ឆក់អាយហ្វូនបានមួយគ្រឿង តែសមត្ថកិច្ចចាប់ជាប់
រាជធានីភ្នំពេញ ៖ ក្រុមជនដៃរហ័សម្នាក់ក្នុងចំណោមបក្ខពួកពីរនាក់ ត្រូវបានកម្លាំងនគរបាលប៉ុស្តិ៍ផ្សារថ្មីទី១ ធ្វើការឃាត់ខ្លួនបាន ក្រោយពីរូបគេ និងបក្ខពួកម្នាក់ទៀត
រាជធានីភ្នំពេញ ៖ ក្រុមជនដៃរហ័សម្នាក់ក្នុងចំណោមបក្ខពួកពីរនាក់ ត្រូវបានកម្លាំងនគរបាលប៉ុស្តិ៍ផ្សារថ្មីទី១ ធ្វើការឃាត់ខ្លួនបាន ក្រោយពីរូបគេ និងបក្ខពួកម្នាក់ទៀតជិះម៉ូតូចំនួនពីរគ្រឿង(ម្នាក់មួយគ្រឿង) ធ្វើសកម្មភាពឆក់យកទូរស័ព្ទដៃម៉ាក Iphone6 មួយគ្រឿងពីបុរសម្នាក់ដែលបានដាក់ក្នុងហោប៉ៅហើយជិះម៉ូតូតាមផ្លូវតែម្នាក់ឯងនោះ។ ហេតុការណ៍នេះបានកើតឡើងកាលពីវេលាម៉ោង១០និង៣០នាទីព្រឹក ថ្ងៃទី២០ ខែកក្កដា ឆ្នាំ២០១៦ នៅមុខផ្ទះលេខ២០BEo ផ្លូវលេខ១១៤ ក្នុងសង្កាត់ផ្សារថ្មីទី១ ខណ្ឌដូនពេញ។
តាមប្រភពព័ត៌មានពីមន្ត្រីនគរបាលបានប្រាប់ឱ្យដឹងថា យុវជនជាជនសង្ស័យដែលបានឃាត់ខ្លួនមានឈ្មោះ ឃុន ពិយ៉ា អាយុ១៩ឆ្នាំ មុខរបរមិនពិតប្រាកដ ស្នាក់នៅផ្ទះជួលម្តុំសាលាព្រះអង្គអេង ក្នុងសង្កាត់បឹងកេងកងទី១ ខណ្ឌចំការមន ជិះម៉ូតូម៉ាកណិច ពណ៌ខៀវលាយស ពាក់ស្លាកលេខភ្នំពេញ ១FU-៣៣១៨ និងបក្ខពួកម្នាក់ទៀតឈ្មោះ សិដ្ឋ អាយុ២២ឆ្នាំ ជិះម៉ូតូម៉ាកហុងដា C125 ស៊េរីឆ្នាំ២០១៦ ពណ៌ខ្មៅ គ្មានស្លាកលេខមួយគ្រឿងរត់គេចខ្លួនបាត់។ បុរសរងគ្រោះមានឈ្មោះ ហួន ប៊ុនថន អាយុ ៣៨ឆ្នាំ មុខរបរទិញ លក់រថយន្ត ស្នាក់នៅផ្ទះលេខ២៣៨៦AEo ផ្លូវលេខ៤៥ ក្នុងសង្កាត់ស្រះចក ខណ្ឌដូនពេញ។
មុនពេលកើតហេតុ បុរសជនរងគ្រោះបានធ្វើដំណើរតាមម៉ូតូមួយគ្រឿងម៉ាក ហ្វីណូ ពណ៌លឿង ពាក់ស្លាកលេខភ្នំពេញ ១X-៥៧៦៤ មួយគ្រឿងតាមបណ្តោយផ្លូវលេខ១១៤ ក្នុងទិសដៅពីលិចទៅកើតតែម្នាក់ឯង ដោយដាក់ទូរស័ព្ទម៉ាក Iphone6 ពណ៌ស មួយគ្រឿងរបស់ខ្លួននៅក្នុងហោប៉ៅអាវ។តាមប្រភពដដែលបានប្រាប់បន្តទៀតថា លុះធ្វើដំណើរមកដល់កន្លែងកើតហេតុខាងលើ ក៏ត្រូវក្រុមជនសង្ស័យចំនួនពីនាក់ ជិះម៉ូតូចំនួនពីរគ្រឿង(ម្នាក់មួយគ្រឿង)មកក្បែរ ដោយជនសង្ស័យម្នាក់ដដែលជិះម៉ូតូម៉ាកណិច បានធ្វើសកម្មភាពឆក់យកទូរស័ព្ទដៃមួយគ្រឿងនោះពីក្នុងហោប៉ៅអាវរបស់ខ្លួនតែម្តង។
ភ្លាមនោះបុរសរងគ្រោះក៏បានជិះម៉ូតូដេញតាមទាន់ និងបុកពីក្រោយបណ្តាលឲ្យដួលម្នាក់រួចហើយ កម្លាំងនគរបាលប៉ុស្តិ៍ដែលកំពុងតែធ្វើការដើរល្បាតនៅក្បែរនោះជួយចាប់ឃាត់ខ្លួនបានម្នាក់តែម្តង និងបក្ខពួកម្នាក់ទៀតជិះម៉ូតូរត់គេចខ្លួនបាត់ស្រមោល។ ក្រោយពេលកើតហេតុ ទូរស័ព្ទដៃម៉ាក Iphone6 មួយគ្រឿងនោះត្រូវបានប្រគល់ទៅឲ្យម្ចាស់វិញ ចំណែកឯយុវជនសង្ស័យត្រូវបាននាំខ្លួនទៅធ្វើការសាកសួរ និងធ្វើកំណត់ហេតុនៅប៉ុស្តិ៍នគរបាលផ្សារថ្មីទី១ ដើម្បីបញ្ជូនខ្លួនទៅកាន់អធិការដ្ឋាននគរបាលខណ្ឌដូពេញចាត់ការទៅតាមផ្លូវច្បាប់ជាបន្តទៅទៀត។
គួរបញ្ជាក់ថា នាពេលកន្លងមកនេះនៅក្នុងភូមិសាស្ត្រខណ្ឌដូនពេញតែងតែកើតមាននូវចោរឆក់នៅតាមទីសារធារណៈកើតឡើងស្ទើរតែរាល់ថ្ងៃ ដោយមិនមែនរងគ្រោះតែលើជនជាតិខ្មែរយើងឡើយ សូម្បីតែជនបរទេសក៏រងគ្រោះជាញឹកញាប់ផងដែរ តែកម្លាំងមានសម្ថកិច្ចកកម្រនឹងបង្ក្រាបបានណាស់៕
ចែករំលែកព័តមាននេះ