ខេត្តក្រចេះ ៖ ភ្ញៀវទេសចរជាតិនិងអន្តរជាតិមកពីតាមបណ្តាខេត្តនានា សម្រុកមកលេងកំសាន្តយ៉ាងច្រើនកុះ
ករនៅក្នុងខេត្តក្រចេះ ក្នុងអំឡុងពេលនៃថ្ងៃប្រារព្ធពិធីបុណ្យចូលឆ្នាំថ្មីប្រពៃណី ជនជាតិចិន-វៀតណាមឆ្នាំថ្មី២០២២ ។ ខណៈពេលដែលខេត្តក្រចេះ បាននិងកំពុងទទួលបានការទាក់ទាញពីភ្ញៀវទេសចរជាតិ និងអន្តរជាតិ មកលេងកំសាន្តកាន់តែច្រើននោះផងដែរ រដ្ឋបាលខេត្តក្រចេះក៏បានរៀបចំនូវសន្តិសុខសណ្តាប់ធ្នាប់ចរាចរណ៍ការយាមល្បាត និងការសម្រួលភាពងាយស្រួល និងវិធានការការពារជំងឺកូវិដ-១៩ជូនភ្ញៀវទេសចរមកលេងកំសាន្ត តាមរមណីយដ្ឋាននានាផងដែរ។
លោក ចាន់ សុគន្ធី ប្រធានមន្ទីរទេសចរខេត្តបានបញ្ជាក់អោយដឹងថា ក្នុងឆ្នាំ២០២២នេះ ខេត្តបានរៀបចំនិងបង្កើតរមណីយដ្ឋាន ចំនួន១៨កន្លែង ។ ដោយខេត្តក្រចេះ ទទួលបានភ្ញៀវទេសចរដែលមកកម្សាន្តលេងក្នុងខេត្តក្រចេះក្នុងឱកាសបុណ្យថ្មីប្រពៃណីជនជាតិចិន-វៀតណាម ថ្ងៃទី០៣ ខែកុម្ភៈ ឆ្នាំ២០២២ មានចំនួនភ្ញៀវជាតិប្រមាណ៣០០១នាក់ និងអន្តរជាតិ៨៧នាក់។ ដោយឡែកសរុប ០៣ថ្ងៃ ចាប់ពីថ្ងៃទី១ ដល់ថ្ងៃទី៣ ខេត្តក្រចេះទទួលបានទេសចរជាតិ សរុប១០៧៤៥ និងបរទេស២៥៨នាក់ ។
ជាមួយគ្នានោះ លោកក៏បានបញ្ជាក់ថា អ្វីដែលគួរអោយកត់សម្គាល់នោះ គឺការថយចុះ នៃចំនួនភ្ញៀវទេសចរ ក៏ដូចជាការថយចុះនៃចំនួនរោងទឹក ដែលបណ្តាលមកពីវិបត្តិជំងឺ កូវិដ-១៩។ រីឯតម្លៃម្ហូបអាហា តម្លៃរោងទឹក និងសេវាកម្មផ្សេងៗ គឺមិនមានការឡើងថ្លៃឡើយ។ ដោយឡែក បញ្ហាកូវិដ-១៩ ខេត្ត ក៏ដូចជាមន្ទីរជំនាញ ក៏បានរៀបចំនិងបានណែនាំផងដែរ ដល់រមណីយដ្ឋានកំសាន្ត និងភ្ញៀវទេសចរមកលេងកំសាន្ត ត្រូវគោរពអោយបានត្រឹមត្រូវតាម ការណែនាំរបស់ក្រសួងសុខាភិបាលផងដែរ ។
ជាមួយគ្នានោះដែរ ផ្នែករក្សាសន្តិសុខសណ្ដាប់ធ្នាប់ចរាចរនៅតាមទីរមណីយដ្ឋាន ទេសចរ និងនៅតាមដង
ផ្លូវជាតិក្នុងខេត្ត ត្រូវបានលោកវរៈសេនីយ៍ទោ អ៊ឹម ចិត្រា មេបញ្ជាការមូលដ្ឋានកងរាជអាវុធហត្ថស្រុកចិត្របុរី បញ្ជាក់ប្រាប់អោយដឹងនៅរសៀលថ្ងៃទី២ កុម្ភៈ នេះថា ដោយមានការប្រជុំផ្សព្វផ្សាយស្ដីពីផែនការការពាររក្សាសន្តិសុខសុវត្ថិភាព សណ្ដាប់ធ្នាប់ ជូនប្រជាពលរដ្ឋក្នុងឱកាសពិធីបុណ្យចូលឆ្នាំថ្មី ប្រពៃណីជនជាតិចិន-វៀតណាមឆ្នាំនេះ ក៏ដូចជាដោយមានបទបញ្ជាផ្ទាល់ពីលោកឧត្តមសេនីយ៍ត្រី សាន្ត ប៊ុនថាន មេបញ្ជាការកងរាជអាវុធហត្ថខេត្តក្រចេះ កម្លាំងអាវុធហត្ថស្រុកចិត្របុរី សហការជាមួយកម្លាំង អធិការរដ្ឋានស្រុកចិត្របុរី ចុះល្បាតពិនិត្យស្ថានភាពជាប់ជាប្រចាំនៅគោលដៅនីមួយៗ រួមមានរមណីយដ្ឋានទឹកជួរកាំពី រមណីយដ្ឋានអន្លុងផ្សោត និងរមណីយដ្ឋានកោះសុក្រម រួមទាំងនៅតាមដងផ្លូវជាតិលេខ៧ជាដើម ដើម្បីរក្សាការពារទប់ស្កាត់ និងបង្ក្រាបនូវរាល់បទល្មើស និងគ្រោះថ្នាក់ចរាចរនានា ដែលអាចកើតឡើងជាយថាហេតុ ក្នុងអំឡុងពេលនៃពិធីបុណ្យចូលឆ្នាំចិននេះ៕
ចែករំលែកព័តមាននេះ