រាជធានីភ្នំពេញ៖ សេចក្តីរាយការណ៍បឋមឱ្យដឹងថា នាព្រឹកថ្ងៃទី១៦ សីហា ២០១៦ នេះ នៅសាលារាជធានីភ្នំពេញ មានរៀបចំពិធីប្រគល់រថយន្តស៊េរីទំនើបៗចំនួន៣គ្រឿងទៀត ក្នុងនោះមានរថយន្តសង្គ្រោះបន្ទាន់២គ្រឿង និងរថយន្តដឹកទំនិញ១គ្រឿង ជូនដល់លោកអាចារ្យអេ អគ្គនាយកវិទ្យុ ABC FM107.50 ដែលរថយន្តទាំងនោះបានបំពាក់សម្ភារ និងស្លាកលេខគ្រប់ទាំងអស់ ។ រថយន្តទាំង៣គ្រឿងនេះ គឺជាអំណោយដ៏ថ្លៃថ្លារបស់សម្តេចតេជោ ហ៊ុន សែន ដោយគិតទឹកប្រាក់ប្រមាណជាង១០ម៉ឺនដុល្លារ ដើម្បីប្រគល់ជូនក្នុងការជួយសង្គ្រោះប្រជាពលរដ្ឋ ។
ពិធីប្រគល់នេះ ធ្វើឡើងក្រោមការអញ្ជើញចូលរួមពីលោកប៉ា សុជាតិវង្ស អភិបាលរាជធានីភ្នំពេញ ។
គួររំលឹកថា កាលពីថ្ងៃទី១១ សីហា ឆ្នាំ២០១៦ ម៉ោង១០ និង៣០នាទីព្រឹក ក្រុមការងារលេខាធិការដ្ឋាននៃគណៈកម្មការលុបបំបាត់ឱសថក្លែងក្លាយ និងសេវាសុខាភិបាលឯកជនខុសច្បាប់ ដើម្បីកាត់បន្ថយភាពក្រីក្រក្នុងរាជធានីភ្នំពេញ បានធ្វើការឃាត់រថយន្តសង្គ្រោះបន្ទាន់របស់វិទ្យុ ABC FM107.50 ដែលកំពុងតែចរាចរដឹកផលិតផលទឹកត្របែកចែកចាយបន្តទៅអាជីវករលក់បន្ត នៅចំណុចស្ពានអាកាស៥មករា (ស្តុបតិចណូ) ។
ជាមួយគ្នានេះដែរ សម្តេចតេជោ ហ៊ុន សែន ក៏បានអន្តរាគមន៍ និងសម្រេចប្រគល់រថយន្តសង្គ្រោះបន្ទាន់២គ្រឿងបន្ថែមទៀត ដើម្បីឱ្យស្ថានីយវិទ្យុABC ធ្វើសកម្មភាពមនុស្សធម៌ ជូនដល់ប្រជាពលរដ្ឋ ៕
ចែករំលែកព័តមាននេះ