មន្ត្រីឧទ្យានុរក្សដែនជម្រកសត្វព្រៃស្រែពក ចាប់ព្រានព្រៃ២នាក់
- មណ្ឌលគិរី
មន្ត្រីឧទ្យានុរក្សនៃដែន ជម្រក សត្វព្រៃស្រែពក បានចុះល្បាតតាមដានស្រាវ ជ្រាវបង្ការទប់ស្កាត់ និងបង្ក្រាបបទល្មើសធនធានធម្មជាតិ
ខេត្តមណ្ឌលគិរី ៖ កាលពីថ្ងៃទី១៩ ខែកុម្ភៈ ឆ្នាំ២០២២កន្លងទៅ មន្ត្រីឧទ្យានុរក្សនៃដែន ជម្រក សត្វព្រៃស្រែពក បានចុះល្បាតតាមដានស្រាវ ជ្រាវបង្ការទប់ស្កាត់ និងបង្ក្រាបបទល្មើសធនធានធម្មជាតិ ត្រង់ចំណុចណងប៊ួរ ដែលមាននិយាមការ ៧៣៤៧៦៤-១៤៦៤១៣០ ស្ថិតក្នុងភូមិណងប៊ួរ ឃុំណងឃីឡឹក ស្រុកកោះញែក ។
នៅពេលចុះល្បាតនោះ បានប្រទះឃើញជនសង្ស័យ២នាក់ជិះម៉ូតូ២គ្រឿង ស្ពាយកាំភ្លើងអាកា១ដើម និងកាំភ្លើងកែច្នៃឆ្នុកដូង១ដើមចងនៅលើម៉ូតូ ។ ខណៈឃើញដូច្នេះ កម្លាំងសមត្ថកិច្ចបានស្ទាក់ចាប់ តែជនសង្ស័យដឹងខ្លួនក៏ជិះ
ម៉ូតូរត់គេច ហើយក្រុមការងារបានជិះម៉ូតូដេញតាមនិងបានបំបុកម៉ូតូជនសង្ស័យពីក្រោយឲ្យដួល ។ ពេលនោះជនសង្ស័យបានក្រោកឈរទាញកាំភ្លើងបើកសោបម្រុងបាញ់មកលើសមត្ថកិច្ច តែសមត្ថកិច្ចបានស្ទុះទៅចាប់កាំភ្លើងជាប់ រួចដកហូតកាំភ្លើងពីជនសង្ស័យ និងចាប់ឃាត់ខ្លួនបានទាំង២នាក់ ។
ជាមួយនឹងការចាប់ឃាត់ខ្លួននេះ សមត្ថកិច្ចក៏បានរឹបអូសវត្ថុតាងមាន កាំភ្លើងអាកាស្វ័យបត់១ដើម គ្រាប់៣៧គ្រាប់ កាំភ្លើងឆ្នុកដូង១ដើម គ្រាប់បាដាងចំនួន៥០គ្រាប់ និងរំសេវផ្ទុះកន្លះដប ម៉ូតូម៉ាកវេ៉វឆ្លាម១គ្រឿង និងម៉ូតូម៉ាកវេវអេស១គ្រឿង ។ វត្ថុតាងទាំងអស់ ត្រូវបានយកទៅរក្សាទុកនៅស្នាក់ការត្រពាំងត្រាច ដើម្បីបន្តនីតិវិធី ៕
ចែករំលែកព័តមាននេះ