តាមAFP បានផ្សាយថា អង្គការពលកម្មអន្តរជាតិ(ILO) បានអះអាងថា ទោះបីមានការងើបឡើងវិញផ្នែកសេដ្ឋកិច្ចនៅទូទាំងពិភពលោកក្តីក៏មិនធ្វើឱ្យកើតមានការជួលបុគ្គលិកបន្ថែមដែរ ពីព្រោះអត្រាគ្មានការងារធ្វើនៅទូទាំងពិភពលោកនៅតែកើនខ្ពស់ជាប្រវត្តិសាស្ត្រគឺដល់ទៅ២០៥លាននាក់ក្នុងឆ្នាំ២០១០។ ILO បញ្ជាក់ថា ទោះបីជាមានការរីកចំរើនផ្នែកសេដ្ឋកិច្ចនៅបណ្តាប្រទេសជាច្រើនក៏ដោយ ប៉ុន្តែអត្រាអត់ការងារធ្វើនៅទូទាំងពិភពលោកជាផ្លូវការនៅតែមានរហូតដល់២០៥លាននាក់ ដូចកាលពីឆ្នាំ២០០៩ និងច្រើនជាងអំឡុងពេលកើតវិបត្តិសេដ្ឋកិច្ចពិភពលោក នៅក្នុងឆ្នាំ២០០៧ ដែលមានចំនួន២៧,៦លាននាក់ ។
ILO បានព្យាករណ៍ទុកថា អត្រាអត់ការងារធ្វើនៅទូទាំងពិភពលោកនឹងស្ថិតក្នុងកំរិត៦,១% ឬស្មើនឹង២០៣,៣លាននាក់ ក្នុងឆ្នាំ២០១១។ ជាងពាក់កណ្តាលនៃការគ្មានការងារធ្វើដែលកើតមានតាំងពីឆ្នាំ២០០៧ គឺស្ថិតនៅក្នុងប្រទេសឧស្សាហកម្ម និងសហគមន៍អឺរ៉ុប ។ ចំណែកនៅក្នុងប្រទេសកំពុងអភិវឌ្ឍន៍ដូចជាប្រេស៊ីល កាហ្សាក់ស្ថាន និងថៃជាដើមអត្រាគ្មានការងារធ្វើស្ថិតក្នុងកំរិតទាបជាងមុនពេលកើតវិបត្តិសេដ្ឋកិច្ច ។
ក្រៅពីការគ្មានការងារធ្វើ ប្រជាពលរដ្ឋនៅទូទាំងពិភពលោកប្រហែល១.៥៣០លាននាក់នៅជួបប្រទះនឹងស្ថានភាពការងារមិនស្ថិតស្ថេរដូចជាការស៊ីឈ្នួលបំរើបណ្តោះអាសន្ន ជាដើម ។ ស្ថានភាពនៃការជួលការងារដែលគ្មានស្ថិរភាពនៅមិនមានការផ្លាស់ប្តូរចាប់តាំងពីឆ្នាំ២០០៨ មកផ្ទុយស្រឡះពីអត្រាធ្លាក់ចុះជាបន្តបន្ទាប់ និងមានអត្ថន័យសំខាន់ក្នុងអំឡុងពេលជាច្រើនឆ្នាំមុនកើតវិបត្តិសេដ្ឋកិច្ច។ចំពោះតួលេខអ្នកគ្មានការងាររបស់មនុស្សដែលមានលទ្ធភាពបំពេញការងារធ្វើមានកំរិតគួរឱ្យភ្ញាក់ផ្អើលគឺដល់ទៅ៧៨លាននាក់ ក្នុងឆ្នាំ២០១០កើនលើសពីមុនពេលកើតវិបត្តិសេដ្ឋកិច្ចក្នុងឆ្នាំ២០០៧ ដែលមានត្រឹមតែ៧៣,៥លាននាក់ ៕
ចែករំលែកព័តមាននេះ