លោក ធាម ច័ន្ទពិសិដ្ឋ ប្រធានក្រុមប្រឹក្សាជំនុំជម្រះសាលាដំបូងរាជធានីភ្នំពេញ នារសៀលថ្ងៃទី២៧ ខែតុលា ឆ្នាំ២០២១ បានប្រកាសសាលក្រមផ្តន្ទាទោសជនជាតិចិនម្នាក់ ដាក់ពន្ធនាគារកំណត់២១ឆ្នាំ និងពិន័យជាប្រាក់ចំនួន៨០លានរៀល ក្រោមការចោទប្រកាន់ពីបទ
រាជធានីភ្នំពេញ ៖ លោក ធាម ច័ន្ទពិសិដ្ឋ ប្រធានក្រុមប្រឹក្សាជំនុំជម្រះសាលាដំបូងរាជធានីភ្នំពេញ នារសៀលថ្ងៃទី២៧ ខែតុលា ឆ្នាំ២០២១ បានប្រកាសសាលក្រមផ្តន្ទាទោសជនជាតិចិនម្នាក់ ដាក់ពន្ធនាគារកំណត់២១ឆ្នាំ និងពិន័យជាប្រាក់ចំនួន៨០លានរៀល ក្រោមការចោទប្រកាន់ពីបទ «រក្សាទុក និងដឹកជញ្ជូនគ្រឿង.ញៀនដោយខុសច្បាប់ ប្រមាណជិត១០គីឡូក្រាម» ។
ជនជាប់ចោទខាងលើនេះមានឈ្មោះ LI MING HSING ភេទប្រុស អាយុ៣១ឆ្នាំ ជាជនជាតិចិន ស្នាក់ នៅសណ្ឋាគារ «ដាយមិនវ័ន្ត» ដែលមានទីតាំងស្ថិននៅកោះពេជ្រ ក្នុងសង្កាត់ទន្លេបាសាក់ ខណ្ឌចំការមន រាជធានីភ្នំពេញ ។
សូមរំលឹកថា កាលពីវេលាម៉ោង៩យប់ ថ្ងៃទី២២ ខែកញ្ញា ឆ្នាំ២០២០ កម្លាំងគណៈបញ្ជាការឯកភាពខណ្ឌចំការមន បានដាក់គោលដៅត្រួតពិនិត្យអាវុធជាតិផ្ទុះនៅក្បែរគល់ស្ពានហង្សកោះពេជ្រ ស្ថិតក្នុងសង្កាត់ទន្លេបាសាក់ ពេលនោះក៏ស្រាប់តែមានរថយន្តស៊េរីទំនើប១គ្រឿង ម៉ាក LEXUS GS300 ពណ៌ខ្មៅ ពាក់ស្លាកលេខភ្នំពេញ ២W-៧៦៦៩ ធ្វើដំណើរដោយជនជាតិចិនមួយគ្រួសារ មានគ្នា៤នាក់ (២នាក់ជាប្តីប្រពន្ធ និងកូនតូចៗ២នាក់) បានបើកបំបុកបារ៉ាស់របស់សមត្ថកិច្ចក៏ជ្រុលចូលទៅមុខ រួចក៏ចតរថយន្តទុកចោល ហើយជនសង្ស័យទាំង២នាក់ប្តីប្រពន្ធបានចុះពីលើរថយន្ត ហើយរត់គេចខ្លួនបាត់ ស្រមោលចោលកូន២នាក់ និងបន្សល់ទុកកាបូបមួយដែលមានគ្រឿង.ញៀននៅក្នុងនោះផងដែរ ។
សូមរំលឹកទៀតថា បន្ទាប់មក កម្លាំងសមត្ថកិច្ចខណ្ឌចំការមន បានសហការជាមួយនគរបាលជំនាញការិយាល័យប្រឆាំងគ្រឿង.ញៀនរាជធានីភ្នំពេញ ក្រោមការសម្របសម្រួលពីស្ថាប័នយអយ្យការអមសាលាដំបូង បន្តធ្វើការឆែកឆេរបន្ទប់សណ្ឋាគារដែលជនសង្ស័យ២នាក់ប្តីប្រពន្ធជួលស្នាក់នៅ ទើប បានធ្វើការឃាត់ខ្លួនជនសង្ស័យម្នាក់ដែលជនជាតិចិនមានឈ្មោះ LI MING HSING រួមទាំងដកហូតថ្នាំ.ញៀនជិត១០គីឡូក្រាម ដែលមានដូចជា ៖ សារធាតុ.ញៀនប្រភេទ ហេរ៉ូអ៊ីន ចំនួន៤គីឡូ៨៧២ក្រាម, សារធាតុ.ញៀនប្រភេទ ខេតាមីន ចំនួន៤គីឡូ៨៤៩.៥៨ក្រាម សរុបគ្រឿង.ញៀនទាំង២ប្រភេទនេះ គឺទម្ងន់៩គីឡូ៧២១ក្រាម, សារធាតុ.ញៀនប្រភេទអំពូលចំនួន១៥ប្រអប់ និងរថយន្តស៊េរីទំនើបម៉ាក LEXUS GS300 មួយគ្រឿងទៀតផង ។
ក្រោយពេលឃាត់ខ្លួនជនសង្ស័យ និងវត្ថុតាងថ្នាំ.ញៀនជិត១០គីឡូក្រាម ជនសង្ស័យក៏ត្រូវបានកម្លាំងសមត្ថកិច្ចកសាងសំណុំរឿងបញ្ជូនទៅសាលាដំបូងរាជធានីភ្នំពេញ ហើយក៏ត្រូវឃុំខ្លួនចាប់ពីពេលនោះមក រហូតដល់ថ្ងៃបើកសវនាការជំនុំជម្រះក្តី និងមានសាលក្រមប្រកាសផ្តន្ទាទោសនៅពេលនេះ ៕
ចែករំលែកព័តមាននេះ