រាជធនីភ្នំពេញ ៖ គរុសិស្ស និងគរុនិស្សិតដែលទើបតែបញ្ចប់ការសិក្សាមកពីបណ្តាសាលាឯកជននានាចំនួន៨០០នាក់ ទទួលបានស៊ីមកាតភ្ជាប់អីុនធើរណេតឥតគិតថ្លៃពីក្រុមហ៊ុនមិត្តហ្វូន។ ការផ្តល់ជូននេះក្នុងគោលបំណងឱ្យសិស្ស-និស្សិតមានលទ្ធភាពបន្ថែមទៅលើការសិក្សាស្រាវជ្រាវ ដើម្បីទទួលបានជោគជ័យនៅក្នុងការងាររបស់ខ្លួន ដោយក្នុងមួយខែៗក្រុមហ៊ុនផ្តល់ជូនទឹកប្រាក់ដោយស្វ័យប្រវត្តិចំនួន៣០% មានរយៈពេលមួយឆ្នាំ។
ការផ្តល់ជូនស៊ីមកាតរបស់ក្រុមហ៊ុនមិត្តហ្វូនធ្វើឡើងក្នុងសិក្ខាសាលាផ្សព្វផ្សាយគេហទំព័រធនធានអប់រំនិងបណ្តាញសង្គមផ្លូវការក្រសួងអប់រំ យុវជន និងកីឡា ដល់គរុសិស្ស គរុនិស្សិត វិទ្យាស្ថានជាតិអប់រំ កាលពីថ្ងៃទី៩ កក្កដា។
លោកស្រី គឹម សេដ្ឋានី រដ្ឋលេខាធិការក្រសួងអប់រំ យុវជន និងកីឡា បានមានប្រសាសន៍ថា សិក្ខាសាលានេះ ធ្វើឡើងក្នុងគោលបំណងផ្សព្វផ្សាយឲ្យទូលំទូលាយដល់លោកគ្រូ អ្នកគ្រូជាសាស្ត្រាចារ្យ គរុសិស្ស និងគរុនិស្សិត អំពីមជ្ឈមណ្ឌលធនធានអប់រំអេឡិចត្រូនិក និងទំព័រហ្វេសប៊ុកផ្លូវការរបស់ក្រសួង ដែលមានផ្ដល់ជូននូវឯកសារឌីជីថលដ៏សម្បូរបែបជាប្រយោជន៍ដល់សិស្ស និស្សិត អ្នកសិក្សាស្រាវជ្រាវ សាធារណជនទូទៅ មានលទ្ធភាពស្វែងរកឯកសារសិក្សាបានគ្រប់ពេលវេលា គ្រប់ទីកន្លែង និងអនុញ្ញាតឲ្យធ្វើការដាក់បញ្ចូលកិច្ចការស្រាវជ្រាវឯកសារអប់រំ ដើម្បីចែករំលែកចំណេះដឹងគ្រប់កម្រិតពីមត្តេយ្យសិក្សារហូតដល់ឧត្ដមសិក្សាដោយផ្អែកលើបច្ចេកវិទ្យាជាមូលដ្ឋាន ស្របតាមទិសដៅកំណែទម្រង់អប់រំ និងគោលនយោបាយ ស្ដីពីចក្ខុវិស័យឧត្ដមសិក្សា ២០៣០។
លោក អាដាម តំណាងក្រុមការងារមិត្តហ្វូនបានឱ្យដឹងថា ការផ្តល់ស៊ីមកាតមានភ្ជាប់អីុនធើរណេតនេះ នឹងអាចជួយសម្រួលដល់និស្សិតក្នុងការសិក្សាស្រាវជ្រាវ និងជួយកាត់បន្ថយការចំណាយទៅលើអីុនធើរណេត។
គួររលឹកថា កាលពីថ្ងៃទី៥ កក្កដា ២០១៦ កន្លងទៅថ្មីៗនេះ លោកបណ្ឌិត ហង់ ជួនណារ៉ុន រដ្ឋមន្ត្រីក្រសួងអប់រំ យុវជន និងកីឡា និងលោក Nguyen Thanh Nhuong អគ្គនាយកក្រុមហ៊ុនមិត្តហ្វូន បានចុះហត្ថលេខាលើអនុស្សរណៈនៃការយោគយល់ស្តីពី «កម្មវិធីអីុនធើរណេតតាមសាលារៀន»។ តាមរយៈកិច្ចព្រមព្រៀងរយៈពេល៥ឆ្នាំនេះ ក្រុមហ៊ុននឹងផ្តល់សេវាកម្មវិធីអ៊ីនធើរណេតល្បឿនលឿនដោយមិនគិតកម្រៃនៅតាមសាលារៀនសាធារណៈ គ្រឹះស្ថានបណ្តុះបណ្តាលគ្រូ សាកលវិទ្យាល័យរដ្ឋ និងអង្គភាពរដ្ឋបាលអប់រំថ្នាក់ជាតិ និងក្រោមជាតិនៅទូទាំងប្រទេស។ MOU នេះ អាចផ្តល់នូវលទ្ធភាពចែករំលែកធនធានបង្រៀន និងផ្តល់ការសិក្សាតាមបណ្តាញអ៊ីនធើរណេតបានយ៉ាងទូលំទូលាយ៕
ចែករំលែកព័តមាននេះ