ចុះរាវលៀសទុកក្លែមស្រាលង់ទឹកស្លា.ប់ម្នាក់
ខេត្តត្បូងឃ្មុំ ៖ ពេលដែលខ្វះគ្រឿងក្លែមស្រានោះយុវជន១ក្រុមមានគ្នា៥នាក់ បានទៅចុះរកលៀស ស្ថិតនៅទីតាំងរណ្តៅជីកដីមួយកន្លែងចម្ងាយ៤៥០ម៉ែត្រខាងលិច
ខេត្តត្បូងឃ្មុំ ៖ ពេលដែលខ្វះគ្រឿងក្លែមស្រានោះយុវជន១ក្រុមមានគ្នា៥នាក់ បានទៅចុះរកលៀស ស្ថិតនៅទីតាំងរណ្តៅជីកដីមួយកន្លែងចម្ងាយ៤៥០ម៉ែត្រខាងលិច ភូមិវាលកណ្តៀង ឃុំជប់ ស្រុកត្បូងឃ្មុំ ដោយនាំគ្នាហែលទឹកលេងចុះឡើង ជាហេតុបណ្តាលឲ្យលិចបាត់ម្នាក់ ។ ហេតុការណ៏នោះបានកើតឡើងនៅវេលាម៉ោង៥និង៣០នាទីល្ងាច ថ្ងៃទី១៤ ខែមេសា ឆ្នាំ២០១៦ ហើយរហូតមកដល់វេ លាម៉ោង៩និង៣៨នាទីព្រឹក ថ្ងៃទី១៥ ខែមេសា ទើបសាកសពបានផុសអណ្តែត ។
អធិការរងនគរបាលស្រុកត្បូងឃ្មុំលោកវរសេនីយ៏ត្រី ឡុង សារិន ប្រាប់ឲ្យដឹងថា ជនរងគ្រោះឈ្មោះ បូ រ័ត្ន ហៅម៉ាប់ ភេទប្រុស អាយុ២៤ឆ្នាំ រស់នៅភូមិ១៥ ឃុំជប់ រួមជាមួយមិត្តភក្តិ៤នាក់ទៀតបាននាំគ្នាទៅ រាវលៀសនៅរណ្តៅដីមួយកន្លែង ដែលមានទំហំក្បាល៣៥ម៉ែត្រគុណ៦០ម៉ែត្រ និងជម្រៅ៦ម៉ែត្រគឺត្រូវ បានជីកយកអាចម៏ដីលក់ជាច្រើនឆ្នាំមកហើយ ថែមទាំងមានទឹកផងដែរ ។ អធិការរងនគរបាលស្រុកត្បូងឃ្មុំ លោកវរសេនីយ៏ត្រី ឡុង សារិន ប្រាប់បន្តថា ក្នុងពេលដែលនាំគ្នាចុះ រាវលៀសនោះ ថែមទាំងបានហែលទឹកឆ្លងពីមាត់រណ្តៅម្ខាង ទៅមាត់ស្រះម្ខាងទៀត ប៉ុន្តែចៃដន្យបែរជាអ្នករងគ្រោះហែលមិនបានដល់គោលដៅ ដែលជាហេតុបណ្តាលឲ្យលង់លិចទៅបាតរណ្តៅបាត់។
បន្ទាប់មកមិត្តភក្តិផ្សេងទៀត បាននាំគ្នាប្រឹងរាវរកតែមិនបានឃើញនោះទេ ហើយបង្កឲ្យមានការភ្ញាក់ផ្អើល ដល់សមត្ថកិច្ចមូលដ្ឋានបាននាំគ្នាប្រឹងរាវរក តែមិនបានទទួលលទ្ធផល ។ លុះរហូតមកដល់វេលាម៉ោង៩និង៣៨នាទីព្រឹកថ្ងៃទី១៥ ខែមេសា សាកសពឈ្មោះ បូ រ័ត្ន ហៅម៉ាប់ បានផុសអណ្តែតឡើង ក្នុងពេលនោះលោកស្នងការនគរបាលខេត្តបានឲ្យបង្កើតគណៈកម្មការចម្រុះមួយ ដោយមានស្ថាប័នពេទ្យចូលរួមពិនិត្យដែរ ។ នៅលើខ្លួនប្រាណសពមិនឃើញមានស្លាកស្នាម អ្វីគួរឲ្យសង្ស័យនោះទេ ដូច្នេះសពពិតជាបានស្លាប់ ដោយសារតែលង់ទឹកពិតប្រាកដ រួចក៏ត្រូវបានសមត្ថកិច្ចប្រគលសព ឲ្យទៅសាច់ញាតិដើម្បីរៀបចំបុណ្យតាមប្រពៃណី ។
អធិការរងនគរបាលស្រុកត្បូងឃ្មុំ លោកវរសេនីយ៏ត្រី ឡុង សារិន បញ្ជាក់ថា ទីតាំងរណ្តៅដីខាងលើ នោះត្រូវបានគេជីកតាំងតែពីឆ្នាំ២០១១ ដោយបានយកអាចម៏ដីលក់ឲ្យអ្នកស្រុក ហើយកន្លងមកនោះ ក៏ធ្លាប់មានក្មេងៗបាននាំគ្នាទៅងូតទឹកលេង ដោយបានលង់ទឹកតែសំណាង ត្រូវបានគេសង្គ្រោះទាន់ ពេលវេលា ។ សូមឲ្យឪពុកម្តាយទាំងឡាយមានការប្រុងប្រយ័ត្ន កុំបណ្តែតបណ្តោយកូនចៅឲ្យទៅ ងូតទឹករណ្តៅនោះលេង ដែលជាហេតុបណ្តាលឲ្យលង់ស្លាប់ នាំមកនូវវិប្បដិសារីក្នុងគ្រួសារ ៕
ចែករំលែកព័តមាននេះ