ខេត្តបាត់ដំបង៖ មេកងដ៏ធំនៃពួកក្មេងអន្ធពាល ដែលមានសមាជិកក្រុមប្រមាណ១០០នាក់ និងមានរហ្សនាមថា ក្រុម«ហៃវេ បាណន់» ដែលកម្លាំងសមត្ថកិច្ចតាមស្វែងរកចាប់ខ្លួនកន្លងមក ពេលនេះ ត្រូវសមត្ថកិច្ចចាប់ខ្លួនបានសម្រេចហើយ កាលពីវេលាម៉ោង៧និង៣០នាទីព្រឹកថ្ងៃទី២៨ តុលា នៅចំណុចផ្ទះសំណាក់មួយកន្លែង ក្នុងភូមិរំចេក៤ សង្កាត់រតនៈ ក្រុងបាត់ដំបង តាម«ដីកាបង្គាប់ឲ្យចាប់ខ្លួន» របស់ចៅក្រមស៊ើបសួរអមសាលាដំបូងខេត្ត ពីបទ«ហិង្សាដោយចេតនាមានស្ថានទម្ងន់ទោស»។
ប្រធានការិយាល័យព្រណ្មទណ្ឌកំរិតស្រាល លោក ឈឿង គឹមសុង ដែលដឹកនាំកិច្ចប្រតិបត្តិការនេះផ្ទាល់បានឲ្យដឹងថា ជនត្រូវចោទឈ្មោះ ម៉ា ចិន្ត្រា (ចិត្រា) ហៅម៉ៅ អាយុ១៨ឆ្នាំ រស់នៅភូមិព្រែកតាច្រែង ឃុំព្រែកនរិន្ទ ស្រុកឯកភ្នំ។ លោកបានប្រាប់ថា ជននេះ ត្រូវចាប់ខ្លួនតាម «ដីកាបង្គាប់ឲ្យចាប់ខ្លួន» លេខ៥៦៨ តព្រ ចុះថ្ងៃទី១២ តុលា ២០២១ របស់លោកអ៊ី សុវណ្ណ ចៅក្រមស៊ើបសួរសាលាដំបូងខេត្ត ក្រោមបទចោទ« ហិង្សារដោយចេតនាមានស្ថានទម្ងន់ទោស» ដែលប្រព្រឹត្ត កាលពីដើមខែកក្ដដា កន្លងទៅនេះនៅម្ដុំសួនច្បារសម្ដេចក្រឡាហោម ស ខេង។
បើយោងតាមដីកាបង្គាប់ឲ្យចាប់ខ្លួនរបស់លោក អ៊ី សុវណ្ណ ចៅក្រមស៊ើបសួរសាលាដំបួងខេត្តខាងលើនេះ ជនត្រូវចោទឈ្មោះ ម៉ា ចិន្ត្រា (ចិត្រា) ហៅ ម៉ៅ បានប្រព្រឹត្តអំពើហិង្សាដ៏ឃោរឃៅទៅលើភាគីម្ខាងទៀត នៅយប់ថ្ងៃទី០៦ កក្កដា ឆ្នាំ២០២១ នៅលើសួនច្បារសម្ដេចក្រឡាហោម ស ខេង។ អំពើហិង្សារបស់ក្រុមក្មេងអន្ធពាលនេះ បើតាមសមត្ថកិច្ចបាននិយាយថា គឺមានបក្សពួកច្រើននាក់ ដូចគោហ្វូងប្រដាប់ដោយកាំបិត ដំបង ដេញកាប់និងគប់ទៅលើគួរសត្រូវរបស់ខ្លួនយ៉ាងឃោរឃៅ ដែលធ្វើឲ្យភាគីម្ខាងរងបួស។
