រាជធានីភ្នំពេញ ៖ តារាចម្រៀងដែលទើបផ្លាស់ពីផលិតកម្មសាន់ដេ ទៅផលិតកម្មថោនលោកកែវ វាសនា បានចូលរោងការហើយកាលពីពេលថ្មីៗកន្លងមក ជាមួយកូនស្រីអ្នកមានស្តុកម្នាក់ក្នុងទឹកដីខេត្តបន្ទាយមានជ័យ។
ភរិយារបស់តារាចម្រៀងកែវ វាសនា ឈ្មោះលឹម លីសុគន្ធារី ហៅឈីឈី ។ អ្នកទាំងពីរបានរៀបមង្គលការកាលពីថ្ងៃទី១១ ខែឧសភា ឆ្នាំ២០១៦ នៅគេហដ្ឋានខាងស្រីក្នុងភូមិឫស្សីក្រោក ឃុំឫស្សីក្រោក ស្រុកមង្គលបុរី ខេត្តបន្ទាយមានជ័យ ។
ដំណឹងនៃពិធីរៀបការរបស់លោកកែវ វាសនា មិនត្រូវបានផ្សព្វផ្សាយទូលំទូលាយសម្រាប់ប្រិយមិត្តអ្នកគាំទ្រទេ ប៉ុន្តែរូបភាពមង្គលការរបស់លោកបែកធ្លាយនៅតាមហ្វេសប៊ុក។
មង្គលការរបស់លោកកែវ វាសនា ទំនងជាមិនសូវមានអ្នកសិល្បៈចូលរួមច្រើនឡើយ មានតែសាច់ញាតិ និងអ្នកជិតស្និទ្ធមួយចំនួនប៉ុណ្ណោះ ព្រោះឃើញអ្នកសិល្បៈជាច្រើននាក់បង្ហោះសារជូនពរលោក និងភរិយាតាមហ្វេសប៊ុកដែលបង្ហាញថា ពួកគេមិនបានចូលរួមទេ ។
បន្ទាប់ពីពិធីមង្គលការបញ្ចប់នៅខេត្តបន្ទាយមានជ័យហើយនោះ គេមិនទាន់ដឹងថា លោកកែវ វាសនា និងភរិយាមានគម្រោងរៀបចំពិធីកាត់ចំណងដៃនៅភ្នំពេញ ឬយ៉ាងណាទេ ប៉ុន្តែមានប្រភពក្រៅផ្លូវការមួយបង្ហើបឱ្យដឹងថា ពួកគេអាចនឹងរៀបចំពិធីជួបជុំម្តងទៀតនៅភ្នំពេញ ។
គេមិនបានដឹងថា រវាងលោកកែវ វាសនា និងភរិយា ពន្លកស្នេហ៍កើតឡើងតាំងពីពេលណាឡើយ ប៉ុន្តែកន្លងមកតារាចម្រៀងរូបនេះ និងនារីម្នាក់តែងតែហៅគ្នាថា «ប្ដី-ប្រពន្ធ» ទោះបីមិនទាន់រៀបការក្ដី ។ ភាគីខាងស្រីបានជួយផ្គត់ផ្គង់តារាចម្រៀងកែវ វាសនា ទាំងរថយន្ត និងរបររកស៊ីជាដើម ។
ទោះបីជាបែបណាក្ដី លោកកែវ វាសនា បដិសេធថា នារីម្នាក់នោះមិនមែនជាសង្សារ ឬជាប្រពន្ធរបស់លោកឡើយ ពោលគឺគ្រាន់តែជាមិត្តភក្ដិជិតស្និទ្ធប៉ុណ្ណោះ ។ ម្ចាស់បទ «កុលាបពុលដី» រូបនេះឱ្យដឹងថា លោក និងនារីម្នាក់នោះស្គាល់គ្នាជាង៥ឆ្នាំមកហើយ ។ ភាពជិតស្និទ្ធ ទើបធ្វើឲ្យមនុស្សមួយចំនួនច្រឡំថា ជាសង្សារនឹងគ្នា ។ ដោយសារតែមានភាពជិតស្និទ្ធ និងទុកចិត្តគ្នា ទើបលោកវាសនាបានសម្រេចចិត្តដាក់ទុនរកស៊ីជាមួយគ្នា ៕
ចែករំលែកព័តមាននេះ