ភ្នំពេញ៖ ក្រសួងទេសចរណ៍ នៅថ្ងៃទី២១ ខែមករានេះ បានប្រកាសពីលទ្ធផលសំខាន់ៗនៃកិច្ចប្រជុំរដ្ឋមន្ត្រីទេសចរណ៍អាស៊ាន លើកទី២៥ និងកិច្ចប្រជុំពាក់ព័ន្ធ។ នោះគឺរដ្ឋមន្ត្រីទេសចរណ៍អាស៊ាន បានគាំទ្រ និងទទួលអនុវត្តនូវអនុសាសន៍ដ៏ខ្ពង់ខ្ពស់របស់សម្តេចតេជោ នាយករដ្ឋមន្ត្រី ហ៊ុន សែន ដែលជាប្រធានអាស៊ាន ឲ្យពិភាក្សាបើកទេសចរណ៍អាស៊ានឡើងវិញ ដោយត្រូវជំរុញបើកទេសចរណ៍ផ្ទៃក្នុងរបស់ខ្លួន ឲ្យបានឆាប់ចំពោះមុខ តាមរយៈការគិតគូររៀបចំអនុវត្តច្រករបៀងនៃការធ្វើដំណើរក្នុងតំបន់អាស៊ាន ការគិតគូរបង្កើតឲ្យមានប្រព័ន្ធរួមទទួលស្គាល់ការចាក់វ៉ាក់សាំង ដូចជា លិខិតបញ្ជាក់ការចាក់វ៉ាក់សាំង តាមប្រព័ន្ធឌីជីថល ជាដើម។
ទន្ទឹមនឹងនេះ រដ្ឋមន្ត្រីទេសចរណ៍អាស៊ាន ក៏បានឯកភាពជំរុញអនុវត្តផែនការ និងគោលការណ៍ដែលបានអនុម័ត មានដូចជា ផែនការស្តារវិស័យទេសចរណ៍អាស៊ានឡើងវិញ និងគោលការណ៍ណែនាំអាស៊ាន ស្តីពី វិធានសុវត្ថិភាព និងអនាម័យអាស៊ាន ស្របតាមសេចក្តីថ្លែងការណ៍ភ្នំពេញ ស្តីពីទេសចរណ៍អាស៊ាន ប្រកបដោយចីរភាព បរិយាបន្ន និងភាពធន់កាន់តែប្រសើរ។
តាមសេចក្តីប្រកាសដដែល រដ្ឋមន្ត្រីទេសចរណ៍អាស៊ាន បានពិភាក្សា និងពិនិត្យឃើញថា ប្រទេសសមាជិកនិមួយៗ មានលក្ខណៈគ្រប់គ្រាន់សមស្របក្នុងការបើកទេសចរណ៍អន្តរជាតិ ជាបណ្តើរៗ ក្នុងបរិបទកូវីដ១៩។ ក្នុងន័យនេះ នាឱកាសវេទិកាទេសចរណ៍អាស៊ាន ឆ្នាំ២០២២ រដ្ឋមន្ត្រីទេសចរណ៍អាស៊ាន បានឯកភាពគ្នា ប្រកាសចេញពីខេត្តព្រះសីហនុ របស់កម្ពុជា បើកទេសចរណ៍អាស៊ានឡើងវិញ ក្រោមបរិបទកូវីដ១៩ ទាំងទេសចរណ៍ផ្ទៃក្នុងអាស៊ាន និងទេសចរណ៍អន្តរជាតិ។
រដ្ឋមន្ត្រីទេសចរណ៍អាស៊ាន ក៏បានលើកទឹកចិត្តឲ្យពង្រឹងកិច្ចសហប្រតិបត្តិការឡើងវិញថែមទៀត ជាមួយដៃគូអន្តរជាតិ សមាគមទេសចរណ៍នានា និងផ្នែកឯកជន ដើម្បីបង្កើនការចូលរួមជ្រោមជ្រែងការបើកទេសចរណ៍តំបន់ឡើងវិញ ប្រកបដោយភាពរលូន និងកំណើន។
រដ្ឋមន្ត្រីទេសចរណ៍អាស៊ាន បានអះអាងជាថ្មី ជំរុញ ការអភិវឌ្ឍទេសចរណ៍តំបន់ឲ្យក្លាយជាគោលដៅទេសចរណ៍តែមួយប្រកបដោយសុវត្ថិភាព និងភាពកក់ក្តៅ៕
ចែករំលែកព័តមាននេះ