ប្រជាកសិករមានការព្រួយបារម្ភអំពីជំងឺសាទឹក និងជំងឺអុតក្តាមដែលកើតលើសត្វគោ សត្វក្របីរបស់ពួកគាត់ ខណៈពេលមន្ត្រីការិយាល័យផលិតកម្ម និងបសុព្យាបាលនៃមន្ទីរកសិកម្មរុក្ខាប្រម៉ាញ់ និង
ខេត្តស្វាយរៀង ៖ ប្រជាកសិករមានការព្រួយបារម្ភអំពីជំងឺសាទឹក និងជំងឺអុតក្តាមដែលកើតលើសត្វគោ សត្វក្របីរបស់ពួកគាត់ ខណៈពេលមន្ត្រីការិយាល័យផលិតកម្ម និងបសុព្យាបាលនៃមន្ទីរកសិកម្មរុក្ខាប្រម៉ាញ់ និងនេសាទខេត្ត បង្ហើបថា មិនទាន់បានទទួលវ៉ាក់សាំងសាទឹក និងវ៉ាក់សាំងអុតក្តាមគោក្របីនៅឆ្នាំ២០២២នេះ ដោយសារក្រសួងបង្វែរថវិកាទៅប្រើប្រាស់លើការប្រយុទ្ធប្រឆាំងជំងឺកូវីដ-១៩។
ប្រជាពលរដ្ឋដែលមានការព្រួយបារម្ភខាងលើនេះ បានកើតឡើងនៅព្រឹកថ្ងៃទី០៩ ខែកុម្ភៈ ឆ្នាំ២០២២ នៅស្រុកចំនួន០៥ គឺស្រុកស្វាយជ្រំ ស្រុករមាសហែក ស្រុករំដួល ស្រុកចន្ទ្រា និងស្រុកកំពង់រោទ៌។
ទាក់ទិនករណីខាងលើនេះ លោក ប៉ែន ចន្ធី ប្រធានការិយាល័យផលិតកម្ម និងបសុព្យាបាលនៃមន្ទីរកសិកម្មរុក្ខាប្រមាញ់ និងនេសាទខេត្ត បានឲ្យដឹងថា នៅឆ្នាំ២០២២នេះ អគ្គនាយកដ្ឋានសុខភាពសត្វ និងផលិតកម្មសត្វនៃក្រសួងកសិកម្មរុក្ខាប្រមាញ់ និងនេសាទ មិនទាន់បានផ្តល់ឲ្យ (វ៉ាក់សាំងការពារជំងឺសាទឹក និងជំងឺអុតក្តាមគោក្របី)នោះទេ ក៏ប៉ុន្តែឯកឧត្តមរដ្ឋមន្ត្រីស្រសួងកសិកម្មរក្ខាប្រមាញ់ និងនេសាទ ឯកឧត្តមអគ្គនាយកដ្ឋានសុខភាពសត្វ និងផលិតកម្មសត្វ បានផ្តល់ថវិកាផ្ទាល់ខ្លួន ដើម្បីទិញវ៉ាក់សាំងដុំពកស្បែកគោក្របីចំនួន៨,០០០កម្រិត ស្មើ នឹង៨ពាន់ក្បាល សម្រាប់យុទ្ធនាការចាក់វ៉ាក់សាំង ការពារជំងឺដុំពកស្បែកគោក្របី ចំនួន៨,០០០ក្បាលក្នុងស្រុក/ក្រុងទាំង០៨ នៅក្នុងខេត្តស្វាយរៀង គឺក្នុង១ស្រុក/ក្រុង ១,០០០ក្បាល។
