាពលរដ្ឋ ដោយក្រុមហ៊ុនយកអាចម៍ដីចាក់លុបស្រូវពង្រោះរបស់ពួកគាត់អស់ផ្ទៃដីសរុប ទទឹង៩ម៉ែត្រ បណ្តោយជាង៤.០០០ ម៉ែត្រ ទី២.ខូចស្រូវប្រជាពលរដ្ឋរាប់ពាន់ហិកតា ដោយរីងគោកទឹកក្នុងស្រែ មូលហេតុ ហូរទឹកចេញពីស្រែចូលប្រឡាយដែលក្រុមហ៊ុនវៀតណាមជីក បង្ហូរទឹកទៅប្រទេសវៀតណាមអស់។
ទី៣.ជីប្រឡាយកាត់ផ្លូវគោក្របី និងផ្លូវប្រជាពលរដ្ឋទៅធ្វើស្រែ មិនដាក់លូ ធ្វើផ្លូវឲ្យប្រជាពលរដ្ឋវិញ។ បើតាមស្ត្រីម្នាក់ឈ្មោះ សាន ចន្ថា អាយុ៣៣ឆ្នាំ នៅភូមិគម្ពោតទូក ឃុំគគីរសោមតំណាងឲ្យប្រជាពលរដ្ឋ៣ភូមិខាងលើ បានសំណូមពរដល់សម្តេចអគ្គមហាសេនាបតីតេជោហ៊ុនសែនមេត្តាជួយអន្តរាគមន៍ឲ្យក្រុមហ៊ុនសងសំណងផល់ប៉ះពាល់ដល់ប្រជាពលរដ្ឋរងគ្រោះ។ ១.សងសំណងកាខូចខាតស្រូវពង្រោះ ២.សងសំណងថ្លៃដីស្រែ ដែលក្រុមហ៊ុនចាក់ដីរំលោភយកតាមតម្លៃទីផ្សារ៣.ធ្វើទ្វារទឹក បិទទឹកទុកក្នុងប្រឡាយសម្រាប់ប្រជាពលរដ្ឋប្រើប្រាស់ និងដើម្បីកុំឲ្យទឹកហូរចេញពីស្រែគោកទឹកងាប់ស្រូវ ៤.ដាក់លូ កាត់ប្រឡាយតាមផ្លូវចាស់ (៥០០ម៉ែត្រដាក់លូមួយ) ដើម្បីប្រជាពលរដ្ឋឆ្លងកាត់ទៅធ្វើស្រែ និងយកគោក្របីទៅឃ្វាល។
បើតាមមន្ត្រីមូលដ្ឋានម្នាក់សុំមិនបញ្ចេញឈ្មោះបានបង្ហើបឲ្យដឹងថា មូលហេតុក្រុមហ៊ុនវៀតណាម ជីកប្រឡាយនេះ គឺដើម្បីបង្ហូទឹកចេញពីចម្ការអំពៅ និងចាក់ដីធ្វើថ្នល់ដឹកកសិផលអំពៅទៅប្រទេសវៀតណាម។ ប្រភពដដែលបន្តទៀតថា ក្រុមហ៊ុនលោក កុយ សារ៉េន មុខងារជាស្មៀនឃុំពពែត បានប្រមូលជួលដីពីប្រជាពលរដ្ឋក្នុងឃុំគគីរសោម ឃុំព្រៃតាអី និងឃុំមនោរម្យ ស្រុកស្វាយទាប រាប់ពាន់ហិកតាក្នុង១ហិកតាតម្លៃ២០០ដុល្លា ហើយបានយកដីទាំងនោះទៅជួលបន្តឲ្យទៅក្រុមហ៊ុនវៀតណាមក្នុង១ហិតា ៥០០ដុល្លារក្នុងមួយឆ្នាំ ដោយកុងត្រារយៈពេល៣ឆ្នាំគិតចាប់ពីឆ្នាំ២០១៦ ដល់ឆ្នាំ២០១៨។
