Lionel Messi និងមិត្តរួមក្រុម៣នាក់ផ្សេងទៀត ឆ្លងកូវីដ-១៩
បារាំង ៖ ខ្សែប្រយុទ្ធឆ្នើម Lionel Messi រួមជាមួយមិត្តរួមក្រុម៣នាក់ផ្សេងទៀត បានធ្វើតេស្តវិជ្ជមានជំងឺកូវីដ-១៩។ នេះបើយោង
បារាំង ៖ ខ្សែប្រយុទ្ធឆ្នើម Lionel Messi រួមជាមួយមិត្តរួមក្រុម៣នាក់ផ្សេងទៀត បានធ្វើតេស្តវិជ្ជមានជំងឺកូវីដ-១៩។ នេះបើយោងតាមសេចក្តីប្រកាសរបស់ក្លិប PSG កាលពីថ្ងៃទី២ ខែមករា ឆ្នាំ ២០២២។
ខ្សែប្រយុទ្ធអាហ្សង់ទីន Lionel Messi និងមិត្តរួមក្រុម៣នាក់ផ្សេងទៀតគឺ ខ្សែការពារ Juan Bernat ខ្សែបម្រើ Nathan Bitumazala និងអ្នកចាំទី Sergio Rico ត្រូវបានបញ្ជាក់ថា ឆ្លងជំងឺកូវីដ-១៩ មួយថ្ងៃមុនពេលការប្រកួតពានរង្វាន់ French Cup ដែល PSG ត្រូវតទល់នឹងក្រុម Vannes មកពីលីគលំដាប់ទី៤ នៅរាត្រីនេះ។ បច្ចុប្បន្នកីឡាករទាំង៤រូបកំពុងដាក់ខ្លួននៅដាច់ដោយឡែក ដើម្បីទទួលការព្យាបាល។
ជាមួយគ្នានោះ អំឡុងពេលសន្និសីទសារព័ត៌មានមុនការប្រកួតនៅរាត្រីនេះ លោក Mauricio Pochettino គ្រូបង្វឹកក្រុម PSG បានបញ្ជាក់ថា លោកមិនអាចកំណត់កាលបរិច្ឆេទវិលត្រឡប់មកវិញរបស់ Messi បានទេ។
ការប្រកួតលើកដំបូងបំផុតរបស់ PSG នៅក្របខណ្ឌ Ligue 1សម្រាប់ឆ្នាំ ២០២២ នឹងត្រូវតទល់ជាមួយក្រុម Lyon នៅថ្ងៃទី៩ ខែមករា ដែលមានន័យថា វត្តមាន Messi កំពុងស្ថិតក្នុងស្រពេចស្រពិល។ ស្របពេលដែលខ្សែប្រយុទ្ធ Neymar នឹងខកខានជំនួបនេះ ដោយសាររូបគេកំពុងបន្តសម្រាកព្យាបាលរបួសកជើងនៅប្រទេសប្រេស៊ីល។
គួរបញ្ជាក់ថា បច្ចុប្បន្ន PSG កំពុងឈរនៅកំពូលតារាង Ligue 1 ដោយមាន៤៦ពិន្ទុ ក្រោយឆ្លងកាត់១៩ប្រកួតកន្លងមក និងដាច់១៣ពិន្ទុពីក្រុម Nice ដែលឈរនៅលេខ២៕ (ដកស្រង់ចេញពី France24)
ចែករំលែកព័តមាននេះ