រាជធានីភ្នំពេញ ៖ តារាចម្រៀង និងតារាសម្តែងជាច្រើនដួង បានចេញទៅសម្តែងនៅក្រៅប្រទេស ក្នុងឱកាសចូលឆ្នាំថ្មីប្រពៃណីជាតិខ្មែរខាងមុខ ។
តារាចម្រៀងចំនួន៤នាក់បានចេញដំណើរពីកម្ពុជា
រាជធានីភ្នំពេញ ៖ តារាចម្រៀង និងតារាសម្តែងជាច្រើនដួង បានចេញទៅសម្តែងនៅក្រៅប្រទេស ក្នុងឱកាសចូលឆ្នាំថ្មីប្រពៃណីជាតិខ្មែរខាងមុខ ។
តារាចម្រៀងចំនួន៤នាក់បានចេញដំណើរពីកម្ពុជា កាលពីល្ងាចថ្ងៃទី២២ មីនា ២០១៦ ដើម្បីច្រៀងរាំនៅប្រទេសអូស្ត្រាលី ។ តារាចម្រៀងទាំងនោះមាន កញ្ញាស៊ុន ស្រីពេជ្រ កញ្ញាផន ស្រីខួច កញ្ញាស៊ូ ដាណេ និងលោកកុល សុភោ ។ ពួកគេនឹងចំណាយពេលយា៉ងហោចណាស់៤សប្តាហ៍ ពោលគឺក្នុងអំឡុងបុណ្យចូលឆ្នាំថ្មីប្រពៃណីជាតិខ្មែរ នាពេលខាងមុខ ។
កញ្ញាស៊ូ ដាណេ បញ្ជាក់មុនពេលចាកចេញ ដំណើរថា នាង និងតារាចម្រៀងផ្សេងទៀត ទៅសម្តែងតបតាមការចង់បានរបស់សមាគមមួយដែលជាអ្នករៀបចំកម្មវិធីនៅប្រទេសអូស្ត្រាលី។ ទីក្រុងសំខាន់មួយចំនួនសម្បូរដោយជនជាតិខ្មែររស់នៅ ដែលក្រុមអ្នកសិល្បៈទាំងនោះទៅច្រៀងរាំមាន ទីក្រុងស៊ីដនី អាលដឺឡេត និងមេ៉លប៊ន ។
តារាចម្រៀង និងជាអ្នករបាំប្រជាប្រិយ សូ៊ ដាណេ បញ្ជាក់ថា នាង និងសិល្បករទាំងអស់ សុទ្ធតែបានត្រៀមខ្លួនរួចជាស្រេចក្នុងការបង្ហាញបទចម្រៀងចម្រុះ ពិសេសបទចម្រៀងប្រជាប្រិយខ្មែរ ដើម្បីបង្កបរិយាកាសកម្សាន្តសប្បាយសម្រាប់ជនរួមជាតិខ្មែររស់នៅលើទឹកដីនៃប្រទេសអូស្ត្រាលី ។ ក្រៅពីនេះ កញ្ញាស៊ូ ដាណេ នឹងបង្ហាញទស្សនីយភាពរបាំបុរាណ របាំព្រះរាជទ្រព្យ និងរបាំប្រជាប្រិយខ្មែរមួយចំនួនតបតាមការចង់បានរបស់អ្នករៀបចំកម្មវិធី ។
ប្រសិនបើគ្មានការប្រែប្រួលទេ តារាចម្រៀងទាំង៤នាក់ នឹងវិលមកកម្ពុជាវិញក្រោយពិធីបុណ្យចូលឆ្នាំថ្មីប្រពៃណីជាតិ ។
កញ្ញាស៊ូ ដាណេ ឱ្យដឹងថា រូបនាងនឹងវិលទៅប្រទេសអូស្ត្រាលីជាថ្មី ក្នុងអំឡុងខែតុលាដោយចំណាយពេលជាយូរខែដើម្បីបង្ហាត់បង្រៀនកូនខ្មែរកើតនៅលើទឹកដីនោះពីរបាំប្រជាប្រិយ និងរបាំព្រះរាជទ្រព្យជាដើម។
កញ្ញាស៊ូ ដាណេ រំពឹងថា ការចេញដំណើរទៅសម្តែងរបស់នាង និងសិល្បករបីរូបផ្សេងទៀតនឹងទទួលបានការគាំទ្រពីជនរួមជាតិខ្មែររស់នៅលើទឹកដីនៃប្រទេសអូស្ត្រាលី ។
កញ្ញាសុន ស្រីពេជ្រ និយាយថា នាងសប្បាយចិត្តដែលបានរួមសម្តែងជាមួយតារាចម្រៀង៣នាក់ទៀត នាឱកាសបុណ្យចូលឆ្នាំថ្មីប្រពៃណីជាតិខ្មែរនៅប្រទេសអូស្ត្រាលី ។ ស្រីពេជ្រ សប្បាយចិត្តទោះជាអាក់ខានមិនបាននៅចូលរួមពិធីបុណ្យចូលឆ្នាំថ្មីក្នុងស្រុកក្តី ដ្បិតជនរួមជាតិនៅក្រៅប្រទេសរួមគ្នាថែរក្សាវប្បធម៌ប្រពៃណីជាតិខ្មែរយើងឱ្យបានគង់វង្សជាប់រហូតទោះជានៅស្រុកគេឆ្ងាយញាតិ ឆ្ងាយប្រទេសក្តី។ «អុីចឹងហើយទើបនាងខ្ញុំក៏ដូចជាក្រុមសិល្បៈរួមដំណើរពិតជារំភើបដែលបានបញ្ចេញទេពកោសល្យជូនបងប្អូនចំឱកាសពិសេស ដោយធ្វើយ៉ាងណាឲ្យការសម្តែងបានរលូនទៅមុខ ព្រមទាំងបានត្រៀមរៀបចំរួចជាស្រេចនូវបទចម្រៀង ផ្សេងៗទាក់ទិននឹងបុណ្យចូលឆ្នាំខ្មែរមានរាំវង់ រាំក្បាច់ ឡាំលាវជាដើម សមនឹងការចង់បានរបស់ពួកគាត់ផងដែរ» ៕
ចែករំលែកព័តមាននេះ