មជ្ឈមណ្ឌលគ្រប់គ្រង និងបង្ការជំងឺរបស់សហរដ្ឋអាមេរិក (CDC) បានធ្វើបច្ចុប្បន្នភាពគោលការណ៍ណែនាំរបស់ខ្លួនអំពីការពាក់ម៉ាស់ដើម្បីឆ្លើយតបទៅនឹងការចម្លងរបស់កូវីដអូមីក្រុង។ ឥឡូវនេះ កូវីដអូមីក្រុង បានក្លាយជាទម្រង់លេចធ្លោបំផុតនៃមេរោគឆ្លងនៅក្នុងសហរដ្ឋអាមេរិក ដែលជាការវិវឌ្ឍន៍ដ៏សំខាន់មួយនៅក្នុងជំងឺរាតត្បាត។ ឥឡូវនេះ CDC បានណែនាំប្រជាជនឱ្យមានការប្រុងប្រយ័ត្នបន្ថែមប្រឆាំងនឹងកូវីដប្រភេទនេះ។​

CDC បាននិយាយថា៖ “កូវីដអូមីក្រុង ទំនងជានឹងរីករាលដាលកាន់តែងាយស្រួលជាងវីរុសកូវីដផ្សេងៗទៀត ហើយថាតើអូមីក្រុងងាយឆ្លងជាងប្រភេទដែលតាដល់កម្រិតណានោះ គឺមិនទាន់ដឹងនៅឡើយទេ។ គេគ្រាន់តែដឹងថា វាអាចចម្លងទៅអ្នកដែលចាក់វ៉ាក់សាំងរួច និង អ្នកដែលធ្លាប់ឆ្លងម្តងមកហើយ។ ដូចនេះ ការពាក់ម៉ាស់នៅទីសាធារណៈនៅតែជាចាំបាច់។”

លោកវេជ្ជបណ្ឌិត William Schaffner សាស្ត្រាចារ្យផ្នែកគោលនយោបាយសុខភាព និងជំងឺឆ្លងនៅសាលាវេជ្ជសាស្ត្រនៃសាកលវិទ្យាល័យ Vanderbilt បាននិយាយថា ការពាក់ម៉ាសប្រហែលជាមិនមានប្រសិទ្ធភាពក្នុងការបញ្ឈប់ការឆ្លងកូវីដអូមីក្រុងនោះទេ តែវាអាចកាត់បន្ថយអត្រានៃការឆ្លងបាន។

លោកវេជ្ជបណ្ឌិតនៅតែគាំទ្រ ការពាក់ម៉ាស់ជានិច្ច ហើយលោកមានប្រសាសន៍ថា យើងគួរតែទ្រាំនឹងការពាក់ម៉ាស់សិនទៅ ព្រោះថាវានឹងមិននៅបែបនេះរហូតនោះទេ។ នេះក៏ដោយសារតែកូវីដនឹងបាត់នៅថ្ងៃណាមួយ ដែលយើងមិនទាន់ដឹង។

ជាមួយគ្នានេះដែរ លោក Tedros Adhanom Ghebreyesus អគ្គនាយកអង្គការសុខភាពពិភពលោកបាននិយាយកាលពីថ្ងៃចន្ទថា លោកកំពុងតែបារម្ភពីការរីករាលដាលលឿននូវការឆ្លងកូវីដអូមីក្រុង ហើយការឆ្លងនេះគឺភាគច្រើនលើអ្នកដែលបានចាក់វ៉ាក់សាំងរួច។ ដូចនេះការពាក់ម៉ាស់និងការរក្សាគម្លាត គឺនៅតែសំខាន់៕