ហើយចាប់ថ្ងៃទី២០ ខែមករា ឆ្នាំ២០២២ រហូតមកដល់ថ្ងៃទី៩ ខែកុម្ភៈ ឆ្នាំ២០២២នេះ មន្ត្រីជំនាញនៃការិយាល័យផលិតកម្ម និងបសុព្យាបាល បានសហការជាមួយអាជ្ញាធរមូលដ្ឋាន ស្រុក-ខេត្ត ចុះទៅចាក់វ៉ាក់សាំងដុំពកស្បែកគោក្របី ជូនប្រជាកសិករបានចំនួន០៣ស្រុក ៖ គឺស្រុកចន្ទ្រា ស្រុកស្វាយទាប និងស្រុកស្វាយជ្រំ ។ ហើយនៅថ្ងៃទី៩ ខែកុម្ភៈនេះ កំពុងដំណើរការចាក់វ៉ាក់សាំងដុំពកស្បែកគោក្របី នៅភូមិត្បែង ឃុំអំពឹល ស្រុករមាសហែក បានជិត៣០០ក្បាលហើយ ។
លោក ប៉ែន ចន្ធី បានបញ្ជាក់ថា មិនខ្វះទេ គឺមិនទាន់បានទទួលវ៉ាក់សាំងសាទឹក និងវ៉ាក់សាំងអុតក្តាម ក៏ប៉ុន្តែមន្ទីរមានវ៉ាក់សាំងសម្រាប់ជួយអន្តរាគមន៍នៅពេលសហគមន៍ណាមានគោក្របីឈឺ ជំងឺសាទឹក និងជំងឺអុតក្តាម។
លោកបន្តថា នៅឆ្នាំ២០២១ អគ្គនាយកដ្ឋានសុខភាពសត្វ និងផលិតកម្មសត្វ បានផ្តល់វ៉ាក់សាំង សាទឹក និងអុតក្តាមគោក្របី ចំនួនជាង៨០,០០០កម្រិត ស្មើ៨០,០០០ក្បាលជាង ហើយទូទាំងខេត្តស្វាយរៀង មានសត្វគោក្របីចំនួន២៣០,០០០ក្បាល (២៣ម៉ឺនក្បាល)។
លោកបន្ថែមទៀតថា នៅឆ្នាំ២០២១ មានសត្វគោក្របី ឈឺច្រើនរហូតមានងា.ប់ជាច្រើនក្បាល ក៏ប៉ុន្តែនៅឆ្នាំ២០២២នេះ មានគោក្របីឈឺតិច ដោយប្រជាពលរដ្ឋបានយល់ដឹងច្រើន ដោយអ្នកចិញ្ចឹមសត្វលាងសំអាតគោក្របី និងពេលគោក្របីមានជំងឺសាទឹក ជំងឺអុតក្តាម និងជំងឺដុំពកស្បែក ពួកគាត់លាងសំអាតដុះសាប៊ូ អនាម័យរាល់ថ្ងៃ ទើបសត្វគោក្របីមិនងា.ប់ទេ។
លោកបន្ថែមទៀតថា ចំពោះប្រជាពលរដ្ឋបានស្នើសុំវ៉ាក់សាំងសាទឹក និងអុតក្តាមនោះ ដើម្បីឆ្លើយតប លោកប្រធានមន្ទីរបានបញ្ជូនមន្ត្រីជំនាញ យកវ៉ាក់សាំងសាទឹក និងអុតក្តាម ទៅចាក់គោក្របីឱ្យប្រជាពលរដ្ឋចំនួន០៣ឃុំ គឺ ឃុំទួលស្តី ឃុំច្រេស និងឃុំសំរោង ក្នុងស្រុកចន្ទ្រា ចាប់ពីថ្ងៃសុក្រទី១១ ខែកុម្ភៈ ឆ្នាំ២០២២ ខាងមុខនេះហើយ។ ហើយការចុះយុទ្ធនាការចាក់វ៉ាក់សាំងគោក្របីនេះ គឺមានវត្តមានលោក សេង សិលា អភិបាលរងខេត្ត, លោក សុខ សទ្ធាវុធ ប្រធានមន្ទីរកសិកម្មរុក្ខាប្រមាញ់ និងនេសាទ និងលោក ស៊ូ ម៉ុល អភិបាលស្រុករមាសហែក ក៏ចូលរួមផងដែរ៕
ចែករំលែកព័តមាននេះ