រាជធានីភ្នំពេញ ៖ កាលពីព្រឹកថ្ងៃទី ២១ ខែកក្កដា ២០១៦ តារាម៉ូដែលស្រីពីររូបនៅក្នុងក្រុមបង្ហាញម៉ូដ សាន់ស៊ុបភើ ម៉ូដែល ខេមបូឌា បានទៅចូលរួមប្រកួតនៅប្រទេសម៉ាឡេស៊ីក្នុងកម្មវិធី Miss Chinese Cosmos Southeast Asia 2016
រាជធានីភ្នំពេញ ៖ កាលពីព្រឹកថ្ងៃទី ២១ ខែកក្កដា ២០១៦ តារាម៉ូដែលស្រីពីររូបនៅក្នុងក្រុមបង្ហាញម៉ូដ សាន់ស៊ុបភើ ម៉ូដែល ខេមបូឌា បានទៅចូលរួមប្រកួតនៅប្រទេសម៉ាឡេស៊ីក្នុងកម្មវិធី Miss Chinese Cosmos Southeast Asia 2016 ចាប់ពីថ្ងៃទី២១ ខែកក្កដា រហូតដល់ថ្ងៃទី៧ ខែសីហា ឆ្នាំ២០១៦ ។
តារាម៉ូដែលទាំងពីរនាក់នោះគឺ កញ្ញាប៉ែន ពុណ្ណាវឌ្ឍន៍ ម្ចាស់ពានជ័យលាភី Miss Personality ក្នុងកម្មវិធី Miss University 2016 ដែលទើបតែបញ្ចប់ការប្រកួតកាលពីដើមឆ្នាំ និងកញ្ញា Genevieve ជាបេក្ខភាពម្នាក់ក្នុងកម្មវិធី Miss Teen Cat of The City 2016 ក៏ជាតួឯកស្រីក្នុងរឿង «មានតែអូន» របស់ស្ថានីយទូរទស្សន៍ប៉ុស្តិ៍លេខ៩ ដែលនឹងចាក់ផ្សាយនាពេល ឆាប់ៗខាងមុខ ។ តារាម៉ូដែលទាំងពីររូបនេះតំណាងប្រទេសកម្ពុជាក្នុងព្រឹត្តិការណ៍នៃការប្រកួត ។
តារាម៉ូដែលទាំងពីររូបនេះបានថ្លែងប្រាប់អ្នកយកព័ត៌ថា ពួកនាងបានត្រៀមខ្លួនរួចជាស្រេចក្នុងការបង្ហាញសម្រស់ និងសមត្ថភាពពិសេសក្នុងកម្មវិធី ។
លោកខន ប្រសិទ្ធ ប្រធានគ្រប់គ្រងក្រុមហ៊ុនបង្ហាញម៉ូដ សាន់ស៊ុបភើ ម៉ូដែល ខេមបូឌា លើកឡើងថា ការចេញទៅប្រកួតនេះគឺទៅលក្ខណៈជាក្រុម ដែលប្រទេស នីមួយៗអាចបញ្ជូនតារាម៉ូដែលរបស់ខ្លួនដល់ទៅបួននាក់ឯណោះ ខណៈដែលប្រទេសថៃមានតែពីររូបដូចកម្ពុជាយើងដែរ ។
លោកខន ប្រសិទ្ធ បញ្ជាក់ថា គម្រោងចេញដំណើរទៅប្រកួតនៅប្រទេសម៉ាឡេស៊ីនេះ គឺជាការរៀបចំដោយផ្ទាល់របស់ក្រុមហ៊ុន ព្រមទាំងការជួយឧបត្ថម្ភពីហាងបូរ៉ានិចកាត់ដេរ ដែលបានរចនាម៉ូដសម្លៀកបំពាក់យ៉ាងស្រស់ស្អាតដល់តារាម៉ូដែលទាំងពីររូប ក៏ដូចជាបព្វតា ស្ទូឌីយោក្នុងការផ្ដិតយករូបភាពផងដែរ។ នេះជាព្រឹត្តិការណ៍ដ៏ពិសេសមួយ ប្រសិនបើតារាម៉ូដែលគោរព និងធ្វើបានល្អតាមអ្វីដែលអ្នករៀបចំកម្មវិធីចង់បាន នោះពួកនាងនឹងយល់គ្រប់កាលៈទេសៈក្នុងការរៀបចំខ្លួន ការកំណត់ពេលវេលា ទទួលបាននូវការសិក្សា ថ្មីៗក្នុងអាជីពបង្ហាញម៉ូដ និងបទពិសោធន៍ក្នុងការរស់នៅជាក្រុមនៃបណ្ដាប្រទេស ដែលបានចូលរួម ។ នៅអាកាសយានដ្ឋានមានតារាម៉ូដែលប្រុសស្រីជាច្រើនរូប បានជូនដំណើរ នឹងសម្ដែងការគាំទ្រក្រុមរបស់ខ្លួនផង ។
កម្មវិធី Miss Chinese Cosmos Southeast Asia 2016 គឺតម្រូវឲ្យតារាម៉ូដែលស្រីពីបណ្ដាប្រទេសនានា មានចំណេះដឹងភាសាចិនផងដែរ ៕
ចែករំលែកព័តមាននេះ