អនិច្ចាណាស់ ! មួយគ្រួសារ៥នាក់ត្រូវរន្ទះបា.ញ់
ខេត្តព្រះវិហារ ៖ ខណៈពេលកំពុងធ្វើម្ហូបស្របពេលមានភ្លៀងរលឹមស្រិចៗផងនេះ សមាជិកគ្រួសារមួយមានគ្នា៥នាក់ត្រូវបានរន្ទះបា.ញ់ត្រូវ បណ្ដាលឲ្យរបួសធ្ងន់៣នាក់ ស្រាល២នាក់
ខេត្តព្រះវិហារ ៖ ខណៈពេលកំពុងធ្វើម្ហូបស្របពេលមានភ្លៀងរលឹមស្រិចៗផងនេះ សមាជិកគ្រួសារមួយមានគ្នា៥នាក់ត្រូវបានរន្ទះបាញ់ត្រូវ បណ្ដាលឲ្យរបួសធ្ងន់៣នាក់ ស្រាល២នាក់ ត្រូវបានបញ្ជូនទៅសង្គ្រោះភ្លាមៗនៅមន្ទីរពេទ្យបង្អែក១៦មករា ក្រុងព្រះវិហារ ។ ហេតុការណ៍នេះកើតឡើងកាលពីវេលាម៉ោង១២ថ្ងៃត្រង់ ថ្ងៃទី១៨ ខែកក្កដា ឆ្នាំ២០១៦ ក្នុងភូមិក្តាក់ ឃុំត្បែង២ ស្រុគូលែន ខេត្តព្រះវិហារ ។
តាមសម្តីរបស់ក្រុមគ្រួសារជនងរងគ្រោះបានប្រាប់ឲ្យដឹងនៅក្នុងមន្ទីរពេទ្យបង្អែក១៦មករាក្រុងព្រះវិហារនៅព្រឹកថ្ងៃទី១៩កក្កដានេះថា ខណៈពេលដែលពួកគេកំពុងជុំគ្នាធ្វើម្ហូបនៅក្រោមខ្ទម ពេលនោះក៏មានភ្លៀងរលឹមលាយឡំផ្គររន្ទះផង ស្រាប់តែរន្ទះបានបាញ់ទៅលើខ្ទមស្រែនោះបណ្តាលឲ្យមនុស្ស៣នាក់បានរងរបួសធ្ងន់ សន្លប់បាត់ស្មារតី និង២នាក់ទៀតរបួសស្រាល តែសំណាងល្អមិនបណ្តាលឲ្យមាននរណាម្នាក់ស្លាប់ឡើយ ។
គ្រួសារជនរងគ្រោះឲ្យដឹងទៀតថា មនុស្ស៣នាក់រងរបួសធ្ងន់ មាន ១-ឈ្មោះ ឈួន ឈី ភេទប្រុស អាយុ៤២ឆ្នាំ, ២-ឈ្មោះ ឈួន ហឿង ភេទស្រី អាយុ៥៦ឆ្នាំ និង ៣-ឈ្មោះ យឹង លន អាយុ៣៦ឆ្នាំ ចំណែកអ្នករបួសស្រាល២នាក់ មាន ១-ឈ្មោះ ឈឹម ជឹង ភេទស្រី អាយុ៧៤ឆ្នាំ និង ២-ឈ្មោះ ឈួន ឌីណា ភេទស្រី អាយុ១៣ឆ្នាំ ទាំង៥នាក់រស់ភូមិកើតហេតុខាងលើ ។
លោក សុខ វាសនា ប្រធានមន្ទីរពេទ្យបង្អែក១៦មករាក្រុងព្រះវិហារ បានឲ្យដឹងថា មកដល់ពេលនេះជនរងគ្រោះបានធូរស្រាលបន្តិចហើយ តែត្រូវរង់ចាំការព្យាបាលបន្តទៀតសិនមុននឹងឲ្យពួកគាត់ត្រឡប់ទៅផ្ទះវិញ ៕
ចែករំលែកព័តមាននេះ