ខេត្តកណ្តាល ៖ ព្រោះតែជីវភាពក្រខ្សត់ធ្វើឲ្យបុរសម្នាក់ដែលជាមេគ្រួសារមានកូន២នាក់ក្នុងបន្ទុកផងនោះ បានដាច់ចិត្តឡើងដើមត្នោតមានកម្ពស់ជាច្រើនម៉ែត្រជារៀងរាល់ថ្ងៃ ទាំងខ្លួនមានជំងឺបេះដូងប្រចាំកាយ ដើម្បីគាបយកទឹកត្នោតទៅធ្វើជាទឹកត្នោតជូរលក់ចិញ្ចឹមក្រពះ និងគ្រួសារ តែជាអកុសលអាក្រក់ ពេលឡើងដល់ចុងដើមត្នោត ហើយអោនចុះគាបត្នោតយកទឹក នោះ ក៏ស្រាប់តែដាច់ខ្យល់ស្លា.ប់តែម្តង ។
ហេតុការណ៍ខាងលើនេះ បានកើតឡើងនៅថ្ងៃទី១០ ខែកុម្ភៈ ឆ្នាំ២០២២ វេលាម៉ោង៧និង៣០នាទីព្រឹក ថ្ងៃទី១០ ខែកុម្ភៈ ឆ្នាំ២០២២ នៅចំណុចក្នុងសាលាគរុកោសល្យ ស្ថិតក្នុងភូមិភាគខេត្តកណ្តាល ភូមិព្រែកសំរោង សង្កាត់តាខ្មៅ ក្រុងតាខ្មៅ ខេត្តកណ្តាល។ ហើយជនរងគ្រោះខាងលើមានឈ្មោះ អាន វណ្ណៈ ភេទប្រុស អាយុ៣៨ឆ្នាំ មុខរបរអ្នកឡើងត្នោត ស្នាក់នៅភូមិកំពង់សំណាញ់ សង្កាត់កំពង់សំណាញ់ ក្រុងតាខ្មៅ ខេត្តកណ្តាល។
បើតាមលោកវរសេនីយ៍ឯក យី វណ្ណដា អធិការនគរបាលក្រុងតាខ្មៅ បានប្រាប់អោយដឹងថា យោងតាមការបំភ្លឺរបស់គ្រូគរុសិស្ស ដែលរៀននៅសាលាគរុកោសល្យភូមិភាគខេត្តកណ្តាល នៅថ្ងៃទី១០ ខែកុម្ភៈ ឆ្នាំ២០២២ វេលាម៉ោង៧និង៣០នាទីព្រឹកនេះ បានឃើញជនរងគ្រោះមកឡើងដើមត្នោតនៅសាលាគរុកោសល្យជាប្រចាំ ។
ប្រភពដដែលបន្តថា លុះបានប្រហែលកន្លះម៉ោងក្រោយមក ក៏ស្រាប់តែឃើញធ្លាក់ធៀបគាបទឹកត្នោតចុះមកក្រោម ពេលនោះក៏បានមើលទៅជនរងគ្រោះពីលើដើមត្នោត ហើយឃើញជនរងគ្រោះដេកនៅលើដើមត្នោត ដោយមានការសង្ស័យក៏បានស្រែហៅជនរងគ្រោះ តែមិនឆ្លើយតបនោះទេ ។
ប្រភពដដែលបន្តថា ក្រោយមកក៏បានប្រាប់សមត្ថកិច្ចអោយចុះមកមើល ហើយក៏បានទាក់ទងទៅក្រុមគ្រួសារជនរងគ្រោះតែម្តង ។ លុះពេលខាងក្រុមគ្រួសារជនរងគ្រោះបានមកដល់ ក៏បានឡើងទៅលើដើមត្នោត រួចយកខ្សែចងយោងជនរងគ្រោះចុងក្រោមវិញ បន្ទាប់មកក៏នាំគ្នាជួយសង្គ្រោះរឹតទ្រូង និងធ្វើចលនាបេះដូង ហើយក៏បានទាក់ទងទៅរថយន្តពេទ្យតែម្តង ប៉ុន្តែពេលរថយន្តពេទ្យមកដល់ ក៏បានប្រាប់ថាជនរងគ្រោះបានស្លា.ប់បាត់ទៅហើយ បន្ទាប់មកសមត្ថកិច្ចក៏ចុះមកពិនិត្យផងដែរ ហើយចំពោះមូលហេតុដែលជនរងគ្រោះស្លា.ប់ គឺដោយសារខ្យល់គរ (គាំងបេះដូង)។ ក្រោយពេលកើតហេតុ សាកស.ពជនរងគ្រោះត្រូវបានក្រុមគ្រួសារដឹកយកទៅធ្វើបុណ្យតាមប្រពៃណី៕
ចែករំលែកព័តមាននេះ