រាជធានីភ្នំពេញ៖ កិច្ចព្រមព្រៀងពាណិជ្ជកម្មសេរី រវាងសាធារណរដ្ឋប្រជាមានិតចិន និងព្រះរាជាណាចក្រកម្ពុជា នឹងអនុវត្តចូលជាធរមាន នាថ្ងៃទី១ ខែមករា ឆ្នាំ២០២២ ខាងមុខ។ នេះបើតាមការចេញផ្សាយរបស់ស្ថានទូតចិន នៅកម្ពុជា។
ស្ថានទូតចិន ប្រចាំកម្ពុជា បានប្រកាសនៅថ្ងៃទី២២ ខែវិច្ឆិកានេះ បានលើកឡើងថា កិច្ចព្រមព្រៀងខាងលើនេះ បានចុះហត្ថលេខាជាផ្លូវការ កាលពីថ្ងៃទី១២ ខែតុលា ឆ្នាំ២០២០។ យោងតាមការរៀបចំកិច្ចព្រមព្រៀងនេះ សមាមាត្រលើកលែងពន្ធលើទំនិញពាណិជ្ជកម្មនៃភាគីទាំងពីរ មានចំនួនជាង ៩០%។ ការសន្យាបើកទីផ្សារសេវាកម្ម និងពាណិជ្ជកម្ម បានបង្ហាញពីកម្រិតខ្ពស់បំផុត ដែលផ្តល់ជូនទៅកាន់ដៃគូពាណិជ្ជកម្មសេរី។
ទន្ទឹមនឹងនេះ ស្ថានទូតចិន បន្តថា ភាគីទាំងពីរ បានឯកភាពគ្នា ពង្រឹងកិច្ចសហប្រតិបត្តិការវិនិយោគ និងបង្កើតកិច្ចសហប្រតិបត្តិការកាន់តែស៊ីជម្រៅលើវិស័យ ដូចជា គំនិតផ្តួចផ្តើមខ្សែក្រវាត់ និងផ្លូវ ពាណិជ្ជកម្មអេឡិចត្រូនិច និងសេដ្ឋកិច្ចបច្ចេកវិទ្យា ជាដើម។
ស្ថានទូតចិន បន្ថែមថា កិច្ចព្រមព្រៀងពាណិជ្ជកម្មសេរីចិន-កម្ពុជា គឺជាព្រឹត្តិការណ៍ថ្មីមួយទៀត សម្រាប់ការអភិវឌ្ឍន៍ទំនាក់ទំនងសេដ្ឋកិច្ចពាណិជ្ជកម្មទ្វេភាគី នឹងជួយជំរុញសហគ្រាសក្រុមហ៊ុន និងបង្កើតអត្ថប្រយោជន៍កាន់តែច្រើន សម្រាប់ប្រជាជនទាំងពីរ៕ អ៊ាង ប៊ុនរិទ្ធ
ចែករំលែកព័តមាននេះ