មណ្ឌលហែលទឹកនៅបាត់ដំបង ចាត់ទុកជាទីតាំងប្រកួតថ្នាក់ជាតិ ឈានដល់កម្រិតអន្តរជាតិ
- បាត់ដំបង
ខេត្តបាត់ដំបង ៖ ក្នុងពិធីសម្ពោធមណ្ឌលហែលទឹកធំមួយ នៅខេត្តបាត់ដំបង សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋ
ខេត្តបាត់ដំបង ៖ ក្នុងពិធីសម្ពោធមណ្ឌលហែលទឹកធំមួយ នៅខេត្តបាត់ដំបង សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានប្រកាសក្នុងពិធីសម្ពោធដាក់ឱ្យប្រើប្រាស់ជាផ្លូវការនោះ មណ្ឌលហែលទឹកបាត់ដំបង នឹងក្លាយទីតាំងសម្រាប់ការប្រកួតជ្រើសរើសជើងឯកថ្នាក់ជាតិក្នុងពេលបន្តបន្ទាប់ និង អាចឈានដល់ការប្រកួតកម្រិតអន្តរជាតិផង ដោយសារតែអាងហែលទឹកដ៏ធំនេះ ត្រូវបានសាងសងឡើងប្រកបដោយបទដ្ឋានអន្តរជាតិ ហើយសម្រាប់បម្រើអោយការប្រកួតហែលទឹកធំៗ។ ជាក់ស្ដែង ការប្រកួតប្រចាំឆ្នាំ២០២១ ដែលបានប្រារព្ធធ្វើឡើង កាលពីល្ងាចថ្ងៃទី១០ ខែមករា ឆ្នាំ២០២១ ស្ថិតនៅក្នុងសាកលវិទ្យាល័យបាត់ដំបង ខេត្តបាត់ដំបង គឺជាសាក្សីស្រាប់បង្ហាញពីសក្កានុពល។
សម្ដេចក្រឡាហោម ស ខេង មានប្រសាសន៍ថា មណ្ឌលកីឡាហែលទឹកបាត់ដំបងនេះ គឺស្ថិតក្នុងចំណោមអាងហែលទឹកថ្មីៗដែលបានសាងសង់ បន្ទាប់ពីមណ្ឌលហែលទឹកកំពង់ចាម និងនៅស្រុកកោះធំខេត្តកណ្ដាល ហើយថាសម្រាប់មណ្ឌលកីឡាហែលទឹកបាត់ដំបងនេះ គឺត្រូវបានសាងសង់ឡើងដោយប្រើប្រាស់ថវិកាពីសប្បុរសជន។ សម្ដេចឧបនាយករដ្ឋមន្ត្រីក៏បានរម្លឹកផងដែរថា នេះគឺជាសមិទ្ធិផល កើតចេញពីថ្ងៃ៧មករា ដែលជាកាលបរិច្ឆេទប្រវត្តិសាស្ត្រនៃការផ្ដួលរំលំរបបខ្មែរ រហូតរំដោះប្រជាជនឱ្យរួចផុតពីរបបប្រល័យពូជសាសន៍ ហើយឈានដល់ការអភិវឌ្ឍជាតិពីស្ថានភាពនៃប្រទេសដែលគ្មានសេសសល់អ្វីសោះរហូតរីកចំរើនដូចសព្វថ្ងៃនេះ។