យើងងាកមកដឹងពីប្រវត្តិរបស់មេកងក្រុម«ហៃវេ បាណន់» ឈ្មោះ ម៉ា ចិន្ត្រា ហៅ ម៉ៅ នេះវិញ តើញាក់សាច់ប៉ុនណា ក្រោយពីបានដឹងតាមរយៈការស៊ើបអង្កេតរបស់សមត្ថកិច្ចជំនាញនិងចម្លើយសារភាពរបស់មេខ្លោងជនអន្ធពាលម្នាក់នេះ ? ជននេះបានរៀបរាប់ប្រាប់សមត្ថកិច្ចដោយសង្ខេបយ៉ាងដូច្នេះថា « ខ្ញុំត្រូវសមត្ថកិច្ចចាប់ខ្លួន ក្នុងករណីវ៉ៃ កាប់ចាក់គ្នា។ ក្រុមខ្ញុំឈ្មោះ ហៃវេ បាណន់។ ក្រុមខ្ញុំមានសមាជិកប្រហែល១០០នាក់ជាង មានម៉ូតូជាង៥០គ្រឿង។ សម្ភារៈ ដែលពួកខ្ញុំប្រើប្រាសសម្រាប់ប្រើហិង្សាទៅលើគូសត្រូវ មានផ្គាក់ កាំបិតពូថៅ និងដបសាំង»។ តើដបសាំងត្រូវប្រើបែបណា ពេលធ្វើសកម្មភាព ? ជននេះ បានពន្យល់ថា «ខ្ញុំបានយកដអិម១៥០ និងដកស្រាបៀរច្រកសាំងចូលរួចញ៉ុកក្រណាត់ លុះពេលច្បាំងគ្នា ខ្ញុំដុតគប់ៗទៅលើគួរសត្រូវតែម្ដង។ ខ្ញុំធ្លាប់ធ្វើសកម្មភាពដេកកាប់ចាក់គ្នា ប្រហែលជាង២០ដង ហើយពេលខ្លះមួយយប់កាប់គ្នា៣ដងក៏មាន។
ទីតាំងដែលក្រុមខ្ញុំដេញកាប់ចាក់គ្នា មាននៅលើផ្លូវហៃវេ ក្នុងស្ថានីយរថភ្លើង នៅលើសួនច្បារ និង នៅតាមកន្លែងដទៃទៀត ដែលមានគួ.សត្រូវច្រើន ហើយពេលខ្លះឈ្នះ តែពេលខ្លះរងរបួសទាំងសងខាង»។ លោក ឈឿង គឹមសុង ក៏បានរំលឹកពីប្រវត្តិក្រុម« ហៃវេ បាណន់» នេះផងដែរថា បើតាមកម្លាំងជំនាញរបស់លោកធ្វើការស្រាវជ្រាវកន្លងមកនេះ គឺក្រុម«ហៃវេ បាណន់» ដែលមានឈ្មោះ ល្បងម៉ៅ ជាមេខ្លោង នេះពិតជាល្បីល្បាញមែន។ ក្រុមនេះធ្វើសកម្មភាពស្ទើរគ្រប់ទីកន្លែង ឡើងកក្រើកក្រុង និង នៅតាមបណ្ដាស្រុកមួយចំនួនទៀត ព្រោះក្រុម«ហៃវេ បាណន់» នេះបង្កើតសត្រូវច្រើនណាស់។
ប៉ុន្តែយ៉ាងណា លោកគឹម សុង បានបញ្ជាក់ថា សមាជិកក្រុមនេះជាច្រើននាក់ ហើយត្រូវបានកម្លាំងលោកបង្ក្រាបបានជាបន្តបន្ទាប់ ហើយបច្ចុប្បន្នកំពុងជាប់គុកនៅឡើយ តែនៅមានឈ្មោះជាច្រើននាក់ទៀត ដែលកំពុងក្នុងបញ្ជីខ្មៅ ដែលត្រូវតាមចាប់ខ្លួននៅឡើយ តែពេលនេះមេខ្លោងធំ នៃក្រុមនេះត្រូវចាប់បញ្ចូលគុកហើយ៕
ចែករំលែកព័តមាននេះ