រាជធានីភ្នំពេញ ៖ តបតាមការអញ្ជើញរបស់សហព័ន្ធកីឡាកាយវប្បកម្មអាស៊ីអាគ្នេយ៍ ចុះថ្ងៃទី២៣ មីនា លោកបណ្ឌិត ហង់ ជួនណារ៉ុន រដ្ឋមន្ត្រីក្រសួងអប់រំ យុវជន និងកីឡា បានឯកភាពឱ្យសហព័ន្ធកីឡាកាយវប្បកម្មកម្ពុជាបញ្ជូនប្រតិភូកីឡារបស់ខ្លួនឱ្យទៅចូលរួមប្រកួតរើសជើងឯកកីឡាកាយវប្បកម្មអាស៊ីអាគ្នេយ៍ (Southeast Asian Bodybuilding and Physique sport Federation –SEABPF) លើកទី១៣នៅប្រទេសថៃ ដែលនឹងប្រព្រឹត្តទៅនៅទីក្រុងបាងកក ចាប់ពីថ្ងៃទី២១ដល់ថ្ងៃទី២៥ មិថុនា ឆ្នាំ២០១៦ ខាងមុខនេះ ។
សហព័ន្ធកីឡាកាយវប្បកម្មកម្ពុជា បានត្រៀមបញ្ជូនប្រតិភូកីឡាចំនួន៦រូបឱ្យទៅចូលរួមប្រកួត ក្នុងនោះមានថ្នាក់ដឹកនាំ១រូបគឺលោក ស៊ឹម សុខមង្គលរស្មី គ្រូបង្វឹក១រូបគឺលោក សុខ សុភក្ដិ និងកីឡាករចំនួន៤រូបមានដូចជាលោក តឹក ប៊ុនរី, ណុំ សុបិន្ត, ទ្រឹង ចិន និងបាប វ៉ាន់នី ។ សម្រាប់ការទៅចូលរួមប្រកួតលើកនេះ កីឡាករទាំងអស់សុទ្ធតែមានជំនឿចិត្តរៀងខ្លួនក្នុងការដណ្ដើមមេដាយយកមកជូនជាតិ ព្រោះពួកគេទាំងអស់គឺជាកីឡាករដែលមានបទពិសោធន៍ខ្ពស់ និងធ្លាប់ធ្វើដំណើរទៅចូលរួមប្រកួតនៅលើឆាកអន្តរជាតិជាញឹកញាប់ទៀតផង ។ ចំពោះការចេញទៅប្រកួតលើកនេះត្រូវបានគេឱ្យដឹងថា ប្រើប្រាស់ថវិកាឆ្នាំ២០១៦របស់អង្គភាព និងថវិការបស់អគ្គនាយកដ្ឋានកីឡា នៃក្រសួងអប់រំ យុវជន និងកីឡា ៕
ចែករំលែកព័តមាននេះ