សម្ដេចក្រឡាហោម ស ខេង បានបន្ថែមថា ដោយសារកត្តាសុខសន្តិភាព និងការអភិវឌ្ឍ កម្ពុជាបាននិងកំពុងរៀបចំព្រឹត្តិការណ៍សំខាន់ៗជាបន្តបន្ទាប់ ជាក់ស្ដែងឆ្នាំ២០២២នេះ កម្ពុជាបានទទួលតួនាទីជាប្រធានអាស៊ាន និងនៅឆ្នាំ២០២៣កម្ពុជានឹងធ្វើជាម្ចាស់ផ្ទះការប្រកួតកីឡា ស៊ីហ្គេម លើកទី៣២ និងអាស៊ានប៉ារ៉ាហ្គេម ឆ្នាំ២០២៣ ជាប្រវត្តិសាស្ត្រដំបូងរបស់ព្រះរាជាណាចក្រកម្ពុជា។ ជាមួយគ្នានោះ សម្តេចក៏បានលើកទឹកចិត្តឱ្យវិស័យកីឡាហែលទឹក ក៏ដូចជាប្រភេទកីឡាផ្សេងៗទៀតត្រូវបន្តការខិតខំអភិវឌ្ឍឲ្យកាន់តែរីកចម្រើនបន្ថែមទៀត ដើម្បីប្រជែងមេដាយ នៅក្នុងព្រឹត្តិការណ៍ជាប្រវត្តិសាស្ត្រនេះ។ ដើម្បីរួមចំណែកអភិវឌ្ឍន៍វិស័យកីឡាហែលទឹកនៅកម្ពុជា សម្ដេចក្រឡាហោម ស ខេង បានផ្ដល់អនុសាសន៍សំខាន់ៗជូនក្រសួងអប់រំ យុវជន និងកីឡា ព្រមទាំងសហព័ន្ធកីឡាហែលទឹកកម្ពុជាផងដែរ។
លោកទេសរដ្ឋមន្ត្រី ស៊ុន ចាន់ថុល ប្រធានសហព័ន្ធខ្មែរកីឡាហែលទឹកមានប្រសាសន៍ថា គោលបំណងលើកស្ទួយ និង អភិវឌ្ឍវិស័យកីឡាហែលទឹកកម្ពុជា ពិសេសកីឡាហែលទឹកខេត្តបាត់តំបងឈានទៅការប្រកួត ដណ្តើមមេដាយលើឆាកអន្តរជាតិ និងក្នុងការប្រកួតកីឡាអាស៊ីអគ្នេយ៍ (ស៊ីហ្គេម) ឆ្នាំ២០២៣ ខាងមុខ ដែលកម្ពុជាធ្វើជាម្ចាស់ផ្ទះ ក៏ដូចជាស្តារកេរ្តិ៍ឈ្មោះវិស័យកីឡាហែលទឹកកម្ពុជា ដែលធ្លាប់មានភាពរុងរឿងក្នុងសម័យសង្គមរាស្ត្រនិយម ពីការបំផ្លិចបំផ្លាញដល់ឫសគល់នៃរបបប្រល័យ ពូជសាសន៍ ប៉ុល ពត។ លោកក៏ប្រកាសថា មណ្ឌលហែលទឹកថ្មីនេះ នឹងបម្រើអោយការប្រកួតហែលទឹកក្នុងពេលបន្តបន្ទាប់ ដើម្បីជាមុខមាត់ក្នុងវិស័យហែលទឹកនៅកម្ពុជាផងដែរ។
លោក ហែម គីរី អគ្គលេខាធិការ សហព័ន្ធខ្មែរកីឡាហែលទឹកបានបង្ហាញចំណាប់អារម្មណ៍ថា នេះគឺសមិទ្ធផលធំមួយ ដើម្បីបម្រើអោយវិស័យហែលទឹក ហើយលទ្ធផលបច្ចេកទេសនៃការប្រកួតជើងឯកថ្នាក់ជាតិដែលបានដំណើរការ ក៏បង្ហាញយ៉ាងច្បាស់ថា អាងហែលទឹកដ៏ស្ដង់ដានេះ មានសក្កានុពលគ្រប់គ្រាន់សម្រាប់ការប្រកួតហែលទឹក។ មណ្ឌលហែលទឹកនេះ ក៏នឹងជំរុញអោយវិស័យហែលទឹកនៅខេត្តបាត់ដំបង និង អ្នករស់នៅខេត្តជុំវិញ អាចក្លាយជាធនធានអ្នកហែលទឹកកាន់តែប្រសើរ ដើម្បីការរីកចំរើននៃកីឡាមួយនេះផងដែរ ៕
ចែករំលែកព័តមាននេះ