ខេត្តស្វាយរៀង ៖ លោកសរ សុដានី អភិបាលរងក្រុងស្វាយរៀង បានអះអាងថា ចាប់ពីថ្ងៃទី០២ ខែធ្នូ ឆ្នាំ២០២១នេះ អាជ្ញាធរនឹងប្រើវិធានការណ៍ក្ដៅ ចុះរៀបចំសណ្ដាប់ធ្នាប់ និងរុះរើសំយ៉ាបតូបចេញ ដោយឈប់យោគយល់ទៅលើក្រុមអាជីវករមួយចំនួនដែលលក់ដូររំលោ.ភយកចំណីផ្លូវនៅផ្សារវាលយន្តទៀតហើយ។
លោកបានបន្តថា ដោយអនុវត្តតាមការណែនាំរបស់រដ្ឋបាលក្រុង នាថ្ងៃនេះលោកបានដឹកនាំកម្លាំងចុះអនុវត្តរៀបចំសណ្ដាប់ធ្នាប់ ដោយប្រើវិធានការក្ដៅទៅលើក្រុមអាជីវករមួយចំនួនដែលលក់ដូររំលោ.ភយកចំណីផ្លូវសាធារណៈបង្កឱ្យមានការកកស្ទះចរាចរណ៍ បន្ទាប់ពីបានណែនាំជាច្រើនលើកច្រើនសាហើយ នៅតែរឹងទទឹងរឹងរូស ដោយមិនព្រមអនុវត្តតាមការណែនាំនៅជុំវិញផ្សារវាលយន្តឡើយ។
លោកបន្ថែមថា រដ្ឋបាលក្រុងស្វាយរៀង បានធ្វើការផ្សព្វផ្សាយតាមរយៈការចាក់មេក្រូ ធ្វើលិខិតដាស់តឿនជាលាយលក្ខណ៍អក្សរ និងគ្រប់មធ្យោបាយផ្សេងៗ ដោយបញ្ជ្រាបការយល់ដឹងដល់អាជីវករឲ្យចូលរួមសហការជាមួយរដ្ឋបាលក្រុង។ ការចុះអនុវត្តរបស់រដ្ឋបាលក្រុងនេះ គឺធ្វើដើម្បីផលប្រយោជន៍រួម មិនមែនបុគ្គលណាមួយនោះទេ ដោយក្នុងនាមជាអាជ្ញាធរ គឺមានតួនាទីភារកិច្ចសម្រាប់រៀបចំសណ្ដាប់ធ្នាប់ដល់អាជីវករដែលដាក់តាំងទំនិញនានា ដើម្បីថែរក្សាសោភ័ណ្ឌភាព និងសណ្ដាប់ធ្នាប់ចរាចរណ៍ឲ្យបានល្អ ធំទូលាយ ដើម្បីងាយស្រួលក្នុងការធ្វើដំណើររបស់ប្រជាពលរដ្ឋទូទៅ។
លោកបន្ថែមទៀតថា បើកាលណាក្រុមអាជីវកររៀបចំលក់ដូរមានសណ្ដាប់ធ្នាប់ល្អ មានលំហូរចរាចរណ៍ធំនោះ គឺងាយស្រួលដល់ការធ្វើដំណើររបស់អតិថិជនទិញមុខទំនិញ បន្លែ និងរបស់របរផ្សេងៗ មានចិត្តសប្បាយរីករាយ។ ចំណែកការលក់ដូរវិញ ក៏មានចិត្តសប្បាយក្នុងការលក់ដូររបស់របរទំនិញ និងធ្វើឲ្យមានជីវភាពកាន់តែល្អប្រសើរបន្ថែមទៀត ប៉ុន្តែក៏មានអាជីវករមួយចំនួនធ្វើតម្រាប់តាមគ្នា ដោយមិនគិតពីផលប្រយោជន៍រួមទេ គឺគិតយកតែឈ្នះចាញ់រៀងៗខ្លួន ដើម្បីបានលក់ដូរសង់សំយ៉ាបតូបបំពានលើចំណីផ្លូវ ហើយក្នុងនាមលោកជាអាជ្ញាធរក្រុង ក៏មិនសប្បាយចិត្តដែរ។
លោកក៏បានសំណូមពរដល់ក្រុមអាជីវករ ដែលតាំងលក់ដូរទំនិញគ្រប់ប្រភេទនៅជុំវិញផ្សារវាលយន្ត ក៏ដូចជាទូទាំងក្នុងក្រុងស្វាយរៀង និងធ្វើសំយ៉ាបផ្ទះលយមកលើចំណីផ្លូវ និងសាងសង់សំណង់ផ្សេងៗ ត្រូវអនុវត្តតាមសេចក្ដីជូនដំណឹងរបស់រដ្ឋបាលក្រុងស្វាយរៀង ត្រូវកាត់ចេញដោយខ្លួនឯង សូមកុំរង់ចាំដល់អាជ្ញាធរចុះអនុវត្តដោយប្រើធម៌ក្ដៅដូចនៅពេលនេះធ្វើឲ្យមានផលប៉ះពាល់ដល់សម្ភារៈ និងខាតពេលវេលាផលប្រយោជន៍របស់បងប្អូន ហើយបានស្រែកថា អយុត្តិធម៌ អាជ្ញាធរប្រើធម៌ក្ដៅនោះ គឺមិនពិតទេ។
ចំណែកប្រជាពលរដ្ឋដែលធ្វើដំណើរជុំវិញនៅផ្សារវាលយន្ត ក៏បានសាទរយ៉ាងខ្លាំងដល់រដ្ឋបាលក្រុងស្វាយរៀង ដែលដឹកនាំដោយលោកអភិបាលរងក្រុង និងកងកម្លាំង ព្រមទាំងក្រុមការងារដែលចុះរៀបចំសណ្ដាប់ធ្នាប់ចរាចរណ៍ឱ្យធំទូលាយងាយស្រួលក្នុងការធ្វើដំណើរឆ្លងកាត់មិនមានការកកស្ទះដូចមុន ។
រីឯកក្រុមអាជីវករដែលរងការរុះរើសំយ៉ាបតូបវិញបានលើកឡើងថា ការចុះរុះរើនេះ មិនយុត្តិធម៌ ដោយអ្នកប្រកបមុខរបរផ្ញើកង់ម៉ូតូ ធ្វើសំយ៉ាបរំលោ.ភចំណីផ្លូវខាងជើងផ្សារ និងខាងត្បូងផ្សារច្រើនជាងសំយ៉ាបតូបលក់ដូរ ហេតុអីអាជ្ញាធរមិនរុះរើ? ។
ចំណែកឯតំណាងម្ចាស់ភាស៊ីផ្សារវាលយន្ត ក៏បានថ្លែងដោយមិនពេញចិត្តថា ក្រុមហ៊ុនទើបតែដេញថ្លៃបាន២ថ្ងៃ មានការអនុវត្តធម៌ក្តៅពីអាជ្ញាធរ ដោយមិនបានផ្តល់ដំណឹងជូនម្ចាស់យកភាស៊ីឲ្យបានដឹង ហើយបើនៅមានបន្តអនុវត្តរុះរើកន្លែងផ្សេងទៀតធ្វើឲ្យប៉ះពាល់ដល់ការយកភាស៊ីផងដែរ៕
ចែករំលែកព័តមាននេះ