រាជធានីភ្នំពេញ ៖ ឯកឧត្តម បួន លឹមហេង រដ្ឋលេខាធិការ ទីស្តីការគណៈរដ្ឋមន្ត្រី ដែលត្រូវបានគេស្គាល់ថាគឺជាប្រធានកិត្តិយសសហព័ន្ធកីឡាតេក្វាន់ដូ ITF បានជំរុញឲ្យចៅក្រម-អាជ្ញាកណ្តាល…
រាជធានីភ្នំពេញ ៖ ឯកឧត្តម បួន លឹមហេង រដ្ឋលេខាធិការ ទីស្តីការគណៈរដ្ឋមន្ត្រី ដែលត្រូវបានគេស្គាល់ថាគឺជាប្រធានកិត្តិយសសហព័ន្ធកីឡាតេក្វាន់ដូ ITF បានជំរុញឲ្យចៅក្រម-អាជ្ញាកណ្តាល ដែលបានឆ្លងកាត់វគ្គបណ្តុះបណ្តាលចៅក្រម អាជ្ញាកណ្តាល កម្រិត-កីឡាតេក្វាន់ដូ ITF ពីថ្ងៃទី២១ដល់ថ្ងៃទី២៦ ខែមករា ឆ្នាំ២០២២នេះត្រូវដុសខាត់សមត្ថភាពបន្ថែមទៀត ដើម្បីអភិវឌ្ឍជំនាញឲ្យបានល្អប្រសើរ ដើម្បីត្រៀមឆ្ពោះទៅទទួលរៀបចំធ្វើជាម្ចាស់ផ្ទះ ការប្រកួតកីឡា ស៊ីហ្គេម លើកទី៣២ ឆ្នាំ២០២៣។ ឯកឧត្តមមានប្រសាសន៍ថា វគ្គបណ្តុះបណ្តាលនេះ គឺជាសមិទ្ធផលថ្មីមួយ ក្រោមកិច្ចសហការពីក្រសួងអប់រំ យុវជន និងកីឡា ដែលជាអាណាព្យាបាលរបស់សហព័ន្ធកីឡាជាតិ ហើយតែងតែជួយផ្តល់សេវាបច្ចេកទេស ក៏ដូចជាការផ្តល់កញ្ចប់ថវិកាគាំទ្រ៤ឆ្នាំចុងក្រោយនេះ ដើម្បីជំរុញដល់ការអភិវឌ្ឍវិស័យកីឡាតេក្វាន់ដូ ITF ឲ្យកាន់តែរីកចម្រើនបន្ថែមទៀត។
«ប្រសិនបើមិនមានកញ្ចប់ថវិកាគាំរបស់ក្រសួងអប់រំទេ នោះពិតជាមានការលំបាក ក្នុងការបណ្តុះបណ្តាល កម្មវិធីហ្វឹកហាត់របស់កីឡាករ កីឡាការិនី ក៏ដូចជាសកម្មភាពប្រកួតនានាផងដែរ»។ ឯកឧត្តម បួន លឹមហេង បានផ្តល់អនុសាសន៍ថា ចៅក្រម-អាជ្ញាកណ្តាល ដែលឆ្លងកាត់ការសិក្សាក្នុងវគ្គកម្រិតខ្ពស់នេះ គប្បីមានស្មារតីក្រេបជញ្ចក់ចំណេះវិជ្ជាបន្ថែមទៀត ពោលគឺត្រូវរៀនហើយរៀនទៀត ដើម្បីពង្រឹងសមត្ថភាពឲ្យកាន់តែល្អ ពីព្រោះថា កម្ពុជាកំពុងត្រៀមឆ្ពោះទៅទទួលរៀបចំធ្វើជាម្ចាស់ផ្ទះ ការប្រកួតកីឡា ស៊ីហ្គេម លើកទី៣២ ឆ្នាំ២០២៣ ជាប្រវត្តិសាស្ត្រដំបូង។ ដូច្នេះក្រៅពីការប្រកួតប្រជែងមេដាយរបស់កីឡាករ កីឡាការិនី គឺយើងក៏ត្រៀមចៅក្រម-អាជ្ញាកណ្តាលចូលរួមកាត់សេចក្តី ក្នុងឋានៈជាម្ចាស់ផ្ទះផងដែរ។ ជាមួយនឹងការត្រៀមឆ្ពោះទៅទទួលធ្វើម្ចាស់ផ្ទះស៊ីហ្គេម ឆ្នាំ២០២៣នេះ ឯកឧត្តមក៏រំភើបរីករាយណាស់ ដែលប្រមុខរាជរដ្ឋាភិបាលកម្ពុជា សម្តេចតេជោ ហ៊ុន សែន តែងតែផ្តល់ការលើកទឹកចិត្តដ៏ខ្ពង់ខ្ពស់ចំពោះសហព័ន្ធកីឡាជាតិទាំងអស់។
ជាមួយគ្នានោះ ឯកឧត្តមផ្តល់ការលើកទឹកចិត្តដល់ចៅក្រម-អាជ្ញាកណ្តាលនានាឲ្យខិតខំដុះខាត់សមត្ថភាពឲ្យបានរឹងមាំបន្ថែម នៅក្នុងការប្រកួតកីឡាតេក្វាន់ដូ ITF ជ្រើសរើសជើងឯកថ្នាក់ជាតិ ប្រចាំឆ្នាំ២០២១ នាថ្ងៃទី២៧-២៩ ខែមករា ឆ្នាំ២០២២។ ឯកឧត្តម អ៊ុ ណារិន្ទ អគ្គលេខាធិការងសហព័ន្ធ និងជាប្រធានគ្រប់គ្រងវគ្គនេះបញ្ជាក់ថា វគ្គនេះមានចៅក្រម-អាជ្ញាកណ្តាល ៣០នាក់មកពី៩ខេត្ត-ក្លឹប ដែលមានគ្រូឧទ្ទេស Master RI CHOL NAM មកពីប្រទេសកូរ៉េខាងជើងជើង កម្រិតខ្សែក្រវាត់៨ដាន់ ដែលជាប្រធានបច្ចេកទេសសហព័ន្ធតេក្វាន់ដូ ITF អាស៊ី និងជាគ្រូបង្វឹកក្រុមជម្រើសជាតិកម្ពុជា និងគ្រូឧទ្ទេស លោក ហ៊ឹម រីដា ដែលជាគ្រូជម្រើសជាតិកម្ពុជា និងជាចៅក្រមអន្តរជាតិផងដែរ។ ចំពោះលទ្ធផលនៃវគ្គបណ្តុះបណ្តាលនេះ គឺសិក្ខាកាម១០នាក់ទទួលបាននិទ្ទេសល្អ ១២នាក់ ល្អបង្គួរ និង៨នាក់ និទ្ទេសមធ្យម៕ ដោយ ៖ ផាត់ តារារដ្ឋ
ចែករំលែកព័តមាននេះ