ហើយកាជីប្រឡាយនេះគឺ ជីកចាប់ពីភូមិព្រៃតាអី ឃុំព្រៃតាអី កាត់តាមភូមិត្បែង ភូមិសង្គម និងភូមិគម្ពោតទូក ប្រវែង៧គីឡូម៉ែត្រដល់ព្រំដែនកម្ពុជា វៀតណាម ចំណុចបង្គោលសីមា ព្រំដែនលេខ១៥៤។ហើយបះពាល់ដីស្រែ និងស្រូវពង្រោះរបស់ប្រជាពលរដ្ឋ គឺទទឹង៩ម៉ែត្របណ្តោយ ប្រមាណជាង៤ពាន់ម៉ែត្រ។ទាក់ទិនករណីប្រជាពលរដ្ឋចោទថាមានជួលដីឲ្យយួននេះដែរ លោក កុយ សារ៉េន ប្រធានក្រុមហ៊ុន ស្រែទិសខាងកើតត្រូវបានអភិវឌ្ឍន៍(EASTERN RiCE FiELD DEVELOPMENT COL .TD)បានអះអាងថា គឺគ្មានជួលដីឲ្យវៀតណាមទេ គ្រាន់តែធ្វើវិនិយោគទុនជាមួយក្រុមហ៊ុនវៀតណាម និងយកមន្ត្រីជំនាញបច្ចេកទេសធ្វើការ។
ហើយពាក់ព័ន្ធករណី ជីកប្រឡាយនេះគឺលោកបានសុំទៅអាជ្ញាធរ ឃុំស្រុកនិងបានប្រជុំផ្សព្វផ្សាយដល់ប្រជាពលរដ្ឋដែរ សុំស្តារប្រឡាយចាស់ ប្រជាពលរដ្ឋក៏បានយល់ព្រម ហើយ គោលបំណងជីកប្រឡាយ ១.យកទឹក សម្រាប់ឲ្យប្រជាកសិករប្រើប្រាស់បូមទឹកដាក់ស្រូវ ពេលមានភាពរាំងស្ងួត និងបង្ហូទឹកចេញពីចម្ការអំពៅ ពេលមានទឹកជំនន់។ ២.ធ្វើផ្លូវថ្នល់ ដើម្បីឲ្យប្រជាពលរដ្ឋធ្វើដំណើរងាយស្រួល។ ចំពោះផលប៉ះពាល់ ហូរទឹកចេញពីស្រែចូលប្រឡាយ ក្រុមហ៊ុនបានឲ្យទប់ទឹកប្រឡាយនោះហើយ។
ផលប៉ះពាល់ការចាក់ដីលើស្រូវពង្រោះរបស់ប្រជាពលរដ្ឋនោះ លោកបានចេញសំណងថ្លៃស្រូវពូជ តាមគ្រួសារប៉ះពាល់ ខ្លះ៥សែនរៀលខ្លះ៣សែនរៀល និងកំពុងពិនិត្យគ្រួសារដែលប៉ះពាល់បន្តទៀត ហើយចំពោះប្រជាពលរដ្ឋទាមទារថ្លៃដីក្រុមហ៊ុនមិនអាចមានលទ្ធភាពចេញសំណងបានឡើយ។ លោក កុយ សារ៉េន បន្តទៀតថា ក្រុមហ៊ុនEASTERN RiCE FiELD DEVELOPMENT COL .TD បានវិនិយោគជួលដីប្រជាពលរដ្ឋដាំដំណាំអំពៅ ចំនួន២ ៣៨៣ហិកតា និងបានផ្តល់ការងារឲ្យប្រជាពលរដ្ឋធ្វើការជាច្រើនដែរ។
ទាក់ទិនការជីកប្រឡាយនេះដែរលោក ថាច់ រតនា ប្រធានមន្ទីរកសិកម្មរុក្ខាប្រមាញ់និងនេសាទខេត្តបានចុះទៅពិនិត្យកាលពីថ្ងៃទី២៥ សីហា ២០១៦បានមានប្រសាសន៍ថា ប្រឡាយនេះបើគ្មានទ្វារបិទបើកទេគឺហូរទឹកចេញពីស្រែប្រជាពលរដ្ឋអស់ អាចខូចស្រូវច្រើនហិកតា ចំណែកអំពៅលិចទឹកមិនខូចទេ៕
ចែករំលែកព័តមាននេះ