ខេត្តព្រះវិហារ ៖ អ្នកភូមិក្នុងស្រុកគូលែន ខេត្តព្រះវិហារជាច្រើនគ្រួសារបានចោទប្រកាន់ថា ទាហានដឺបេ ពាក់ស័ក្តិ៣ម្នាក់ ឈ្មោះក្រូច ប៊ុនគីម ហៅហែម បូរិន…
ខេត្តព្រះវិហារ ៖ អ្នកភូមិក្នុងស្រុកគូលែន ខេត្តព្រះវិហារជាច្រើនគ្រួសារបានចោទប្រកាន់ថា ទាហានដឺបេ ពាក់ស័ក្តិ៣ម្នាក់ ឈ្មោះក្រូច ប៊ុនគីម ហៅហែម បូរិន កំពុងប្រើអំណាច ដោយអោយកូនប្រុសរបស់ខ្លួន យកគ្រឿងចក្រទៅឈូសឆាយលើដីពួកគាត់ និងដីព្រៃរបស់រដ្ឋច្រើនរយហិកតា ។
ដីរបស់អ្នកភូមិនិងដីព្រៃរបស់រដ្ឋ ដែលបុគ្គលពាក់ស័ក្តិ៣ ឈ្មោះ ក្រូច ប៊ុនគីម កំពុងឈូសឆាយ ស្ថិតនៅចំណុច ត្រពាំងផ្លុង និងអូរខ្សាច់ ក្នុងភូមិសាស្ត្រភូមិក្តាក់ ឃុំភ្នំត្បែងពីរ ស្រុកគូលែន ខេត្តព្រះវិហារ ។ ការដាក់គ្រឿងចក្រចូលទៅឈូសឆាយដីព្រៃពីសំណាក់បុគ្គលក្រូច ប៊ុន គីម នេះ មិនមែនទើបតែម្សិលមិញនោះទេ បុគ្គលនេះបានចូលទៅឈូសឆាយតាំពីឆ្នាំ២០១៨មកម្ល៉េះ តែសកម្មភាពរបស់គេ ហាក់មិនរំខានដល់សមត្ថកិច្ចពាក់ពន្ធ័នោះឡើយ ។
ក្រុមអ្នកភូមិអោយដឹងទៀតថា លោកស័ក្តិ៣ ក្រួច ប៊ុនគីម ហៅហែម បូរិន ជាមន្ត្រីយោធាដឺបេពាក់សក្ត័៣ នៅការិយាល័យទី២ យោធភូមិភាគទី៤ កងទ័ព ជើងគោក ។ នៅព្រឹកថ្ងៃទី៧ ខែកុម្ភៈ ឆ្នាំ២០២២នេះ ស្ត្រីឈ្មោះគុណ សុឃន់ បានផ្តល់បទសម្ភាសន៍ថា ដីរបស់គាត់និងអ្នកភូមិ២នាក់ទៀតដែលស្ថិតនៅក្នុងភូមិឃុំខាង លើមានលិខិតកាន់កាប់តាំងពីឆ្នាំ២០០៧មកម្ល៉េះ ។
នៅឆ្នាំ២០២០ ពួកគាត់បានទៅបោះបង្គោលរបង ហើយឈ្មោះក្រូច ប៊ុនគីម បានដកបង្គោលរបងពួកគាត់ជា បន្តបន្ទាប់ ។ លុះថ្ងៃទី១៤ ខែ១១ ឆ្នាំ២០២១ ពួកគាត់បានដាក់ពាក្យប្តឹងនៅសាលាឃុំដោយចោទ ឈ្មោះក្រូច ប៊ុនគីម ពីបទបំផ្លាញទ្រព្យសម្បត្តិ។ នៅពេលបន្ទាប់សាលាបានហៅដោះស្រាយ តែឈ្មោះក្រូច ប៊ុនគីម មិនដែលចូលដោះស្រាយឡើយ ផ្ទុយទៅវិញបុគ្គលរូបនេះ បានយកគ្រឿងចក្រទៅឈូសឆាយដីពួកគាត់ហើយដាំដំឡូងនិងចេកទាំងបំពានថែមទៀត ។
