ខេត្តកណ្តាល ៖ លោក អាត ច័ន្ទដារា ចៅក្រមស៊ើបសួរសាលាដំបូងខេត្តកណ្តាល នៅរសៀលថ្ងៃទី៣១ ខែមករា ឆ្នាំ២០២២ បានសម្រេចចេញដីកាឃុំខ្លួនកម្មករសំណង់ចំនួន២នាក់ ដែលបានប្រើអំពើហិ.ង្សាទៅលើជនរងគ្រោះ ដាក់ពន្ធនាគារបណ្តោះអាសន្នពីបទ «ហិ.ង្សាដោយចេតនា» តាមមាត្រា២១៧ នៃក្រមព្រហ្មទណ្ឌ ។ ដែលប្រព្រឹត្តនៅថ្ងៃទី៣០ ខែមករា ឆ្នាំ២០២២ វេលាម៉ោង១៤និង១០នាទី នៅចំណុចការដ្ឋានមណ្ឌលកែប្រែ ស្ថិតក្នុងភូមិទួលសុភី ឃុំព្រែកគយ ស្រុកស្អាង ខេត្តកណ្តាល ។
ជនត្រូវចោទ ទី១- ឈ្មោះ អ៊ុន ដារ៉ា ភេទប្រុស អាយុ២៣ឆ្នាំ ជនជាតិខ្មែរ មុខរបរជាងដែក ទីលំនៅស្នាក់នៅភូមិទួលសុភី ឃុំព្រែកគយ ស្រុកស្អាង ខេត្តកណ្តាល និងទី២- ឈ្មោះ វង្ស ទួ ភេទប្រុស អាយុ២០ឆ្នាំ ជនជាតិខ្មែរ មុខរបរកម្មករសំណង់ មានទីលំនៅស្នាក់នៅភូមិទួលសុភី ឃុំព្រែកគយ ស្រុកស្អាង ខេត្តកណ្ដាល ។
បើតាមនគរបាលស្រុកស្អាង បានអោយដឹងថា ចំណែកជនរងគ្រោះទី១- ឈ្មោះ ភុយ ពេជ ភេទប្រុស អាយុ៣០ឆ្នាំ ជនជាតិខ្មែរ មុខរបរមេការក្នុងការដ្ឋាន មានទីលំនៅស្នាក់នៅភូមិទួលសុភី ឃុំព្រែកគយ ស្រុកស្អាង ខេត្តកណ្តាល និងទី២- ឈ្មោះ លុយ ប៊ុនធឿន ភេទប្រុស អាយុ៣២ឆ្នាំ ជនជាតិខ្មែរ មុខរបរកម្មករសំណង់ មានទីលំនៅភូមិកំពង់ពោធិ៍ត្បូង ឃុំក្រាំងយ៉ូវ ស្រុកស្អាង ខេត្តកណ្ដាល ។
នគរបាលបានអោយដឹងទៀតថា មុនកើតហេតុ នៅថ្ងៃទី២៩ ខែមករា ឆ្នាំ២០២២ វេលាម៉ោង៨យប់ ជនរងគ្រោះឈ្មោះ ភុយ ពេជ និងជនជាប់ចោទឈ្មោះ អ៊ុន ដារ៉ា បានទាស់ពាក្យសម្ដីគ្នា ហើយរៀបនឹងប្រើហិ.ង្សាដាក់គ្នាទៅហើយ តែត្រូវបានកម្មករនៅក្នុងការដ្ឋានជាមួយគ្នាឃាត់ទាន់ ហើយក៏បានចូលដេករៀងៗខ្លួនអស់ទៅ ។ លុះនៅថ្ងៃទី៣០ ខែមករា ឆ្នាំ២០២២ វេលាម៉ោង១៤និង១០នាទីរសៀល ជនរងគ្រោះឈ្មោះ ភុយ ពេជ បានដើរចេញពីការដ្ឋានមកក្រៅដើម្បីមកទិញម្ហូបហូបបាយ ក៏បានជួបជាមួយនឹងជនជាប់ចោទឈ្មោះ អ៊ុន ដារ៉ា និងជនជាប់ចោទម្នាក់ទៀតឈ្មោះ វង្ស ទួ បានជិះម៉ូតូកាត់ពីមុខជនរងគ្រោះ រួចបានរោទិ៍សំឡេងម៉ូតូខ្លាំងៗធ្វើការឌឺដងដាក់ជនរងគ្រោះឈ្មោះ ភុយ ពេជ រួចហើយក៏បានបបួលឈ្មោះ ភុយ ពេជ វ៉ៃគ្នាទៀត តែជនរងគ្រោះឈ្មោះ ភុយ ពេជ មិនបានតបតទៅវិញទេ រួចហើយក៏បានដើរទៅកន្លែងលក់ម្ហូបទៅ។
ប្រភពដដែលបន្តថា ពេលនោះជនសង្ស័យទាំងពីរនាក់ខាងលើ ក៏បានជិះតាមជនរងគ្រោះឈ្មោះ ភុយ ពេជ រហូតទៅដល់កន្លែងលក់ម្ហូបទៀតហើយក៏បានទាស់ពាក្យសម្ដីគ្នា បន្ទាប់មកជនសង្ស័យទាំង២នាក់បាននាំគ្នាព្រួតវាយទៅលើជនរងគ្រោះឈ្មោះ ភុយ ពេជ តែម្តង ក្រោយមកឈ្មោះ ភុយ ពេជ ក៏បានរត់ចូលទៅក្នុងការដ្ឋាន ហើយស្រែកអោយមិត្តភក្តិរបស់ខ្លួនជួយ។
ប្រភពដដែលបន្តទៀតថា ពេលនោះមានឈ្មោះ លុយ ប៊ុនធឿន និងឈ្មោះ ស៊ី ម៉េងហាក់ បានរត់ទៅជួយ តែត្រូវបានជនជាប់ចោទឈ្មោះ អ៊ុន ដារ៉ា យកដុំថ្មគប់សំដៅទៅលើឈ្មោះ លុយ ប៊ុនធឿន ត្រូវចំក្បាល បណ្តាលឱ្យបែកក្បាលហូរឈា.មដួលសន្លប់ទៅនឹងដីតែម្តង រួចហើយជនជាប់ចោទឈ្មោះ អ៊ុន ដារ៉ា និងជនជាប់ចោទឈ្មោះ វង្ស ទួ បាននាំគ្នារត់ចូលទៅក្នុងការដ្ឋាន តែក៏ត្រូវបានកម្មករនៅក្នុងការដ្ឋានចាប់ខ្លួនជាប់រួចប្រគល់ជូនសមត្ថកិច្ចតែម្តង ។
ក្រោយពេលទទួលបានព័ត៌មានខាងលើនេះភ្លាម កម្លាំងប៉ុស្តិ៍នគរបាលរដ្ឋបាលព្រែកគយ ក៏បានចុះទៅដល់កន្លែងកើតហេតុ រួចបាននាំខ្លួនជនសង្ស័យទាំងពីរនាក់ បញ្ជូនមកកាន់អធិការដ្ឋាននគរបាលស្រុកស្អាង ដើម្បីកសាងសំណុំរឿងចាត់ការតាមនីតិវិធីតែម្តងទៅ ។
ចែករំលែកព័តមាននេះ