មានអគ្គិភ័យមួយបានឆាបឆេះបង្កឱ្យក្លាយជាអណ្ដាតភ្លើងយ៉ាងសន្ធោសន្ធៅ រហូតលេបត្របាក់អស់ឃ្លាំងស្តុកសម្ភារៈថតស្ពតផ្សព្វផ្សាយពាណិជ្ជកម្មចំនួន០១ និងសម្ភារៈនៅខាងក្នុងឃ្លាំង
រាជធានីភ្នំពេញ ៖ បើតាមសេចក្តីរាយការណ៍បានឱ្យដឹងថា មានអគ្គិភ័យមួយបានឆាបឆេះបង្កឱ្យក្លាយជាអណ្ដាតភ្លើងយ៉ាងសន្ធោសន្ធៅ រហូតលេបត្របាក់អស់ឃ្លាំងស្តុកសម្ភារៈថតស្ពតផ្សព្វផ្សាយពាណិជ្ជកម្មចំនួន០១ និងសម្ភារៈនៅខាងក្នុងឃ្លាំងអស់ទាំងស្រុង បង្កឱ្យមានការភ្ញាក់ផ្អើលកាលពីវេលាម៉ោង៧យប់ ថ្ងៃទី១៩ ខែធ្នូ ឆ្នាំ២០២១ នៅចំណុចឃ្លាំងក្រុមហ៊ុន ហាវ៉ាស់ រីវើអឃីត ផ្ទះលេខ25A តាមបណ្តោយផ្លូវលេខ៥៦៦ ក្រុម៤៤ ស្ថិតក្នុងភូមិ១១ សង្កាត់បឹងកក់ទី១ ខណ្ឌទួលគោក ។
សេចក្តីរាយការណ៍បានឱ្យដឹងថា ម្ចាស់ទីតាំងកើតហេតុខាងលើនេះ មានឈ្មោះ ឌុច លីដេ ភេទស្រី អាយុ៤១ឆ្នាំ មុខរបរប្រធានផ្នែកផ្សព្វផ្សាយ បានប្រាប់សមត្ថកិច្ចអោយដឹងថា ឃ្លាំងខាងលើ មានទំហំ១០ម៉ែត្រx៣០ម៉ែត្រ ជាប្រភេទសំណង់ថ្មបេតុងប្រក់ស័ង្កសី ។ ហើយចំពោះមូលហេតុដែលបណ្តាលឲ្យឆាបឆេះនេះ គឺមកពីឆ្លងចរន្តអគ្គិសនី។
ម្ចាស់ទីតាំងខាងលើបន្តថា ចំណែកសម្ភារៈដែលខូចខាតរួមមាន ៖ ឃ្លាំងស្តុកទុកសម្ភារៈបម្រើការងារថតស្ពតផ្សព្វផ្សាយពាណិជ្ជកម្មទំហំ១០ម៉ែត្រx៣០ ម៉ែត្រ អស់ចំនួន១ឃ្លាំង និងសម្ភារៈខាងក្នុងអស់ទាំងស្រុង ហើយនៅក្នុងហេតុការណ៍នេះដែរ ពុំបណ្តាលឲ្យឆេះរាលដាលដល់ផ្ទះអ្នកនៅក្បែរខាងឡើយ ។
បើតាមប្រភពពីអ្នកយាមឃ្លាំងសុំមិនប្រាប់ឈ្មោះ ក៏បានប្រាប់ក្រុមការងារអោយដឹងដែរថា មុនកើតហេតុ គាត់បានឃើញមានអណ្ដាតភ្លើងឆេះចេញពីប្រអប់ភ្លើងនៅកណ្តាលឃ្លាំងយ៉ាងសន្ធោសន្ធៅបាត់ទៅ ហើយទម្រាំគាត់ដឹងខ្លួននោះ គឺឆេះមានស្ថានភាពខ្លាំងគ្រប់គ្រងមិនឈ្នះឡើយ ទើបបង្កឱ្យក្លាយជាអណ្ដាតភ្លើងឆេះរាលដាលពេញក្នុងឃ្លាំងតែម្តង ហើយក៏បានរាយការណ៍ប្រាប់សមត្ថកិច្ច ដើម្បីសុំរថយន្ដពន្លត់អគ្គិភ័យចេញអន្តរាគមន៍សង្គ្រោះ ។
ពាក់ព័ន្ធនឹងអគ្គិភ័យខាងលើនេះ គឺបានប្រើប្រាស់រថយន្តការិយាល័យបង្ការពន្លត់អគ្គិភ័យអស់ចំនួន២៥ឡាន ស្មើនឹង១០០ម៉ែត្រគូប ។ ហើយក្នុងនោះរថយន្តអគ្គិភ័យក្រសួងមហាផ្ទៃ ចំនួន២ រថយន្ត, អគ្គិភ័យកងរាជអាវុធហត្ថរាជធានីភ្នំពេញ ចំនួន២គ្រឿង, រថយន្តអគ្គិភ័យទីក្រុងអូរឡាំព្យា ចំនួន២គ្រឿង ប្រើប្រាស់ទឹកអស់២ឡាន និងរថយន្តអគ្គិភ័យក្រុមហ៊ុនស្រាបៀរកម្ពុជា ចំនួន១គ្រឿង ទើបអណ្តាតភ្លើងបានរលត់ទៅវិញទាំងស្រុង ៕
ចែករំលែកព័តមាននេះ