ស្ត្រីដដែលបញ្ជាក់ថា ថ្មីៗនេះ នៅថ្ងៃទី៣០ខែមករាឆ្នាំ២០២២ ពេលពួកគាត់ទៅដាក់បង្គោលនិងឈូសក្រវ៉ាត់ព្រំ ក៏ត្រូវបុគ្គលឈ្មោះក្រូច ប៊ុនគីម បញ្ជាអោយកូនប្រុសរបស់ខ្លួន២នាក់មករារាំងជេរប្រមាថនិងអះ អាងថា ដីទាំងនោះជារបស់ឪពុកគេ(ក្រូចប៊ុនគីម) ។
ចំណែកស្ត្រីឈ្មោះឈិន វៀន បានផ្តល់បទសម្ភាសន៍ថា រូបគាត់រួមទាំងអ្នកភូមិជាង១០គ្រួសារទៀតក៏កំពុងរងការគំរាមកំហែង និងរំលោភបំពានយកដីពីសំណាក់ បុគ្គលឈ្មោះក្រូច ប៊ុនគីមដូចគ្នា។បុគ្គលរូបនេះ ក្រៅពីរំលោភបំពានយកដីពួកគាត់ច្រើនហិកតា ក៍បានឈូសឆាយឃ្លុំពទ្ធ័ដីព្រៃរបស់រដ្ឋជាង២០០ហិកតាទៀតលក់អោយឈ្មួញម្នាក់ឈ្មោះជំទាវ ចន្ទ្រា ដោយបានទទួលលុយកក់ជិត៣ម៉ឺនដុល្លាររួចហើយ ។ ចំពោះរឿងនេះបើសិនឈ្មោះក្រូច ប៊ុនគីម មិនព្រមប្រគល់ដីដល់ពួកគាត់វិញទេ ពួកគាត់នឹងប្តឹងទៅស្ថាប័នច្បាប់រួមទាំងអង្គភាពប្រឆាំងអំពើពុករលួយទៀត ព្រោះបុគ្គលនេះ បំផ្លាញដីព្រៃរបស់រដ្ឋរាប់រយហិកតា គ្មានសមត្ថកិច្ចណា ហ៊ានបង្ក្រាប ។
ប៉ុន្តែកាលពីថ្ងៃទី២២ ខែមករា ឆ្នាំ២០២២កន្លងទៅនេះ លោកស័ក្តិ៣ ក្រូច ប៊ុនគីម ហៅហែម បូរិន មន្ត្រីយោធាដឺបេ ការិយាល័យទី២ យោធភូមិភាគទី៤ កង ទ័ពជើងគោក ធ្លាប់បានបក ស្រាយថា ពុំមែនជាការ ពិតនោះទេ។ នេះជាព័ត៌មាន ដែលក្រុមពលរដ្ឋផ្តល់ដោយគ្មានមូលដ្ឋានពិតប្រាកដ ។ ការបកស្រាយនោះបន្ទាប់ពី ព័ត៌មានច្រើនអង្គភាពបានចុះផ្សាយថា លោកសក្ត័៣ក្រូច ប៊ុនគីម បានយកគ្រឿងចក្រឈូសដីព្រៃរបស់រដ្ឋត្រង់ចំណុចត្រពាំងផ្លុង និងអូរខ្សាច់ ក្នុងភូមិសាស្ត្រភូមិក្តាក់ ឃុំភ្នំត្បែងពីរ ស្រុកគូលែន ខេត្ត ព្រះវិហារជិត ២០០ហិកតាលក់អោយឈ្មួញ។
យោងតាមព័ត៍មានដែលផ្តល់ ដោយក្រុមអ្នកភូមិជាម្ចាស់ដី មហាជនរងចាំមើលថា តើអាជ្ញាធរមានសមត្ថ កិច្ចក្នុងខេត្តព្រះវិហារ នឹងបើកការស្រាវជ្រាវដើម្បីរកការពិតឬយ៉ាងណា? ឬមួយថា អំណាចបុគ្គលក្រូច ប៊ុនគីម បានគ្របដណ្តប់ពេញខេត្តព្រះវិហារ អស់ទៅហើយ។ ចំពោះព័ត៍មានដែលចោទប្រកាន់ខាងលើ ក្រុមអ្នកសារព័ត៍មានរងចាំបកស្រាយបំភ្លឺពីការប្រតិកម្មរបស់ភាគីរាល់ម៉ោងធ្វើការ ។
ព័ត៌មានពិស្តារមានផ្សាយជូននៅលើកាសែតកោះសន្តិភាព ។
ចែករំលែកព័តមាននេះ