AP ផ្សាយថាដំរីព្រៃមួយហ្វូងបានចូលអុកឡុកនៅក្នុងភូមិជនបទមួយនាភាគខាងកើតប្រទេសឥណ្ឌា ។ ដំរីចុះប្រេងទាំងនោះបានសម្លាប់អ្នកស្រុកចំនួន៥នាក់ ។
កាលពីថ្ងៃទី២១ មីនា ២០១៦ លោក Ajay Kumar Das មន្ត្រីព្រៃឈើនៅរដ្ឋ Bengel ខាងលិចឱ្យដឹងថា ហ្វូងដំរីពីក្នុងព្រៃរាតត្បាតចូលទៅភូមិ «ផាតរ៍ » ក្នុងស្រុក Burdwan ដោយដេញជាន់អ្នកភូមិស្លាប់៤នាក់ ។ ចំណែកអ្នកស្រុកម្នាក់ទៀតត្រូវដំរីមួយក្បាលចាប់គ្រវាត់និងជាន់សម្លាប់ដែរ ។
បុរសឈ្មោះអាណា ដាម៉ូយី រ៉ាអីុ និងលោកណារ៉ាយ៉ាន់ ចន្ទ្រា ម៉ាជី អាយុ៦០ឆ្នាំដូចគ្នា បានស្លាប់ ខណៈពេលចេញទៅធ្វើស្រែនៅពេលព្រឹក ។ ចំណែកលោកប្រាកាស បយរ៉ា អាយុ៤០ឆ្នាំ ស្លាប់ដោយសារដំរីប្រើភ្លុកគ្រវែងទៅលើ និងដេញជាន់ ។ ចំពោះជនរងគ្រោះចុងក្រោយ២នាក់ទៀតក្នុងពេលចេញទៅមើលស្រែរបស់ខ្លួនចំពេលដំរី៣ក្បាលនោះកំពុងចុះប្រេង ។
ហេតុការណ៍កើតឡើងក្រោយពីមន្ត្រីព្រៃឈើ និងអ្នកស្រុកជួយគ្នាដេញដំរីទាំង៣ក្បាលឱ្យត្រឡប់ទៅក្នុងព្រៃវិញ ប៉ុន្តែពួកវាចុះប្រេងមានសភាពកាចសាហាវទើបវាយប្រហារអ្នកភូមិស្លាប់៥នាក់នោះ ។ ក្រៅពីអ្នកស្លាប់មានអ្នករបួស២នាក់ទៀត ។
រដ្ឋមន្ត្រីរុក្ខាប្រមាញ់នៅរដ្ឋ Bengal ឱ្យដឹងថា ជនរងគ្រោះដែលត្រូវដំរីជាន់ស្លាប់ ព្រោះពួកវាខឹងអ្នកស្រុកយកដុំថ្មទៅគប់បណ្តេញឱ្យចេញពីភូមិ ។ លោក Ajay Kumar Das បញ្ជាក់ថា ពេលជនរងគ្រោះម្នាក់ត្រូវដំរីចាប់គ្រវែងទៅលើ រួចចាប់បោកទៅលើដី និងជាន់នោះ អ្នកស្រុកភ័យខ្លាចបានត្រឹមតែឈរមើលប៉ុណ្ណោះមិនអាចចូលទៅជួយទាន់ពេលវេលាទេ ៕
ចែករំលែកព័តមាននេះ