រាជធានីភ្នំពេញ ៖ សេចក្តីរាយការណ៍បឋមឱ្យដឹងថា មានការភ្ញាក់ផ្អើលឆោឡោក្នុងរោងចក្រមួយកន្លែងយីហោ «ហ្គ្រេនអ៊ីត្ត ហ្វូតវែរ» កាលពីវេលាម៉ោង០៧ និង៣០នាទីព្រឹកថ្ងៃ១៨ កក្កដា ២០១៦ ស្ថិតក្នុងអង្គស្នួលទី៣ ឃុំពើក ស្រុកអង្គស្នួល ខេត្តកណ្តាល មានកម្មករបានដួលសន្លប់ជាបន្តបន្ទាប់ជិត១០០នាក់ ក្នុងចំណោម១ពាន់នាក់ជាងខណៈកំពុងធ្វើការ ។
ការដួលសន្លប់នោះ មិនត្រូវគេដឹងមូលហេតុច្បាស់នោះទេ ។ តែមានប្រភពខ្លះនិយាយថា ក្នុងចំណោមអ្នកដួលសន្លប់នោះ គឺមានខ្មោចចូលសណ្ឋិត ដោយពេលនោះ បានស្រែកទាមទារតង្វាយសែនឱ្យគាត់ គឺបានទាមទារផ្លែឈើ៧មុខ ហើយទារខ្លាំងបំផុតនោះគឺផ្លែប៉ម, ផ្លែសារី និងផ្លែចេក ត្រូវតែសែនឱ្យគាត់ជាដាច់ខាត។ ទោះបីជាយ៉ាងណា ប្រភពនេះ គឺចេញពីក្នុងកម្មករដែលបាននិយាយតៗគ្នា។
បច្ចុប្បន្ន កម្មករដែលដួលសន្លប់នោះ ត្រូវគេបញ្ជូនទៅមណ្ឌលសុខភាពអង្គស្នួល ដើម្បីសង្គ្រោះជាបន្តបន្ទាប់ហើយ ។
ចែករំលែកព័តមាននេះ