រាជធានីភ្នំពេញ ៖ បើទោះជាមានការរិះគន់បែបណាក្តី ដេននី ក្វាន់ ទៅណាមកណា នៅតែមិនចោលភាពសិចស៊ី ព្រោះជាចំណូលចិត្តរបស់នាង ។ កន្លងមករូបថតជាច្រើនសន្លឹករបស់តារាសម្តែងស្រី ដេននី ក្វាន់
រាជធានីភ្នំពេញ ៖ បើទោះជាមានការរិះគន់បែបណាក្តី ដេននី ក្វាន់ ទៅណាមកណា នៅតែមិនចោលភាពសិចស៊ី ព្រោះជាចំណូលចិត្តរបស់នាង ។ កន្លងមករូបថតជាច្រើនសន្លឹករបស់តារាសម្តែងស្រី ដេននី ក្វាន់ រងការរិះគន់ខ្លាំងព្រោះតែស្លៀកពាក់បែបសិចស៊ីពេករហូតអ្នករិះគន់ខ្លះប្រើពាក្យអសុរោះចំពោះនាង ។
តារាស្រីទើបល្បីឈ្មោះដេននី ក្វាន់និយាយថា នាងមិនខ្វល់នឹងការរិះគន់កន្លងទៅទេ ហើយនាងនឹងបន្តភាពសិចស៊ីកាន់តែខ្លាំងជាងនេះទៀត។ ការបញ្ជាក់នេះពេលដេននី ក្វាន់ចូលរួមកម្មវិធីសម្ពោធខ្សែភាពយន្តនៅផ្សារទំនើបអុីអនកាលពីពេល ថ្មីៗកន្លងមក ដោយគ្រងសម្លៀកបំពាក់់ស្ទើរចំហមួយល្វែងលើ ។ មុននោះដេននី ក្វាន់បានបង្ហោះតាមហ្វេសប៊ុក រូបថតបង្ហាញដងខ្លួនដ៏ស្រលូនជាច្រើនសន្លឹកជាមួយនឹងឈុតប៊ីគីនីបិទបាំងតែកេរ្តិ៍ខ្មាសលើក្រោមបន្តិចគ្រាទៅសម្តែងនៅកោះទន្សាយ ។ ទន្ទឹមនឹងការសរសើរពីរូបរាងស្រឡូនស្អាតនេះ មានអ្នករិះគន់ជាច្រើនវាយប្រហារដោយពាក្យសម្តីធ្ងន់ថានាងជាអ្នកបំផ្លាញសិល្បៈ និងប្រពៃណីជាតិខ្មែរ ហើយនាងធ្វើខ្លួនលើសពីអ្នកសិល្បៈ ។ អ្នករិះគន់ម្នាក់លើកឡើងតាមហ្វេសប៊ុកថា «វប្បធម៌ខ្មែរធ្លាក់ចុះដោយសារស្រីរបៀបនេះឯង» ។ ម្នាក់ផ្សេងទៀតលើកឡើងថា «មួយថ្ងៃៗធ្វើខ្លួន កែសម្រស់ ថតរូបបង្អួតសាច់បានអីមកវិញ ? ស្អាតហើយតែសូមរៀបកិរិយាមារយាទឱ្យស្អាតដូចរូបផងទៅកុំហួសហេតុពេក…»។ នៅមានពាក្យរិះគន់ ស្តីបន្ទោសជាច្រើនទៀតបាញ់ស្រោចទៅលើតារាសម្តែងរូបនេះ រួមមានទាំងបុរសខ្លះហ៊ានសួរតម្លៃខ្លួននាងប៉ុន្មានក្នុងការបានគេងជាមួយនាងផងដែរ ។
តបនឹងការរិះគន់នោះដេននី ក្វាន់ដែលមានឈ្មោះពិតឆោម ខ្វាន់ បញ្ជាក់ថា នាងមិនខ្វល់នឹងពាក្យរិះគន់ទាំងប៉ុន្មាននោះទេ ។ មិនខ្វល់ព្រោះនាងយល់ថា មិនអាចផ្គាប់ចិត្តមនុស្សគ្រប់គ្នាបានឡើយ ហើយរូបថតទាំងនោះស្ថិតក្នុងលក្ខណៈសិល្បៈ ជាឈុតដែលនាងស្លៀកសម្រាប់ងូតទឹកសមុទ្រ មិនមែនជាឈុតស្លៀកដើរចូលក្នុងផ្សារទេ ។ ដេននី ក្វាន់ឌឺដងថា «ឬចង់ឲ្យនាងខ្ញុំស្លៀកក្បិន ហូលផាមួងទៅងូតទឹកសមុទ្រ។ អ្នករិះគន់ប្រហែលជាមិនធ្លាប់ទៅសមុទ្រទេមើលទៅ » ។
ក្រៅពីររិះគន់បែបចំអក តារាស្រីទើបនឹងលេចមុខក្នុងពិភពសិល្បៈរូបនេះលើកឡើងថា នាងអាចសម្តែង ឬស្លៀកពាក់សិចស៊ីជាងនេះទៀតប្រសិនបើតម្រូវឲ្យមានការថតបែបនេះ ។ ទោះជាងយ៉ាងណាក្តីគេសង្កេតឃើញថា ការបង្ហាញភាពសិចស៊ីរបស់តារាសម្តែង ដេននី ក្វាន់ បានបង្កើនកម្តៅរិះគន់កាន់តែខ្លាំងពីមហាជន ពិសេសក្រោយពីនាងចេញមុខក្នុងវីដេអូឃ្លីបវាយបកយ៉ាងចាស់ដៃទៅលើអ្នកពេបជ្រាយនាង ។
ប្រធានសមាគមសិល្បករខ្មែរ លោកសុះ ម៉ាច បញ្ជាក់ថា ដេននី ក្វាន់ មិនមានឈ្មោះក្នុងបញ្ជីជាសមាជិកសមាគមសិល្បករខ្មែរទេ ។ ទោះជាយ៉ាងណាក្តី លោកសុះ ម៉ាច និយាយថា ការស្លៀកពាក់យ៉ាងណាគឺជាសិទ្ធិរបស់បុគ្គល ប៉ុន្តែក្នុងនាមជាអ្នកសិល្បៈគួរដឹងអំពីដែនកំណត់នៃការស្លៀកពាក់ចៀសវាងការរិះគន់ខ្លាំងពីមហាជន ។
និស្សិតសារព័ត៌មាននៅសាកលវិទ្យាល័យភូមិន្ទភ្នំពេញកញ្ញារ៉ាវី សុភារ័ត្ន និយាយថា ការស្លៀកពាក់របស់សិល្បការិនី គឺត្រូវគិតអំពីគុណតម្លៃស្ត្រីខ្លះ ដ្បិតតែពេលនេះប្រទេសយើងជឿនលឿនមែន ។ ដូចនេះមានតែការពិចារណាដោយខ្លួនឯងប៉ុណ្ណោះសម្រាប់ការស្លៀកពាក់ ។ អ្នកសិល្បៈធ្វើអ្វីមិនសមរម្យនោះអាចធ្វើឲ្យអាប់មុខ ព្រោះតែចង់ឱ្យមហាជនចាប់អារម្មណ៍ ។ ទេពកោសល្យក្នុងការសម្តែងទេដែលរុញឲ្យល្បីឈ្មោះ ៕
ចែករំលែកព័តមាននេះ