រាជធានីភ្នំពេញ ៖ ក្រុមហ៊ុនទូរគមនាគមន៍ឈានមុខគេនៅកម្ពុជា មិត្តហ្វូន (MetFone) បានផ្តល់ស៊ីមកាតសំណាងដែលមានទឹកប្រាក់ប្រចាំខែ៣០ដុល្លាររយៈពេលមួយឆ្នាំទៅដល់សិស្សានុសិស្ស ទើបបញ្ចប់ការសិក្សា នៅតាមបណ្ដាសាលានានាចំនួន៨០០នាក់ បន្ទាប់ពីបានចុះហត្ថលេខាអនុស្សរណៈនៃការយោគយល់ជាមួយក្រសួងអប់រំ យុវជន និងកីឡា ស្តីពីកម្មវិធីផ្តល់អីុនធើរណេតមិនគិតថ្លៃទៅកាន់សាលារៀនរដ្ឋកាលពីថ្ងៃទី៥ កក្កដា កន្លងទៅ។
នៅក្នុងសិក្ខាសាលាស្ដីពីការផ្សព្វផ្សាយគេហទំព័រធនធានអប់រំ និងបណ្ដាញសង្គមផ្លូវការក្រសួងអប់រំ យុវជន និងកីឡា ដល់គុសិស្ស គរុនិស្សិត វិទ្យាស្ថានជាតិអប់រំ កាលពីថ្ងៃទី១១ កក្កដា នេះគឺបានបង្ហាញពីការបន្ត ការសហការគ្នាឲ្យកាន់តែមានភាពរឹងមាំថែមទៀត។
លោក អាដាម ជាក្រុមការងារមិត្តហ្វូន បានថ្លែងឲ្យដឹងថា ស៊ីមសំណាង គឺជាស៊ីមដែលក្រុមហ៊ុនផ្តល់សំណាងដល់គរុនិស្សិតដែលនិងបញ្ចប់ការសិក្សារក្នុងពេលខាងមុខនេះ នឹងទទួលបានជោគជ័យនៅក្នុងកិច្ចការរបស់ខ្លួន។ ហើយផ្តល់ជូនការប្រើប្រាស់ដោយមិនគិតថ្លៃរយៈពេលពេញមួយឆ្នាំដែលក្នុងមួយខែទទួលបានទឹកប្រាក់៣០ដុល្លារនៅក្នុងស៊ីមសម្រាប់ប្រើរយៈពេល១ខែ ។ មិត្តហ្វូនមិនចង់បានអ្វីវិញពីអ្នកទាំងអស់គ្នាទេ ប៉ុន្តែបងប្អូនប្រើប្រាស់វាមានន័យថា ចូលរួមចំណែកជាមួយមិត្តហ្វូន ដើម្បីកសាងប្រទេសជាតិ។ ក្រុមហ៊ុនផ្តល់ជូនតែសម្រាប់តែគរុសិស្សដែលរៀនចប់តែប៉ុណ្ណោះ»។
លោក អាដាម បានថ្លែងឲ្យដឹងថា ពេលពួកគេបញ្ចប់ការសិក្សា ពួកគេបានបើកទ្វារទៅកាន់ពិភពថ្មីដែល ពោរពេញដោយឱកាស ហើយយើងនឹងជូនដំណើរពួកគេឆ្ពោះទៅមុខ ។ លោកបានថ្លែងថា «យើងដឹងថា និស្សិតភាគច្រើនជួបនូវវិបត្តិហិរញ្ញវត្ថុ ពីព្រោះពួកគេត្រូវចំណាយច្រើនទៅលើការសិក្សា (មិនមានពេលស្វែងរកឱកាសការងារ) ។ ដូច្នេះយើងចង់ផ្ដល់ដល់ពួកគេនូវការប្រើប្រាស់អីុនធើរណេត ពេញលេញសម្រាប់ពង្រីកចំណេះដឹងបន្ថែមទៀត»។
លោក Helene Veal ប្រធានផ្នែកអភិវឌ្ឍន៍អាជីវកម្ម ដែលទើបតែងតាំងថ្មីរបស់ក្រុមហ៊ុនមិត្តហ្វូនបានឲ្យដឹងដែរថា នេះជាការជួបជុំលក្ខណៈមិត្តភាពមួយដែលគ្រាន់តែចង់ឲ្យពួកគេចងចាំក្នុងចិត្តបានច្បាប់ថា ថ្ងៃនេះ គឺជាថ្ងៃបញ្ចប់ការសិក្សាពួកគេ។
លោក Nguyen Thanh Nhuong អគ្គនាយកក្រុមហ៊ុន MetFone ធ្លាប់បានថ្លែងនៅក្នុងកម្មវីធីចុះហត្ថលេខាអនុស្សរណៈនៃការយោគយល់ថា ដោយឃើញពីសារប្រយោជន៍ពីការតភ្ជាប់អីុនធើរណេតនៅក្នុងវិស័យអប់រំ ក្រុមហ៊ុននឹងបន្តពង្រឹងកិច្ចសហប្រតិបត្តិការជាមួយក្រសួងអប់រំ ដើម្បីផ្តល់សេវាអីុនធើរណេតទៅកាន់គ្រឹះស្ថានអប់រំទាំងអស់នៅទូទាំងប្រទេស។
គួរបញ្ជាក់ផងដែរថា ក្រោមកម្រោង៥ឆ្នាំនៃកិច្ចព្រមព្រៀងនេះ ក្រុមហ៊ុន MetFone នឹងផ្តល់ការតភ្ជាប់អីុនធើរណេតដោយមិនគិតថ្លៃទៅកាន់សាលារៀនរដ្ឋ មជ្ឍមណ្ឌលបណ្តុះបណ្តាលគ្រូបង្រៀន សាកលវិទ្យាល័យ ការិយាល័យអប់រំយុវជននិងកីឡា និងការិយាល័យនៅក្រសួងអប់រំ ដែលមានសិស្ស លោកគ្រូអ្នកគ្រូ និងបុគ្គលិកអប់រំសរុបជិត១លាននាក់ទទួលអត្ថប្រយោជន៍ពីកម្មវិធីនេះ៕
ចែករំលែកព័តមាននេះ